Mawatho mwanya mwanya
19
1 Mwathani eera Musa ata rî, 2 “Îra antû ba Isiraeri, ‘Tuîkaani baatheru n'ûntû niû, Mwathani Ngai wenu, ndî ûmûtheru. 3 Wa kîra ûmwe wenu nabatîîrue gûtîîyaga gina na îthe na amenyeere *Sabatû ciakwa. I niû Mwathani Ngai wenu. 4 Bûtigaantiganîrie na bûromba ngai cia ûrongo. Bûtikeerûthîre ngai cia ûrongo cia cuuma. I niû Mwathani Ngai wenu.5 “ ‘Rîra bwathînja nyamû ya kîgongwana kîa ngwatanîro, bûkîrutage na njîra îra îgaatûma bwîtîgîîrîka. 6 Nyama cia kîo ibatîîrue irîîgwa ntugû înu nyamû înu yathînjwa kana rûûni. Nyama cionthe ira igaakinyithia aûkeeni ibatîîrue kûbîîthua na mwanki. 7 Ûkaaya kwîgua nyama cia kîo ira itigeere ikaarîîgwa nyuma ya ntugû ithatû, kîgongwana gîku ti kîtheru na gîtiîtîgîîrua. 8 Muntû kinya ûrîkû ûra akaarîa nyama inu, ûkeegua arî na îbîtia rîa kûbûthia gîntû kîra kîathûrîrîtwe Mwathani, na muntû ûyu akaarutarutwa kuuma antûûni baao.
9 “ ‘Rîra bûgûketha mînda yenu bûtigaakethage nteere cia mînda na bûtigaacookage kûringa rûûa. 10 Bûtikaaringe mînda yenu ya mîcabiibû rûûa kana bûcooka bûkîoyaga ncabiibû îra îkûgwîyaga bûgîketha. Tigagaani inu naagu mîndaani n'ûntû bwa nkea na bwa ageni. I niû Mwathani Ngai wenu. 11 Bûtikaiye kana bwenania kana bûrongoa. 12 Ûtikaathiîtie na riîtwa rîakwa ûkîaragia ûrongo. Kûrûtha ûgu i kwira riîtwa rîakwa îgi. I niû Mwathani Ngai wenu.
13 “ ‘Ûtikainyîîrie muntû ûra ûngî kaingo ûmûtuunya gîntû gîake. Muntû akûrutîra ngûgî warîo, ûtikaamûraarîrie îrîi rîake ûtugû nwa bûmwe. 14 Ûtikaarume gîpûra kana waigîra ntûngi mûtego kaingo ûmûgwîthia. Kuthûkaani Mwathani.
15 “ ‘Giitagaani magamba bûra kûbatîîrue bûtakwendeera nkîa kana bûkuthûka muntû n'ûntû arî na îgweta. Îndî ûgiitîre mûtûûri waku îgamba bûra kûbatîîrue. 16 Ûtikaathi ûgîtaambagia ntheto cia ûrongo îgûrû rîa muntû ûra ûngî kîrî antû beenu. Ûtikauge ûntû nwa bûrîkû bûra bûûmba wîkîra ûtûûro bwa muntû ûra ûngî ûgwatiini. I niû Mwathani.
17 “ ‘Ûtigaakamate muntû na nkoro n'ûntû n'akûbîtîrîîtie nakaaba ûmûkaanie bûgwatanîre ûtikaaye kwîyia n'ûntû bwake. 18 Bûtikaarîagie ûthûûku bûrî biû kana bûkara bûmenanîîte, îndî enda mûtûûri waku ta bûra wîbendeete. I niû Mwathani.
19 “ ‘Athîkîraani maathana maakwa. Bûtikaareke nyamû cienu cia ndîîthia iciarithanua na nyamû cia mîthemba îngî. Bûtikaande mbeû mîthemba îîrî mûndaani wa mîcabiibû. Bûtigeekîre nguo itumîîtwe na ngoora mîthemba îîrî.
20 “ ‘Muntû akaaya kûmaama na mwarî nkombo ûra agûkeethua i muntû ûngî amûgûra, na ûkaaya kwîgua mwarî ûyu nkombo ti mûrîîre îrîi rîake na arekeerua, muntû ûyu aamaama na nkombo înu akaanenkerwa îkaanûkia îndî batiûragwa n'ûntû mwarî i nkombo. 21 Muntû mûrûme ûyu abatîîrue areeta ntûrûme mwîrîgaani wa Îrema rîa Kûrîîkanaga îrî ya kîgongwana n'ûntû bwa îbîtia. 22 Mûthînjîri wa Ngai agaatûmîra ntûrûme înu ya kîgongwana n'ûntû bwa îbîtia, kûthambia muntû mûrûme ûyu meeyia maake na akaarekerwa.
23 “ ‘Rîra bûkaathûngîra nthîgûrû ya Kanaani na bwande mîthemba kinya îrîkû ya mîtî ya maciaro, maciaro mara mîtî înu îgaaciara mîanka ya mbere îthatû bûmathûkie marî na mûgiro. Kagiitaani gaku bûtibatîîrue kûrîa maciaro mamu. 24 Mwankaani wa îna maciaro monthe makaanenkanîrwa kîrî kîewa gîa kwonania nkaatho kîrî niû Mwathani. 25 Îndî mwankaani wa îtaano nwa bûrîe matunda maayo. Gûkûrûkîîra njîra înu maciaro meenu makoongeereka. I niû Mwathani Ngai wenu.
26 “ ‘Bûtikaarîe nyama îrî na nthakame. Bûtikaaringie kana bûroga. 27 Bûtikeenje ntundu ira irî nteere cia kîongo kana bwenja ntundu ira irî nteere cia kîreru, 28 kana bûkûûra nkûûro [bwîbananga rûûo] kana bwîtemanga na tûyiû rîra bûkûrîrîra bara bakuîte, I niû Mwathani.
29 “ ‘Bûtikaareke aarî beenu bagwatwa i mûgiro bûbarekeeretie batuîka marwaya. Bwarûtha ûgu nthîgûrû îkaûyûra ûmaramari na ûthûûku. 30 Menyagîîraani *Sabatû ciakwa na bûtîîye bantû aakwa ara atheru. I niû Mwathani.
31 “ ‘Bûtikaathi kîrî ariingia kana bara baaragia na nkoma cia booyûûe. N'ûntû bakabûgwatithia mûgiro. I niû Mwathani Ngai wenu.
32 “ ‘Rûngamagaani rîra bûrî mbere ya antû baakûrû na bûkabatîîya. Na bûtîîye Ngai wenu, I niû Mwathani.
33 “ ‘Bûtikaarûthîre ageni bara bûtwîre nabo nthîgûrû yenu mantû maathûûku. 34 Barûthagîreeni wa ta bûra bûrûthagîra beenu ba Isiraeri na bûbeende wa ta bûra bwîbendeete. Ririkanaani kagiita kamwe wana biû bwarî ageni nthîgûrû ya Miisiri. I niigû Mwathani Ngai weenu.
35 “ ‘Bûtikeenie muntû nwa ûrîkû bûgîtûmagîra ithimi bia ûrongo rîra bûkûthima ûraaya, ûrito kana wingî bwa gîntû. 36 Tûmîraani ithimi bia ûûmma, maiga ma kûthima ma ûmma na ndebe ya kûthima ya ûmma. I niû Mwathani Ngai wenu ûra aabûrutire Miisiri. 37 Nwa mwanka bwathîkîre maathana na mawatho maakwa monthe. I niû Mwathani.’ ”