Mawatho mangî
17
1 Mwathani eera Musa, 2 “Îra Arûni na nthaka ciake na antû bonthe ba Isiraeri atarî, ‘Ûûgû i bu Mwathani aathanîîte: 3 Muntû kinya ûrîkû wa Isiraeri ûra akaathînja ng'ombe kana ng'ondu kana mbûri akîrutîra Mwathani kîgongwana ndeeni kana ome ya kambî, 4 bantû akûmîthînjîra mwîrîgaani wa Îrema rîa Kûrîîkanaga amînenkanîra kîrî kîgongwana kîrî Mwathani, muntû ûyu arî na îbîtia rîa gwîtûûra nthakame na abatîîrue arutarutwa kuuma kîrî antû ba Ngai. 5 Gîtûmi kîa watho bûbû n'atî antû ba Isiraeri îîndî babatîîrue kûreetagîra Mwathani nyamû ira baarutagîra igongwana naagu ngûndûûni. Îîndî bakaireetaga mwîrîgaani wa Îrema rîa Kûrîîkanaga kîrî mûthînjîri wa Ngai nwe acirutîre Mwathani irî kîgongwana kîa ngwatanîro. 6 Mûthînjîri wa Ngai nwe amincamincîrie nthakame yabio nteere cionthe cia kîthînjîro agu mwîrîgaani wa Îrema rîa Kûrîîkanaga na abîîthie maguta maabio magûtûma mûcinko ûmwega wîguîgwa i Mwathani. 7 Antû ba Isiraeri batibatîîrue kûthi na mbere gûtuîka antû batagwîtîgîka kîrî Mwathani na njîra ya kûthi na mbere kûthînjîra nyamû ciao ngai cia mîbuanaano ya mbûri. Antû ba Isiraeri babatîîrue kûthingata watho bûbû magiitaani monthe mara makaaya.’8 “Ûbeere ata rî, ‘Muntû kinya ûrîkû wa Isiraeri kana ûmwe wa ageni bara batûûraga gatîgatîîni kaao ûra akaaruta kîgongwana kîra kîbîîthagua kana kîgongwana kîa mûthemba ûngî kinya ûrîkû, 9 na arege gûkîrutîra mwîrîgaani wa Îrema rîa Kûrîîkanaga kîrî kîgongwana kîrî Mwathani, muntû ûyu abatîîrue arutarutwa kuuma kîrî antû ba Ngai.
10 “ ‘Muntû kinya ûrîkû wa Isiraeri kana ûmwe wa ageni bara batûûraga gatîgatîîni kaao ûra akaarea nthakame, nkamûûndûkîria mûgongo na nkamûrutaruta kuuma kîrî antû ba baakwa. 11 Mwoyo wa kîûmbe kîonthe kîrî mwoyo, ûrî nthakameeni na i kîo gîtûmi neenkanîrîîte yoo îîtûûragwa kîthînjîrooni n'ûntû bwa kûthambia meeyia meenu. I nthakame îthambagia meeyia ma muntû. 12 Na gîku i kîo gîtûmi Mwathani eerire antû ba Isiraeri, “Gûtikaagîte muntû nwa ûmwe wa cienu kana wa ageni bara batûûraga gatîgatîîni keenu akaarea nthakame.”
13 “ ‘Mûisiraeri nwa ûrîkû kana ûmwe wa ageni bara batûûraga gatîgatîîni keenu ûra akaaguîma nyamû kana nyoni îtarî mûgiro, abatîîrue eetûûra nthakame yaayo nthî na amîthika na mûthetu. 14 Mwoyo wa gîntû kîonthe kîrî mwoyo ûrî nthakameeni yakîo na i kîo gîtûmi ndeerire antû ba Isiraeri batikaarîe nthakame. Na muntû ûra akaarûtha ûgu nkamûrutaruta kuuma kîrî antû baakwa.
15 “ ‘Muntû kinya ûrîkû, wîgue arî Mûisiraeri kana mûgeni ûra akaarea nyama cia nyamû îkuîte yongwa kana yûûragîîtwe i nyamû cia kîthaka, nwa mwanka abûûre nguo ciake, athambe na akeegua arî na mûgiro mwanka ûgoro bwa ntugû înu. Na nyuma ya ûgu akeegua arî mûtheru. 16 Îndî arega kûbûûra nguo ciake na athamba, agaacookeerwa n'ûthûûku bûbu bwake.’ ”