Arawi 14

Kûtherua mûgiro wa mîrimo ya rûûo îra îteeyanagîîrwa

1 Mwathani eera Musa atarî, 2 “Mawatho mama i mo makûthingatagwa n'ûntû bwa kûtherua kwa muntû ûra ooreetue mûrimo ûûmba gûteeyanîîrwa wa rûûo. Akairwa kîrî mûthînjîri wa Ngai. 3 N'we mûthînjîri wa Ngai akaumagara ome ya kambî akamûcûnkûûnîre noogo. Wegua mûrimo ûyu ûrî mworu, 4 mûthînjîri wa Ngai akaathana atî tûnyoni twîrî tûtarî mûgiro twirwe kîrî we, amwe na kamûtî ka mûthithinda, na karigi gaatuune na kathîgî ga *ucopo n'ûntû bwa kûtherua kwa muntû ûyu mwayie. 5 Rîru mûthînjîri wa Ngai akaathana auge kanyoni kamwe kaûragîrwe îgûrû ya nyûngû îrî na rûûyî rûûtheru. 6 Acooke athûkie kanyoni kara karî mwoyo, na kamûtî kara ka mûthithinda, na karigi kara gatuune na kathîgî ga ucopo atombeke bionthe nthakameeni ya kanyoni kara kaang'eerereetwe îgûrû ya nyûngû îrî na rûûyî rûûtheru. 7 Rîru amincamincîrie muntû ûyu ûkûtherua kuumania na mûrimo ûyu wa rûûo ûteeyanagîîrwa nthakame înu maita mûgwanja na aarîîkia kûrûtha ûgu, auge muntû ûyu rîru n'ûmûtheru. Akaarekeeria kanyoni kara karî mwoyo kabuurûûke kathi naagu kîthakaani. 8 Muntû ûyu nwe akaabûûra nguo ciake, eenje ntundu ciake cionthe na athambe. Aarîîkia kûrûtha ûgu akeegua arî ûmûtheru na nwa athûngîre ndeeni ya kambî îndî atibatîîrue athûngîra îremaani rîake kagiita ga ntugû mûgwanja. 9 Ntugû ya mûgwanja yaakinya akeenja kîongo gîake, kîreru gîake, nkobe cia meetho na ntundu ira ingî cionthe irî mwîrî wake kaîrî. Acooke athaambe na rûûyî na abûûre nguo ciake na rîru ûkeegua atarî na mûgiro.

10 “N'yo ntugû ya inyanya yaakinya muntû ûyu akaareeta tûtûrûme twîrî na gaatî kamwe tunthe tûtarî nwa koothûûku, na gacuncî ka ithatû ka ndebe ya mûtu ûmwinyu mûno ûkimanîîtue na maguta, na gacuncî ka ithatû ka rita ya maguta ma mîceituuni. 11 Mûthînjîri wa Ngai akaathûkia biewa bibi abiire mwîrîgaani wa Îrema rîa Kûrîîkanaga. 12 Nyuma ya ûgu mûthînjîri wa Ngai akaathûkia gatûrûme kamwe amwe na gacuncî kara ka ithatû ka rita ya maguta abirute kîrî kîgongwana n'ûntû bwa îbîtia. Akabiruta birî kîgongwana gîa gûûkîîrua mbere ya Mwathani. 13 Akaathînjîra gatûrûme gaku bantû ara nyamû cia igongwana n'ûntû bwa meeyia na igongwana bira bibîîthagua ithînjagîrwa bantû ara atheru. Nyama cia kîgongwana n'ûntû bwa îbîtia, wa ta cia kîgongwana n'ûntû bwa wîyia, i cia mûthînjîri wa Ngai na i niintheru mûno. 14 Mûthînjîri wa Ngai akaathûkia nthakame îmwe ya kîgongwana n'ûntû bwa îbîtia aake gûtû kwa ûrîo kwa muntû ûyu ûkûtherua, kîara kîra kînene kîa njara yake ya ûrîo na kîara kîra kînene gîa kûgûrû wake kwa ûrîo. 15 Acooke eekîre maguta mamwe rwîîni rwake rwa njara ya kîmotho, 16 atombeke kaara gaake ka njara ya ûrîo magutaani mamu marî rwîîni amincamince maguta mamu na kîara mbere ya Mwathani maita mûgwanja. 17 Akaathûkia maguta mamwe ma mamu marî rwîîni aake muntû ûyu ûkûtherua maguta mamu, gûtû gwake kwa ûrîo, kîara kîra kînene kîa njara yake ya ûrîo, na kîara kîra kînene gîa kûgûrû gwake kwa ûrîo îgûrû ya nthakame ya kîgongwana n'ûntû bwa îbîtia. 18 Mûthînjîri wa Ngai agaacooka eetûûrîrie muntû ûyu ûkûtherua maguta mara makeegua matigeere rwîîni rwake kîongo. Ûgu i bu mûthînjîri wa Ngai akaathambia muntû ûyu meeyia maake mbere ya Mwathani.

19 “Rîru mûthînjîri wa Ngai akaaruta gaatî kara ga kîgongwana n'ûntû bwa wîyia na athambie muntû ûyu meeyia maake. Nyuma ya ûgu, akaathînja gatûrûme kara ga kîgongwana kîra kîbîîthagua 20 akîrutanîrie na kîgongwana kîa irio kîthînjîrooni. Gûkûrûkîîra njîra înu mûthînjîri wa Ngai akaathambia meeyia ma muntû ûyu nwe muntû ûyu atiîgua arî na mûgiro.

21 “Îndî ûkeegua arî nkea bûra ataûmba kwona into bibu bikwendekana bionthe, akaareeta n'ûntû bwa kûtherua wake gatûrûme kamwe karî ga kîgongwana n'ûntû bwa îbîtia, kîgongwana gîa gûûkîîrua mbere ya Mwathani gîa kûthi na mûthînjîri wa Ngai. Kinya akaareeta gacuncî ga îkûmi ka ndebe ya mûtu ûmwinyu mûno ûkimanîîtue na maguta ma mîceituuni na gacuncî ka ithatû ka rita ya maguta. 22 Akaareeta macea maîrî ma kîthaka kana maîrî ma mûciî matarî makûrû mûno, kûringana na bûra akaûmba, rîmwe rîrî rîa kîgongwana n'ûntû bwa wîyia na rîru rîngî rîrî rîa kîgongwana kîra kîbîîthagua.

23 “Ntugû ya inyanya ya kûtherua wake akaareeta into bibu kîrî mûthînjîri wa Ngai agu mwîrîgaani wa Îrema rîa Kûrîîkanaga, mbere ya Mwathani. 24 Mûthînjîri wa Ngai akaathûkia gatûrûme ga kîgongwana n'ûntû bwa îbîtia na maguta abirute birî biewa bia mwanya kîrî Mwathani. 25 Rîru akaathînja gatûrûme gaku karî kîgongwana n'ûntû bwa îbîtia na aake muntû ûyu ûkûtherua nthakame ya gatûrûme gaku gûtû gwake kwa ûrîo kwa muntû ûyu ûkûtherua, kîara kîra kînene kîa njara yake ya ûrîo na kîara kîra kînene gîa kûgûrû gwake kwa ûrîo. 26 Mûthînjîri wa Ngai ageekîra maguta mamwe rwîîni rwa njara yake ya kîmotho, 27 atombeke kîara kîa njara yake ya ûrîo magutaani mamu amamincamince na kîara maita mûgwanja mbere ya Mwathani. 28 Agaaka maguta mamu icuncîîni bia mwîrî wa bira aakire nthakame îra ya kîgongwana n'ûntû bwa îbîtia. Naku gûntû gûku i: gûtû kwa ûrîo kwa muntû ûyu ûkûtherua, kîara kîra kînene kîa njara yake ya ûrîo na kîara kîra kînene gîa kûgûrû wake kwa ûrîo. 29 Nwe mûthînjîri wa Ngai agaacooka eetûûrîrie muntû ûyu ûkûthambua meeyia maake maguta mara makeegua matigeere rwîîni rwake kîongo. Ûgu i bu mûthînjîri wa Ngai akaathambia muntû ûyu meeyia maake mbere ya Mwathani. 30 Rîru mûthînjîri wa Ngai akaaruta macea mara maîrî ma kîthaka kana ma mûciî kûringana na bûra aûmbîîte kûreeta. 31 Rîmwe rîrî rîa kîgongwana n'ûntû bwa wîyia, na rîra rîngî rîrî rîa kîgongwana kîra kîbîîthagua amwe na kîgongwana kîa irio. Ûgu i bu mûthînjîri wa Ngai akaarûtha n'ûntû bwa kûtheria muntû ûyu mbere ya Mwathani.” 32 Bûbu i bu watho bwa muntû ûra arî na mûrimo ûûmba gûteeyanîîrwa wa rûûo îndî ataûmba kwona into bia kîîwîthîre bira biendekanaga muntû akîtherua.

Kûtherua mûgiro wa muurû

33 Mwathani eera Musa na Arûni atarî, 34 “Rîra bûkaathûngîra nthîgûrû ya Kanaani îra nkûbûnenkera îtwîka yenu, naani ntûme muurû ndeeni ya nyomba ira bûgaakaraga nthîgûrû înu, 35 mwene nyomba înu abatîîrue athi kîrî mûthînjîri wa Ngai amwîre atarî, ‘Nkwona gîntû gîkari ta muurû ndeeni ya nyomba yakwa.’ 36 Mûthînjîri wa Ngai akauga into bionthe birî ndeeni ya nyomba înu birutwe mbere athi gûcûnkûûna muurû ûyu, n'ûntû bikarega kûrutwa, into bibu bionthe bikeegua birî na mûgiro. Rîru akaathûngîra nyomba înu 37 acûnkûûne muurû ûyu. Wegua kûrî na maranga manyuîte rûthingooni marî na ûtuune kana rangi îkûreeta ngiriini, 38 akauma nyomba înu na amiinge kagiita ga ntugû mûgwanja. 39 Ntugû ya mûgwanja agaacooka na amîcûnkûûne kaîrî. Ûkeegua muurû ûtaambîîte 40 akaathana maiga mara marî na muurû marutwe rûthingooni mathi magateegwe bantû arî mûgiro ome ya taûni. 41 Nyuma ya ûgu abatîîrue ang'ara nthingo cionthe bwega na athi wîtûûra rûko rûru rwa nthingo bantû arî mûgiro ome ya taûni. 42 Rîru maiga mangî meekîrwe marumuuni ma maiga mara marutirwe rûthingooni na rûthingo rûkaandwe kaîrî.

43 “Ûkeegua muurû ûkaumîra kaîrî ndeeni ya nyomba înu nyuma ya maiga mara marî na muurû kûrutwa na kûng'ara rûthingo na gûkanda rûthingo kaîrî, 44 mûthînjîri wa Ngai akaathi kûraitha nyomba înu kaîrî. Na wegua muurû ûtaambîîte nyomba înu îrî muurû ûmûthûûku na îrî na mûgiro. 45 Nwa mwanka yomboranue na maiga maayo na mîtî yaayo wa rûko rwa kuuma nthingooni ciayo, bibu bionthe bikamatwe birutwe ome ya taûni biirwe bantû arî mûgiro. 46 Muntû kinya ûrîkû ûra akaathûngîra nyomba înu rîra îkeegua îrî mbinge akaagwatwa i mûgiro na eegue arî na mûgiro mwanka ûgoro bwa ntugû înu. 47 Muntû kinya ûrîkû ûra akaamaama kana arîîre irio nyomba înu nwa mwanka athambie nguo ciake.

48 “Na ûkeegua rîra mûthînjîri wa Ngai akaaya kûraitha, akoona muurû ûtirataamba nthingooni cia nyomba ikûng'arwa na ciakandwa kaîrî, akaatheria nyomba înu n'ûntû muurû n'ûmûthiru. 49 Kaingo atheria nyomba înu akaathûkia tûnyoni twîrî tûrî mwoyo, karigi gaatuune, kamûtî ka mûthithinda na kathîgî ga ucopo. 50 Akaathînjîra kanyoni gaku kamwe îgûrû ya nyûngû îrî na rûûyî rûûtheru. 51 Rîru athûkie kamûtî kara ka mûthithinda, kathîgî kara ga ucopo, karigi kara gatuune na kanyoni kara karî mwoyo, rîru atombeke into bibu bionthe nthakameeni ya kanyoni kara kang'eereerwe îgûrû ya nyûngû îrî na rûûyî rûûtheru. Acooke amincamincîrie nyomba înu nthakame înu ya kanyoni maita mûgwanja. 52 Gûkûrûkîîra njîra îno akaatheria nyomba na nthakame ya kanyoni kara kaûragirwe, na rûûyî rûûtheru, na kanyoni kara karî mwoyo na kamûtî ka mûthithinda, na kathîgî ga ucopo, na karûrigi gatuune. 53 Nyuma ya ûgu akaarekeeria kanyoni kara karî mwoyo kabuurûûke ome ya taûni kathi naagu kîthakaani. Ûgu i bu akaarûtha n'ûntû bwa kûtheria nyomba înu. Na îkeegua îtarî na mûgiro.”

54 Mamu i mawatho ma kûthingatîîra n'ûntû bwa mîrimo ya rûûo îra yûûmba gûteeyanîîrwa ta weere, 55 muurû ûrî nguoni kana nyomba, 56 na moote, miimba kana maremeethiû. 57 Mawatho mamu i ma gûteethia kûmenya rîra gîntû kîrî na mûgiro na rîra gîtarî na mûgiro.

Mamu i mo mawatho meegiî mîrimo ya rûûo îra yûûmba gûteeyanîîrwa na muurû.