Arawi 13

Mawatho îgûrû rîa mîrimo ya rûûo

1 Mwathani aaria na Musa na Arûni abeera ata rî, 2 “Ûkeegua muntû kinya ûrîkû arî na yoote kana weere, kana îtooyo rûûoni rwa mwîrî wake, ûntû bûgûkara taka akûgwatwa i mûrimo wa rûûo ûmûthûûku ûûmba gûteeyanîîrwa muntû ûyu abatîîrue kwirwa kwa Arûni mûthînjîri wa Ngai kana nthaka ciake bara athînjîri ba Ngai. 3 Nwe mûthînjîri wa Ngai agacûnkûûna bantû agu a rûûo arî na thîîna, na ûkaaya kwîgua ntundu cia rûûo bantû agu icigarûkîîte ciatuîka injerû na thîîna înu îrî rûûoni nînywîte mwanka nyamaani, muntû ûyu arî na mûrimo wa rûûo ûmûthûûku ûûmba gûteeyanîîrwa, nwe mûthînjîri wa Ngai agaatua muntû ûyu arî na mûgiro. 4 Îndî ûkaaya kwîgua thîîna îra îrî rûûoni îtinywîte nyamaani na ntundu cia rûûo itigarûkîîte ituîka injerû, mûthînjîri wa Ngai agaatuîra muntû ûyu gûkara gataaria na antû bara bangî kagiita ga ntugû mûgwanja. 5 Mûthînjîri wa Ngai agacûnkûûna muntû ûyu ntugû ya mûgwanja, na kûringana na we ûkaaya kwîgua thîîna înu ya rûûo îkari wa ta bûra yaakari na îtikûthi na mbere, akamûtuîra gûkara gataaria na antû bara bangî ntugû cingî mûgwanja. 6 Mûthînjîri wa Ngai akamûcûnkûûna kaîrî ntugû ya mûgwanja na ûkaaya kwîgua thîîna înu n'îkûthiranga na îtikwimba, akauga muntû ûyu atirî na mûgiro, n'ûntû gaku arî nako i karemeethiû. Muntû ûyu rîru nwaka akaabûûra nguo ciake na mûgiro ûra akûrî nau ûthire. 7 Îndî thîîna înu îkaaya kûnenea nyuma ya mûthînjîri wa Ngai akuuga atirî na mûgiro, muntû ûyu nabatîîrue kûthi kîrî mûthînjîri wa Ngai kaîrî. 8 Mûthînjîri wa Ngai akamûcûnkûûna kaîrî na wegua thîîna înu îneneete, akauga muntû ûyu arî na mûgiro n'ûntû ûyu i mûrimo wa rûûo ûmûthûûku ûûmba gûteeyanîîrwa.

9 “Muntû kinya ûrîkû ûra akeegua arî na mûrimo wa rûûo ûmûthûûku ûûmba gûteeyanîîrwa akaathi kîrî mûthînjîri wa Ngai, 10 nwe mûthînjîri wa Ngai amûcûnkûûne. Ûkeegua rûûo rwake rûrî na kîremeethiû kîîyerû na guaya îtuîkîîte înjerû na gîgûtumûka kîronda, 11 ûyu i mûrimo wa rûûo wa ntwîre. Mûthînjîri wa Ngai akauga muntû ûyu arî na mûgiro. Gûtirî gîtûmi gîa kwaiga muntû ûyu gataaria na bara bangî n'ûntû gûtirî na nkanja muntû ûyu arî na mûgiro. 12 Na ata rî, thîîna înu ya rûûo îkaaya gûtaamba îgakunîka mwîrî unthe kuuma rwayo mwanka kîongo, 13 mûthînjîri wa Ngai agacûnkûûna muntû ûyu kaîrî. Akaaya kwona waabu mûrimo ûyu n'ûtambîîte wakunîka mwîrî gunthe, akauga muntû ûyu atirî na mûgiro. Ûkeegua mwîrî gunthe nûgarûkîîte watuîka ûmûyerû muntû ûyu atirî na mûgiro. 14 Îndî akaaya kûgea na kîronda agaatuîka arî na mûgiro. 15 Mûthînjîri wa Ngai akamûcûnkûûna kaîrî na akaaya kwona kîronda kîng'eenyeere, akauga muntû ûyu arî na mûgiro. Kîronda kîng'eenyeere kîrîonania arî na mûrimo ûmûthûûku wa rûûo na kwoogu arî na mûgiro. 16 Îndî kîronda gîkaaya kwora na kîrema gîgatuîka kîîyerû kaîrî muntû ûyu akaathi kîrî mûthînjîri, 17 nwe mûthînjîri amûcûnkûûne kaîrî. Wegua kîronda kîoreete na kîrema kîayerûa, muntû ûyu n'ûmûtheru na mûthînjîri akauga atirî na mûgiro.

18 “Muntû kinya ûrîkû akaaya kuuma yoote rûûoni rwa mwîrî wake na rîkoora 19 na nyumaani bantû agu yoote rîarî kûgîe na mwimba ûmûyerû ûrî tûranga tuungeenie ûyerû na ûtuune, muntû ûyu nabatîîrue kûthi akeebonania kîrî mûthînjîri wa Ngai. 20 Mûthînjîri wa Ngai agacûnkûûna tûranga tûtu, na wegua tûranga tûtu tûnyuîte nyamaani na guaya înu itûthiûrûkîrîîte îgarûkîîte yatuîka înjerû, akauga muntû ûyu arî na mûgiro n'ûntû i mûrimo ûmûthûûku wa rûûo waambîîrîîtie agu yoote rîarî. 21 Îndî mûthînjîri wa Ngai akaaya gûcûnkûûna akoona atî guaya îra irî bantû agu îtigarûkîîte îtuîka înjerû na tûranga tûtu tûtinyuîte nyamaani na titûcûnûku mûthînjîri wa Ngai agaatuîra muntû ûyu gûkara gataaria na antû bara bangî kagiita ga ntugû mûgwanja. 22 Tûranga tûtu tûkaaya kûreenda mûthînjîri wa Ngai akauga muntû ûyu arî na mûgiro n'ûntû arî na mûrimo. 23 Îndî thîîna înu ya rûûo îgatuîka îtikwimba kana îreenda na i kîrema kîa yoote gîtigeere gîonka, mûthînjîri wa Ngai akauga muntû ûyu atirî na mûgiro.

24 “Na muntû akaaya kwîgua arî na îbîîra, na îbîîra rîru rîgatuîka rîîyerû kana rîkuungania ûyerû na ûtuune, 25 muntû ûyu agaacûnkûûnwa i mûthînjîri wa Ngai. Ûkaaya kwîgua guaya înu îrî îbîîraani n'îgarûkîîte rangi yatuîka înjerû na îbîîra rîru irînyuîte nyamaani, ûyu i mûrimo ûmûthûûku wa rûûo waanjîîrîîtie agu îbîîraani. Na mûthînjîri wa Ngai akauga muntû ûyu arî na mûgiro. Ûyu i mûrimo ûmûthûûku. 26 Îndî mûthînjîri agacûnkûûna akoona atî guaya îra îrî îbîîraani îtigarûkîîte îtuîka înjerû na îbîîra rîtinyuîte nyamaani na i rîkwora, mûthînjîri wa Ngai agaatwîra muntû ûyu gûkara gataaria na antû bara bangî îgiita rîa ntugû mûgwanja. 27 Ntugû ya mûgwanja mûthînjîri wa Ngai agacûnkûûna muntû ûyu, na wegua rîkîreendaga mûthînjîri wa Ngai akauga muntû ûyu arî na mûgiro. Ûyu i mûrimo ûmûthûûku. 28 Îndî bantû agu agakara akari wa bûra arakari gûgatuîka thîîna îtikuimba kana îreenda na bantû agu gaakwora, ûyu i mwimba wa kîrema kîa îbîîra. Mûthînjîri wa Ngai akauga muntû ûyu atirî na mûgiro n'ûntû kîra arî nakîo i kîrema kîa îbîîra.

29 “Rîra mûka kana muntû mûrûme arî na kîremeethiû kîongo kana kîreruuni, 30 mûthînjîri wa Ngai agaacûnkûûna kîremeethiû gîku. Ûkeegua kîremeethiû kînyuîte nyamaani na ntundu ira irî kîrî kîo irî cia rangi ya yerû na i rûmbuu, ûyu i mûrimo ûmûthûûku wa rûûo, na akauga muntû ûyu arî na mûgiro. 31 Îndî ûkeegua mûthînjîri wa Ngai acûnkûûna kîremeethiû gîku, wîgue gîtikwonekana kînyuîte nyamaani, îndî ntundu ira irî oogo ti njirû, mûthînjîri wa Ngai agaatuîra muntû ûyu gûkara gataaria na antû bara bangî kagiita ga ntugû mûgwanja. 32 Mûthînjîri wa Ngai agacûnkûûna kîremeethiû gîku kaîrî ntugû ya mûgwanja, na ûkaaya kwîgua kîremeethiû gîku gîtiîgua kîreendeete na gîtirî na ntundu i mbîru na gîtinyuîte nyamaani, 33 muntû ûyu akeenja kîongo gîake tiga bantû agu akubî na kîremeethiû. Rîru mûthînjîri wa Ngai agatuîra muntû ûyu gûkara gataaria na antû bara bangî kagiita ga ntugû mûgwanja. 34 Ntugû ya mûgwanja mûthînjîri wa Ngai agacûnkûûna kîremeethiû gîku na ûkaaya kwîgua kîremeethiû gîku gîtireendeete na gîtinyuîte nyamaani, akauga muntû ûyu atirî na mûgiro. Muntû ûyu akaabûûra nguo ciake na atuîke ûmûtheru. 35 Îndî kîremeethiû gîkaaya kûreenda nyuma muntû ûyu kwîrwa atirî na mûgiro, 36 mûthînjîri wa Ngai agagîcûnkûûna kaîrî. Ûkeegua kîremeethiû gîku kîreendeete, wana wegua gûtarî na ntundu cia rangi ya yerû, muntû ûyu arî na mûgiro. 37 Îndî ûkeegua kûringana na mûthînjîri wa Ngai kîremeethiû gîku gîtirendeete na ntundu injirû icikuuma oogo ûgu i ta kuuga kîremeethiû i gîkîoru na mûthînjîri wa Ngai akauga muntû ûyu atirî na mûgiro.

38 “Rîra muntû mûrûme kana mûka aagea na tûranga tûûyerû tûûcûnûku mwîrî wake, 39 abatîîrue acûnkûûnwa tu i mûthînjîri wa Ngai. Na ûkeegua tûranga tûtû ti tûyerû gaku i karemeethiû gatarî na thîîna gakuuma na muntû ûyu atirî na mûgiro.

40 “Ntundu cia muntû ikaaya kûthira kîongo înu i mpanda na atirî na mûgiro. 41 Ûkeegua ntundu ciake ithirîîte kuuma bwa mbere, înu i mpanda na muntû ûyu atirî na mûgiro. 42 Îndî kîremeethiû kiungeenie ûtuune na ûyerû gîkaumîîra mpandaani înu, nwa wîgue ûyu i mûrimo ûmûthûûku wa rûûo ûkwanjîîria mpandaani. 43 Mûthînjîri wa Ngai agagîcûnkûûna na ûkaaya kwîgua kîremeethiû gîku kiungeenie ûyerû na ûtuune, 44 mûthînjîri wa Ngai akauga muntû ûyu arî na mûgiro n'ûntû bwa mûrimo ûmûthûûku wa rûûo ûra ûrî kîongo gîake.

45 “Muntû ûra arî na mûrimo ûmûthûûku ûûmba gûteeyanîîrwa abatîîrue eekîra nguo întembûkaangu, atigaacanûre ntundu, akunîkîre mîromo yake neegûrû na athi akiugagîîria, ‘Mûgiro, mûgiro!’ 46 Akeegua arî na mûgiro kagiitaani gaku konthe akeegua arî na mûrimo ûyu na agaatûûraga ome ya kambî gataaria na antû bara bangî.

Mawatho meegiî muurû

47 “Ûkaaya kwîgua nguo îrî na muurû, wîgue îrî nguo ya guaya ya ng'ondu kana ya *gatani, 48 kana ûkeegua ûrî gîtaambaani gîa gatani kana kîa guaya kana ûrî rûûoni kana gîntûûni kîrûthîîtwe na rûûo, 49 ûkaaya kwîgua muurû ûyu nwa rangi ya ngiriini kana întuune, înu i thîîna yûûmba gûtaamba na nwa mwanka gîntû gîku kiirîrwe mûthînjîri wa Ngai. 50 Mûthînjîri wa Ngai agacûnkûûna muurû ûyu na akaiga gîntû gîku bantû aakîo kîrî gîonka kagiita ga ntugû mûgwanja. 51 Agaucûnkûûna kaîrî ntugû ya mûgwanja na wegua thîîna înu îkînyagaaraga nguoni înu, rûûoni kana ngooraani înu, gîntû gîku kîrî na mûgiro. 52 Mûthînjîri wa Ngai akaabîîthia nguo kana ngoora kana into bira birûthîîtwe na rûûo, bira birî na muurû. N'ûntû birî na thîîna îkûnyagaara, bibatîîrue bibîîthua na mwanki.

53 “Îndî mûthînjîri wa Ngai acûnkûûna gîntû gîku akaaya kwona thîîna înu îtiranyagaara nguoni kana ngooraani kana intooni bira birûthîîtwe na rûûo, 54 akaathana gîntû gîku kîthambue na kîaigwe bantû akîo gîonka kagiita ga ntugû ingî mûgwanja. 55 Rîru mûthînjîri agagîcûnkûûna kaîrî kîarîîkia kûbûûrwa. Na wegua muurû ûyu ûtiragarûka rangi, wana wegua ûtanyagaarîîte, gîntû gîku kîrî na mûgiro na nwa mwanka kîbîîthue na mwanki, wîgue muurû ûyu ûrî mbarî ya ndeeni kana ya nja ya gîntû gîku. 56 Îndî ûkeegua muurû ûyu n'ûkûngûkîîte rangi mûthînjîri wa Ngai agaatembûra gacîgîîria gaku karî na muurû ka nguo kana rûûo rûru. 57 Îndî ûkeegua nyuma ya aathaambia gîntû gîku muurû ûkaumbûka kaîrî, na wîgue nûgûtamba, nguoni kana ngoorani kana intooni bira birûthîîtwe na rûûo, gîntû gîku kîbatîîrue kîbîîthua na mwanki. 58 Na ûkeegua gîntû gîku kîathaambua kîranga kîra kîa muurû gîkaathira, nguo kana ngoora kana into bira birûthîîtwe na rûûo, gîkaathambua kaîrî na gîkeegua gîtarî na mûgiro.”

59 Mama i mo mawatho meegiî muurû ûrî nguoni, wegua îrî ya guaya kana ya *gatani, kana ûrî gîtaambaani gîa gatani kana kîa guaya, kana ûrî gîntûûni kîa rûûo. Mawatho mama i mo magaatûmagîrwa gûtua wegua gîntû kîrî na mûgiro kana gîtirî na mûgiro.