Nyamû ira irî mûgiro na ira itarî mûgiro
(Kûri 14:3-21)
11
1 Mwathani aaria na Musa na Arûni abeera, 2 “Ariani na antû ba Isiraeri bûbeere; ‘Nwa bûrîe nyamû kinya îrîkû ira îtûûraga nthîgûrû îmbûmo 3 îra îrî na ncûûga ingaanie na îra îcookagia mûthagumûrio. 4 Kûrî cio icookagia mûthagumûrio guunka îndî itirî na ncûûga ingaanie na ira ingî irî na ncûûga ingaanie îndî iticookagia mûthagumûrio. Bûtikaarîe nyamû ta inu. Nkamîîra, wana wegua nîcookagia mûthagumûrio, îtirî ncûûga i ngaûkanie, kwoogu înu i nyamû îrî na mûgiro na bûtikaamîrîe. 5 Înyore, wana wegua irîcookagia mûthagumûrio, rîtirî ncûûga i ngaûkanie, kwoogu înu i nyamû îrî mûgiro bûtikaamîrîe. 6 Kayûgû, wana wegua i gacookagia mûthagumûrio, gatirî ncûûga i ngaûkanie. Kwoogu înu i nyamû îrî mûgiro na bûtikaamîrîe. 7 Bûtikaarîe ngûrwe. I nyamû îrî mûgiro n'ûntû wana wegua îrî na ncûûga i ngaûkanie îticookagia mûthagumûrio. 8 Bûtikaarie nyamû ino kana bûtonga biimba biacio, n'ûntû i nyamû irî mûgiro kîrî biû.9 “ ‘Bûkaarîîyaga mîthemba yonthe ya nyamû cia rûûyî îra îrî na mathabu na magoko, 10 îndî nyamû cionthe ira itûûraga rûûyîîni itarî na mathabu na magoko itibatîîrue kûrîîgwa. 11 Bûtibatîîrue kûrîa nyamû ta inu kana bûtonga biimba biacio. Irî mûgiro kîrî biû. 12 Bûtikaarîe nyamû nwa îrîkû îra îtûûraga rûûyîîni îra îtarî na mathabu na magoko.
13 “ ‘Bûtibatîîrue kûrîa mîthemba îno ya nyoni n'ûntû irî mûgiro kîrî biû: nderi, ndiiû, nkoru, 14 mpûngû, njîgî mwanya mwanya, 15 na mîthemba yonthe ya nkûngûrû, 16 nyaga, karangamaria, ntûga, 17 nthuntuguru, kagondu ka rûûyî na ntuundu, 18 nkuru, ntumbûra mûrathe, 19 ntûnda rûkiingo, mpûng'au, nkune na kîreere.a
20 “ ‘Tûnyamû tunthe twa magûrû mana na tûbuurûkaga tûrî mûgiro kîrî biû, 21 îndî tûra tûrî na magûrû maingî maaraaya na mathabu na tûtûûbatûûbaga tûtirî mûgiro. 22 Nwa bûrîe mîthemba yonthe ya mpandi, ya nkîroota na ya ngige. 23 Îndî tûnyamû tûtu tûngî tunthe tûra tûrî mathabu na tûrî magûrû mana, tûtu tunthe tûrî mûgiro kîrî biû. 24 Muntû kinya ûrîkû ûra agaatonga kiimba gîa tûnyamû tûtu akeegua arî na mûgiro mwanka ûgoro bwa ntugû inu. 25 Muntû ûra ûgaatonga biimba bia tûnyamû tûtu akeegua arî na mûgiro na nwa mwanka abûûre nguo ciake na akeegua arî na mûgiro mwanka ûgoro bwa ntugû înu.
26 “ ‘Nyamû yonthe îra îrî na ncûûga îtarî ngaûkanie kana ira itacookagia mûthagumûrio irî mûgiro, na muntû ûra agaatonga biimba biacio akaagwatwa i mûgiro. 27 Kûrî nyamû cionthe ira ithiiyaga na magûrû mana, ira cionthe irî na mathu irî mûgiro kîrî biû, na muntû ûra agaatonga biimba biacio akeegua arî na mûgiro mwanka ûgoro bwa ntugû înu. 28 Na muntû ûra agaakamata biimba biacio nwa mwanka abûûre nguo ciake akeegua arî na mûgiro mwanka ûgoro bwa ntugû înu. Nyamû inu irî mûgiro kîrî biû.
29 “ ‘Tûnyamû tûra twîkururagia na nthî tûrî mûgiro kîrî biû, i ta: Mpuko, mbea, îkîndû, 30 ntûra, ncaana, kîmbu, ncanga na ngûûndû na nkou. 31 Inu cionthe irî mûgiro kîrî biû. Muntû akaaya gûtonga biimba biacio akeegua arî na mûgiro mwanka ûgoro bwa ntugû înu. 32 Kiimba kîa nyamû cia mûthemba ûyu gîkagwîra gîntû, gîntû gîku gîkaagwatwa i mûgiro, wîgue kîrî gîntû kîa mûtî, nguo, rûûo kana nkunia, kîrî gîa kûruta ngûgî weera ûkeegua kîrutaga. Gîntû gîku kîbatîîrue kîruîkwa rûûyîîni na gîkeegua kîrî na mûgiro mwanka ûgoro bwa ntugû înu na gîkaathira mûgiro. 33 Kiimba kîa nyamû ta înu gîkaaya kûgwa ndeeni ya gîntû kîrûthîîtwe na yûûmba, bionthe bira birî gîntûûni gîku bikaagwatwa i mûgiro na gîntû gîku kîbatîîrue kîûragwa. 34 Irio biakûrîa bikaaya kûgîa rûûyî kuuma nyûngûûni ta înu bikaagîa mûgiro na gîntû gîa kûnyua kiumîîte nyûngûûni ta înu gîkeegua kîrî na mûgiro. 35 Gîntû kinya kîrîkû kîra kîgwîyagîrwa i kiimba kîa nyamû ta inu i kîgwatagwa i mûgiro, riiko kana nyûngû ta inu ibatîîrue ciomboranua. Irî na mûgiro na ûbatîîrue ûcithûkia irî na mûgiro. 36 Îndî kînyaka kana kîthima gîtigwatithagua mûgiro i biimba bia nyamû ta inu. Îndî gîntû gîgatongithia kiimba gîku i gîkaagwatwa i mûgiro. 37 Wana mbeû ya kwanda îkagwîrwa i biimba bia nyamû inu îtigwatwa i mûgiro. 38 Îndî ûkeegua mbeû înu îrî ndindaru i rûûyî, îkagwîrwa i kiimba kîa nyamû ta inu yagwatwa i mûgiro.
39 “ ‘Nyamû îmwe ya ira bwîtîgîîrîîtue kûrîîyaga îkaaya gûkua, muntû ûra agaatonga kiimba kîayo akeegua arî na mûgiro mwanka ûgoro bwa ntugû înu. 40 Muntû kinya ûrîkû ûra akaarîa nyama cia kiimba gîku nwa mwanka athambie nguo ciake na akeegua arî na mûgiro mwanka ûgoro bwa ntugû înu. Muntû kinya ûrîkû ûra agaakamata kiimba kîa nyamû inu nwa mwanka athambie nguo ciake na akeegua arî na mûgiro mwanka ûgoro bwa ntugû înu.
41 “ ‘Bûtibatîîrue kûrîa tûnyamû tûra tûkuraga na nthî tûrî na mûgiro kîrî biû, 42 wîgue gatwîkururagia, kana tûthiiyaga na magûrû mana kana wîgue tûrî na magûrû maingî tûrî na mûgiro kîrî biû. 43 Bûtikeegwatithie mûgiro na tûnyamû ta tûtu. Kana bûreka tûbûgwatithia mûgiro. 44 I niû Mwathani Ngai weenu, îguani bûrî baatheru n'ûntû Ndî ûmûtheru. Na bûtikeegwatithie mûgiro na tûnyamû tûtu twîkururagia na nthîgûrû. 45 I niû Mwathani ûra aabûrutire Miisiri kaingo ntuîka Ngai wenu, kwoogu îguani bûrî baatheru n'ûntû Ndî ûmûtheru.