Mûgiro yuumanîîtie na kûrua nthakame
15
1 Mwathani eera Musa na Arûni ûûgû, 2 “Aria na Aisiraeri ûbeere ûûgû, ‘Rîra muntû mûrûme akuuma maira ûtheriini bwake arî na mûgiro n'ûntû bwa maira mamu makuuma. 3 Wîgue maira mamu marîkara makiumaga kana i matigîîte kuuma akeegua arî na mûgiro. 4 Ûrîrî kinya bûrîkû bûra muntû ûyu akaamaamîra bûkeegua bûrî na mûgiro, na gintû kîonthe kîra agaakarîra gîkeegua kîrî na mûgiro. 5 Muntû kinya ûrîkû ûra agaatonga ûrîrî bwake abatîîrue abûûra nguo ciake na athamba, na akeegua arî na mûgiro mwanka ûgoro bwa ntugû înu. 6 Na muntû ûra agaakarîra gîntû kinya kîrîkû kîra muntû ûyu akuuma maira akarîîre abatîîrue abûûra nguo ciake na athamba, na akeegua arî na mûgiro mwanka ûgoro bwa ntugû înu. 7 Muntû kinya ûrîkû ûra agaatonga muntû ûyu ûkuuma maira abatîîrue abûûra nguo na athamba na akeegua arî na mûgiro mwanka ûgoro bwa ntugû înu. 8 Muntû ûyu akuuma maira akaaya gûtuîra muntû kinya ûrîkû ûtarî na mûgiro mata, muntû ûyu atuîrwa mata abatîîrue abûûra nguo ciake na athamba na agaakara arî na mûgiro mwanka ûgoro bwa ntugû înu. 9 Gîtî kinya kîrîkû kîra muntû ûyu akuuma maira agaakarîra gîkeegua kîrî na mûgiro. 10 Muntû ûra agaatonga gîntû kîra muntû ûyu akeegua akarîrîte akeegua arî na mûgiro mwanka ûgoro bwa ntugû înu. Muntû ûra agaakamata gîntû kîra muntû ûyu ûkuuma maira akarîrîîte abatîîrue abûûra nguo ciake na athamba na akeegua arî na mûgiro mwanka ûgoro bwa ntugû înu. 11 Muntû ûra ûkuuma maira akaaya gûtonga muntû, we ataambîîte kûthamba njara, muntû ûyu aatongwa abatîîrue kûbûûra nguo ciake na athamba na akeegua arî na mûgiro mwanka ûgoro bwa ntugû înu. 12 Nyûngû ya yûûmba îra muntû ûyu agaatonga îbatîîrue yûragwa na mbakûri ya mûtî îra agaatonga îbatîîrue îthambua.13 “ ‘Nyuma ya muntû gûtiga kuuma maira, kûtherua wake gûkaathûkia kagiita ga ntugû mûgwanja rîru abûûre nguo ciake na athambe na rûûyî rûûtheru rwa kînyaka, na mûgiro ûra akûrî nau ûkaathira. 14 Ntugû ya inyanya akaathûkia macea maîrî ma kîthaka kana macea maîrî matarî makûrû mûno ma mûciî airîre mûthînjîri wa Ngai mwîrîgaani wa Îrema rîa Kûrîîkanaga. 15 Mûthînjîri wa Ngai akamaruta kîgongwana, rîmwe rîrî kîgongwana n'ûntû bwa wîyia na rîra rîngî rîrî kîgongwana kîra kîbîîthagua. Ûgu i bu mûthînjîri wa Ngai akaaruta kîgongwana mbere ya Mwathani n'ûntû bwa kûtheria muntû ûyu aumaga maira.
16 “ ‘Rîra muntû mûrûme eetûûra mbeû yake abatîîrue athamba mwîrî wake gunthe na akeegua arî na mûgiro mwanka ûgoro bwa ntugû înu. 17 Gîntû kîra gîgeetîgîrwa i mbeû ya muntû mûrûme wîgue kîrûthîîtwe na ngoora kana rûûo kîbatîîrue kîthambua, na gîkeegua kîrî na mûgiro mwanka ûgoro bwa ntugû înu. 18 Rîra muntû mûrûme amaama na mûka na muntû mûrûme eetûûra mbeû, bo barî baîrî babatîîrue bathamba na bakeegua barî na mûgiro mwanka ûgoro bwa ntugû înu.
19 “ ‘Rîra mûka akwona nyambura akeegua arî na mûgiro kagiita ga ntugû mûgwanja. Muntû ûra akamûtongithia akeegua arî na mûgiro mwanka ûgoro bwa ntugû înu. 20 Gîntû kîonthe kîra agaakarîra kana amaamîre kagiita gaku gaake ka nyambura gîkaagwatwa i mûgiro. 21 Muntû ûra agaatongithia ûrîrî bwake abatîîrue abûûra nguo ciake na athamba na rûûyî na akeegua arî na mûgiro mwanka ûgoro bwa ntugû înu. 22 Muntû woora agaatongithia gîntû kîonthe kîra mûka ûyu akarîrîîte abatîîrue abûûra nguo na athamba na akeegua arî na mûgiro mwanka ûgoro bwa ntugû înu. 23 Wîgue n'ûrîrî kana i gîntû kinya kîrîkû kîra akarîrîîte, rîra muntû agaagîtongithia, muntû ûyu akaagwatwa i mûgiro na akare nau mwanka ûgoro bwa ntugû înu. 24 Muntû mûrûme akaaya kûmaama na mûka rîra akwona nyambura na agatongithua i nthakame înu ya nyambura muntû ûyu akeegua arî na mûgiro kagiita ga ntugû mûgwanja, na ûrîrî bûra akaamaamîra bûkeegua bûrî na mûgiro.
25 “ ‘Ûkeegua mûka akeegua akîrua nthakame kagiita ga ntugû inyingî kagiita kara gatarî gaake ka nyambura, kana akoona nyambura agakûrûkîîria ntugû ciake cia kîîwîthîre, mûka ûyu akeegua arî na mûgiro kagiita gaku konthe akeegua akîrua nthakame wa ta bûra kwîgagua gûkari kagiita kara akwona nyambura. 26 Ûrîrî bûra akaamaama na gîntû kinya kîrîkû kîra mûka ûyu agaakarîra kagiitaani gaku gîkaagea mûgiro, wa ta bûra gûkarîkaga rîra akwona nyambura. 27 Muntû kinya ûrîkû ûra agaatongithia into bibu arî na mûgiro, n'abatîîrue abûûra nguo ciake na athamba, na akeegua arî na mûgiro mwanka ûgoro bwa ntugû înu. 28 Nthakame yatiga kûrua ageeteera ntugû mûgwanja na akeegua akûthira mûgiro. 29 Ntugû ya inyanya akairîra mûthînjîri wa Ngai macea maîrî ma kîthaka kana maîrî ma mûciî matarî makûrû mûno mwîrîgaani wa Îrema rîa Kûrîîkanaga. 30 Mûthînjîri wa Ngai ûyu akaaruta îcea rîmwe rîrî rîa kîgongwana n'ûntû bwa wîyia na rîra rîngî rîrî rîa kîgongwana kîra kîbîîthagua. Na gûkûrûkîîra njîra înu mûthînjîri wa Ngai agaatûma mûka ûyu eegua atarî na mûgiro mbere ya Mwathani.
31 “ ‘Nwa mwanka bûtûme antû ba Isiraeri batigane na mantû mara maûmba kûbagwatithia mûgiro giria bakaagwatithia Îrema rîa Kûrîîkanaga rîra rîrî gatîgatî ga kambî mûgiro baaya gûkua.’ ”