Ntugû ya kûthambua meeyia
16
1 Mwathani aaria na Musa nyuma ya ikuû bia nthaka ciîrî cia Arûni ira ciakuire rîra ciathiire aakubî na Mwathani na njîra îra îtabatîîrue. 2 Amwîra ata rî, “Îra mûruanyûkwe Arûni atikaathiiyage warîra akwenda Bantû Ara Atheru Mûno nyuma ya gîtambaa athengeera gîtî gîa kîao kîra kîrî îgûrû rîa îthandûkû rîa maathana ma kîrîîkanîro aaya gûkua, n'ûntû agu noogo mbumagîîra ndî ndeeni ya îtu îgûrû rîa gîtî gîa kîao.3 “Ûûgû i bu Arûni abatîîrue athûngîra Bantû Ara Atheru Mûno, eegue arî na ncamba ya kiumîri îrî ya kîgongwana n'ûntû bwa wîyia na ntûrûme ya kîgongwana kîra kîbîîthagua. 4 Abatîîrue eekîra nguo cia ûthînjîri irûthîîtwe na gatani inthongi nacio i, nguo îndaaya, nguo cia ndeeni, mûcibi na kîremba ooge kîongo. Nguo inu n'intheru na kwoogu nabatîîrue athambe mbere aciîkîra. 5 Antû ba Isiraeri nabo bakaanenkera Arûni nthenge ciîrî cia kîgongwana n'ûntû bwa wîyia na ntûrûme ya kîgongwana kîra kîbîîthagua. 6 Akaaruta ncamba îra kîrî kîgongwana n'ûntû bwa wîyia, kûthamba wîyia bwake we mwene na bwa mûciî wake. 7 Acooke aire nthenge ira ciîrî acinenkanîre mbere ya Mwathani mwîrîgaani wa Îrema rîa Kûrîîkanaga. 8 Akaariinga mbûgû n'ûntû bwa nthenge inu ciîrî kaingo amenya n'îrîkû akaiga îrî ya Mwathani na n'îrîkû îkeegua îrî ya Acaceri.a 9 Arûni akaathînja mbûri îra îgwîrîîrwe i mbûgû îrî ya Mwathani amîrute kîrî kîgongwana n'ûntû bwa wîyia. 10 Mbûri îra îkeegua îgwîrîîtwe i mbûgû îrî ya Acaceri îkairwa mbere ya Mwathani îrî mwoyo n'ûntû bwa kûthambia meeyia ma antû bonthe, rîru îrekeerue rwanda kîrî Acaceri.
11 “Arûni aarîîkia kûthînja ncamba înu ya kîgongwana n'ûntû bwa wîyia bwake we mwene na bwa mûciî wake, 12 akaathûkia kabakûri kara kabîîthagîrua macoco kaûyûri makara ma mwanki kuuma kîthînjîrooni kîra kîrî mbere ya Mwathani, akaire nyuma ya gîtambaa Bantû ara Atheru Mûno rîru acooke athûkie mpî irî ciîrî cia macoco maathie mainya bwega. 13 Eekîre macoco mamu mwankiini ûyu ûrî mbere ya Mwathani, na ntoogo înu ya macoco îthiîke gîtî gîa kîao kîra kîrî îgûrû rîa îthandûkû rîa maathana ma kîrîîkanîro atikaaye gûkua. 14 Akaathûkia nthakame îmwe ya ncamba înu na amîmincamince na kîara mbere ya gîtî gîa kîao na acooke amincamince nthakame înu maita mûgwanja rûteere rwa mbere rwa îthandûkû rîa maathana.
15 “Nyuma ya ûgu akaathînja mbûri îra ya kîgongwana n'ûntû bwa wîyia bwa antû na athûngîrie nthakame yaayo ndeeni ya Bantû Ara Atheru Mûno, na amincamince mbere ya gîtî gîa kîao na rûteere rwa mbere rwa îthandûkû rîa maathana, wa ta bûra arûthire na nthakame ya ncamba. 16 Gûkûrûkîîra ûgu ûkeegua akûtheria Bantû Ara Atheru Mûno kuumania na mîgiro ya antû ba Isiraeri na meeyia maao monthe. Nwa mwanka arûthe wa ûgu kîrî Îrema rîa Kûrîîkanaga wanarîo n'ûntû rîrî gatîgatî ga kambî ya antû barî na mîgiro. 17 Kuuma rîra Arûni akaathûngagîra Bantû Ara Atheru Mûno kûruta kîgongwana n'ûntû bwa kûthambia meeyia, mwanka rîra akaumagarûkaga gûtikeegue kûrî na muntû kinya ûrîkû Îremaani rîa Kûrîîkanaga. Aarîîkia kûthamba meeyia maake we mwene, na athambie ma mûciî wake na ma antû bonthe ba Isiraeri, 18 abatîîrue aumagarûka athi kîthînjîrooni gîa kîgongwana kîra kîbîîthagua akîtherie. Abatîîrue athûkia nthakame îmwe ya ncamba înu na îmwe ya mbûri înu amîaka ngociini cionthe cia kîthînjîro. 19 Abatîîrue amincaminca nthakame înu na kîara gîake îgûrû ya kîthînjîro maita mûgwanja. Gûkûrûkîîra njîra înu akaatheria kîthînjîro gîku kuumania na meeyia ma antû ba Isiraeri na gîgaatuîka kîîtheru.
20 “Rîra Arûni akaarîîkia kûtheria Bantû Ara Atheru Mûno, Îrema rîa Kûrîîkanaga na kîthînjîro, akaareeta mbûri înu îngî îrî mwoyo mbere ya Mwathani. 21 Akaigîîra njara ciake irî ciîrî îgûrû ya kîongo kîa mbûri înu na aumbûre moothûûku na meeyia monthe na ûremu bunthe bwa antû ba Isiraeri mathi kîongooni kîa mbûri înu. Rîru mbûri înu îkaathûkua i muntû ûra athuurîrîîte ngûgî înu athi amîrekeerie îthi naagu rwanda. 22 Nthenge înu îgaakamata meeyia monthe ma antû ba Isiraeri îthi namo na muntû ûyu akamîrekeeria naagu rwanda.
23 “Rîru Arûni akaathûngîra Îremaani rîa Kûrîîkanaga arute nguo ira cia athînjîri ba Ngai ira eekîrîîte mbere ya kûthûngîra Bantû Ara Atheru Mûno, acitige oogo. 24 Nwa mwanka athambîre bantû atheru na acooke eekîre nguo ciake. Nyuma ya ûgu akaumagarûka na arute igongwana bira bibîîthagua kîmwe gîa kûthambia wîyia bwake na kîra kîngî gîa kûthambia wîyia bwa antû ba Isiraeri. 25 Rîru akaabîîthîria mathuunya ma nyamû ira cia kîgongwana n'ûntû bwa wîyia kîthînjîrooni îgûrû.
26 “Muntû ûra wirire mbûri îra ya Acaceri rwanda abatîîrue abûûra nguo ciake na athaamba mbere athûngîra kambîîni. 27 Nacio ncamba na nthenge ira ciarî cia kîgongwana n'ûntû bwa wîyia, ira nthakame yacio yairirwe Bantû Ara Atheru Mûno, igaakamatwa ciirwe ome ya kambî ikabîîthîrue noogo. Njûo, nyama na mainto ma nda monthe bibatîîrue bibîîthua. 28 Muntû ûra akaabîîthia into bibu abatîîrue abûûra nguo ciake na athamba mbere acooka kambîîni.
29 “Bûkaathingataga mawatho mama rîonthe biû antû ba Isiraeri bwinthe na ageni bara batûûraga gatîgatîîni keenu. Ntugû ya îkûmi ya mweri wa mûgwanja nwa mwanka batîîrîre kûrîa na batikaarute ngûgî nwa îrîkû. 30 Ntugû înu bûkaathambua meeyia meenu na kwoogu bûkeegua bûtarî na mûgiro mbere ya Mwathani. 31 Ntugû înu îkeegua îrî ntheru mûno îra bagaatîîrîra kûrea na batakîruta ngûgî nwa aniini. Mawatho mama i makûthingatagwa magiita monthe. 32 Mûthînjîri ûmwe wa Ngai ûra akeegua arî mwîtûûrîrua maguta na aathûrwa kûthûkia mwanya wa îthe arî mûthînjîri ûra mûnene wa Ngai nwe akaarutaga igongwana bia kûtherania. Ageekagîra nguo ira cia gatani cia ûthînjîri, 33 na akaatheria Bantû Ara Atheru Mûno, Îrema rîa Kûrîîkanaga, kîthînjîro, athînjîri ba Ngai na antû bonthe ba Isiraeri. 34 Mawatho mama mabatîîrue mathingatagwa magiita monthe. Na ûntû bûbu bûrûthagwe iita rîmwe woora mwanka kaingo antû ba Isiraeri bathambua meeyia maao monthe.”
Na kwarûthwa bunthe bûra Mwathani aathîîte Musa.