Nyambura cia Kûthera kwa mûka aarîîkia kûgea na mwana
12
1 Mwathani eera Musa, 2 “Aria na antû ba Isiraeri ûbeere, ‘Mwekûrû aagîa na kaana ga kaîyî akeegua arî na mûgiro kagiita ga ntugû mûgwanja, wa ta bûra eegagua arî na mûgiro nyuma ya kwona nyambura. 3 Ntugû ya inyanya kaîyî gaku kabatîîrue gataanwa. 4 Nyuma ya ûgu mwekûrû ûyu ûgaciere agaakara ntugû ingî mîrongo îthatû na ithatû karî kagiita gaake ga kûtherua kuumania na nthakame îra yaaruire kuuma kîrî we. Îgiitaani rîru atibatîîrue atonga gîntû nwa kîrîkû kîathûre kana athûngîra Îremaani rîa Kûrîîkanaga mwanka rîra kûtherua gwake gûkaarîîka 5 Mwekûrû aagîa na kaana ga kaarî akeegagua arî na mûgiro kagiita ga ntugû îkûmi na inya, wa ta bûra eegagua arî na mûgiro nyuma ya kwona nyambura. Nyuma ya ûgu mwekûrû ûyu agaakara ntugû ingî mîrongo îthanthatû na ithanthatû karî kagiita gaake ga kûtherua kuumania na nthakame îra yaaruire kuuma kîrî we.6 “ ‘Îgiita rîa kûtherua wake rîarîîkia, wîgue i kaana ga kaîyî kana i ga kaarî agîîte nako, akairîra mûthînjîri wa Ngai, mwîrîgaani wa Îrema rîa Kûrîîkanaga gatûrûme ka mwanka ûmwe karî kîgongwana kîra kîbîîthagua na îcea rîa mûciî kana rîa kîthaka rîrî kîgongwana n'ûntû bwa wîyia. 7 Mûthînjîri wa Ngai ûyu akaaruta kîgongwana mbere ya Mwathani n'ûntû bwa kûthambia meeyia ma mwekûrû ûyu na mûgiro wake ûkaathira kuumania na nthakame îra yaaruire kuuma kîr'we. Mama i mo mawatho mara mabatîîrue kûthingatîîrwa i mwekûrû nyuma ya kûgîa na mwana.
8 “ ‘Na ûkaaya kwîgua mwekûrû ationa ntûrûme nwa areete macea mara ma mûciî maîrî kana ma kîthaka matarî makûrû mûno, rîmwe rîîgue rîrî kîgongwana kîra kîbîîthagua, na rîra rîngî rîrî kîgongwana n'ûntû bwa wîyia. N'we mûthînjîri wa Ngai akaaruta kîgongwana n'ûntû bwa kûthambia mwekûrû ûyu meeyia maake na mûgiro wake ûkaathira.’ ”