Îkaanûkia n'ûntû bwa kûrega kwathîka
20
1 Mwathani eera Musa ata rî, 2 “Îra antû ba Isiraeri ata rî, ‘Muntû kinya ûrîkû wacienu kana wa ageni bara batûûraga gatîgatî keenu ûra akaanenkanîra mwana wake atûmîrwa kûgonga ngai îra îîtagwa Moreki abatîîrue aûragwa. Akaûragwa na maiga n'antû bonthe. 3 Muntû kinya ûrîkû akaaya kûnenkanîra mwana wake kîrî Moreki agwatithie Îrema rîake rîîtheru mûgiro na eekîre riîtwa rîakwa rîîtheru îgi, *nkamûûndûkîria mûgongo na nkamûrutaruta kuuma kîrî antû baao. 4 Îndî antû bakaaya gûkirîra ûntû bûbu aarûtha na barege kûmûûraga, 5 niû ningwa nkaûndûkîria muntû ûyu mûgongo we na mûciî wake gunthe na antû bonthe bara bakûmûgwatîra ûremuuni bwa gûtûmîkîra Moreki. Na nkamûrutaruta kuuma kîrî antû baakwa.6 “ ‘Muntû kinya ûrîkû ûra akaathi kîrî aringia kana bara baaragia na nkoma cia booyûûe, nkamûûndûkîria mûgongo na mûrutarute kuuma kîrî antû baao.
7 “ ‘Îîbathûreeni na bwîgue bûrî baatheru n'ûntû I niû Mwathani Ngai wenu. 8 Athîkagîraani mawatho maakwa na bûmathingatage n'ûntû i niû Mwathani na i niû mbwathûraga na nkabûtheria.
9 “ ‘Ûra wonthe akaaruma îthe kana gina nwa mwanka aûragwe. N'îthe aaruma kana gina na agaacookwa n'ûthûûku bwake.
10 “ ‘Muntû ûra akaathûûngîîra na mûka wa Mûisiraeri ûra ûngî ta we, we na mûka ûyu babatîîrue baûragwa. 11 Muntû ûra akamaama na mûka wa îthe n'akwira îthe îgi. We na mûka ûyu babatîîrue baûragwa na bagaacookwa n'ûthûûku bwao. 12 Muntû ûra akaamaama na mûk'wa mwan'wake, we na mûka ûyu babatîîrue baûragwa. Barûthîîte ûmaramari bûtagweteka bagacookwa n'ûthûûku bwao. 13 Muntû mûrûme akaaya kûmaama na muntû mûrûme ûra ûngî ta mûka na mûrûme bakeegua barûthîîte ûmaramari bûtagweteka; babatîîrue baûragwa. Bagaacookwa n'ûthûûku bwao. 14 Muntû akaaya kûgûra mûka na gina wa mûka ûyu, bakeegua barûthîîte ûmaramari bûtagweteka antû babu barî bathatû babatîîrue kûbîîthua na mwanki mwanka bakue n'ûntû ûntû bûbu barûthîîte n'ûntû bwa îgi na ûntû ta bûbu bûtibatîîrue gwîtîgîîrua gatîgatîîni keenu. 15 Muntû mûrûme akaaya kûmaama na nyamû ta mûka na mûrûme we na nyamû înu babatîîrue baûragwa. 16 Mûka akaaya kûmaama na nyamû ta mûka na mûrûme, we na nyamû înu babatîîrue baûragwa. Bagacookwa n'ûthûûku bwao.
17 “ ‘Muntû akaaya kûgûra mwaragina, wîgue i mwarî wa îthe kana wa gina na bamaame nwe, rîru nîîgi. Babatîîrue barutarutwa kuuma kîrî antû baao. Nairîîte mwaragina îgi na agaacookwa n'ûthûûku bwake. 18 Muntû akaaya kûmaama na mûka kagiita kara akwona nyambura, muntû ûyu akûmûruta nja nwe mûka aaga nthoni. Bo barî baîrî babatîîrue barutarutwa bauma kîrî antû bara bangî n'ûntû bakuuna mawatho ma mûgiro.
19 “ ‘Ûtikaamaame na nyûkwe mûkûrû kana nyûkwe mwanake, n'ûntû kûrûtha ûgu i kwira muntû wa mûciî îgi. Biû bûrî baîrî bûgaacookwa n'ûthûûku bwenu. 20 Muntû akaaya kûmaama na mûka wa îthe mwanake kana wa îthe mûkûrû, akeegua airîîte îthe mûkûrû kana îthe mwanake îgi. We na mûka ûyu bagaacookerwa n'ûthûûku bwao nabo barî baîrî bagaakua batarî mwana. 21 Muntû akaaya kûgûra mûka wa mûruagina, bagaakua batagea twana. Muntû ûyu narûthîîte ûntû bûrî na mûgiro na aira mûruagina îgi.
22 “ ‘Menyeeraani mawatho maakwa monthe na bwathîkîre maathana maakwa kaingo nthîgûrû îra mbwirîîte ya Kanaani îtikaabûtaîke. 23 Bûtigaakoobie mîtugo ya antû bara batwîre noogo bara nkwîngatia mbere yenu. N'ûntû i barûthîîte mantû mama monthe, inogeete i bo. 24 Îndî biigû i mbwîrîrîîte nkabûnenkera nthîgûrû înu yao noru mûno yûûyûrîîte îria na ûkî, mbûnenkere îtwîke yenu. I niû Mwathani Ngai wenu ûra abwathûranîîte na mîgongo îra îngî.
25 “ ‘Kwoogu nwa mwanka bûkûûrûkanie nyamû na nyoni ira itarî mûgiro na ira irî mûgiro. Bûtigaatonge nyamû kana nyoni ira irî mûgiro. I mbugîîte irî mûgiro na gûcitonga gûkabûgwatithia mûgiro. 26 Nwa mwanka bûkare bûrî baatheru na bûrî baakwa n'ûntû i niû Mwathani na ndî ûmûtheru. I mbwathûranîîte na mîgongo îra îngî kaingo bwîgua bûrî baakwa.
27 “ ‘Muntû mûrûme kana mûka kinya ûrîkû ûra akeegua arî mûriingia kana aaragia na nkoma cia booyûûe abatîîrue aûragwa. Abatîîrue aûragwa na maiga na agaacookwa n'ûthûûku bwake.’ ”