Kûmenyana kîîmwîrî kûra gûteetîgîîrîîtue
18
1 Mwathani eera Musa, 2 “Îra antû ba Isiraeri ata rî, ‘I niû Mwathani Ngai wenu. 3 Bûtikaathingate mîthiîre ya antû ba Miisiri, naara bwatûûraga, kana ya antû ba Kanaani naara mbwirîîte îîndî. Bûtikaathingate mîkarîre yao. 4 Thingataani mawatho maakwa na bûrûthe bûra nkuuga. I niû Mwathani Ngai wenu. 5 Thingataani mataaro na mawatho mara mbûnenkagîra. Bwamaathîkîra bûgaatûûra bwega. I niû Mwathani.6 “ ‘Gûtikaagîte nwa ûmwe wa cienu akaamaama na mûka wa mûciî wao. I niû Mwathani. 7 Ûtikaire abaagu îgi na njîra ya kûmaama na nyûkwe. Wee i nyûkwe ûtikaamaame nwe. 8 Ûtikaire abaagu îgi na njîra ya kûmaama na mûka kinya ûrîkû wake. 9 Ûtikaamaame na mwaranyûkwe wîgue bûrî ba abaagu ûmwe na nyûkwe ûmwe kana bûrî ba abaagu ûmwe îndî nyûkwe atarî ûmwe kana nyûkwe ûmwe îndî abaagu atarî ûmwe. 10 Ûtikaamaame na mwarî wa mwarî waku kana wa nthaka yaku. Rîru n'îgi kîrî woû. 11 Ûtikaamaame na mwarî wa mûka wa abaagu n'ûntû i mwaranyûkwe. 12 Ûtikaamaame na mwaragina wa abaagu, ûyu i muntû wa mûciî wa abaagu. 13 Ûtikaamaame na mwaragina wa nyûkwe n'ûntû i muntû wa mûciî wa ba nyûkwe. 14 Ûtikaamaame na mûka wa abaagu mûkûrû kana abaagu mwanake, n'ûntû ûyu i nyûkwe mûkûrû kana nyûkwe mwanake. 15 Ûtikaamaame na mûkwamwan'waku. I mûka wa nthaka yaku na ûtikaamaame nwe. 16 Ûtikaamaame na mûka wa mûruanyûkwe, gûku i kwira mûruanyûkwe îgi. 17 Ûtikaamaame na mwarî, kana mwarî wa mwana wa mûka bwaromaama nwe. Ûtikaagûre mwarî wa nthaka kana wa mwarî wa mûka ûyu kana bûmaama nwe. Babu n'antû ba mûciî wake, na kûrûtha ûgu n'ûthûûku bûûnene mûno. 18 Ûtikaagûre mwaragina wa mwekûrû waku, mwekûrû waku arî mwoyo.
19 “ ‘Ûtikaamaame na mûka rîra akwona nyambura n'ûntû arî na mûgiro. 20 Ûtikaamaame na mûka wa muntû ûngî n'ûntû ûkaagwatwa i mûgiro. 21 Ûtikaanenkanîre mwana waku atûmîrwa kûgonga Moreki n'ûntû ûntû bûbu bûkaareeta îgi kîrî riîtwa rîa Mwathani Ngai. 22 Gûtikaagîte muntû mûrûme akaamaama na muntû mûrûme ûngî ta bûra amaamaga na mûka. Bûbû n'ûntû bûrî îgi mûno. 23 Gûtikaagîte muntû mûrûme kana mûka agaakara na nyamû ta mûka na mûrûme, bûbu n'ûmaramari na i bûreetaga mûgiro.
24 “ ‘Bûtikeegwatithie mûgiro n'ûntû bwa kûrûtha ûntû kinya bûrîkû bwa mantû mamu, n'ûntû mîgongo yonthe îra nkwîngatia îbûtegategera îrî na mûgiro n'ûntû bwa mo. 25 Nthî n'yagîîre mûgiro na i kîo gîtûmi ngûkaanûkia antû baayo n'ûntû bwa meeyia maao na ngatûma îbataîka. 26 Nwa mwanka bwathîkîre watho na mataaro maakwa na bûtikaarûthe mantû mamu marî njici, biû Isiraeri na ageni bara batwîre gatîgatî keenu, 27 mantû mamu i mo marûthagwa n'antû bara baatûûraga nthîgûrû înu mbwirîîte, n'yo nthî yaagîa mûgiro. 28 Na bwekîra nthî mûgiro îkabûtaîka wa ta bûra îgûtaîka mîgongo îra îtwîre nthîgûrû îra mbwirîîte. 29 Muntû wonthe ûra akaarûtha ûntû kinya bûrîkû bwa mantû mamu marî njici akaarutarutwa kuuma kîrî antû baao.
30 “ ‘Kwoogu athîkîraani mawatho maakwa na bûtikaathingate mîkarîre îrî njici ya antû bara batwîre nthîgûrû înu bûûya kwîgwatithia mûgiro namo. I niû Mwathani Ngai wenu.’ ”