Meeyia ma Nandabu na Abiu
10
1 Gwakarîkire ûûgû, nthaka cia Arûni, Nandabu na Abiu, baathûkia woora muntû kabakûri kara macoco maabîîthagîrua beekîra makara ma mwanki ku, baacooka beekîra macoco ku na baira mbere ya Mwathani. Îndî mwanki ûyû ûtaarî ûmûtheru n'ûntû Mwathani ataabaathîîte babua u. 2 Warîmwe Mwathani aatûma mwanki na mwanki ûyu wababîîthia baakuîra waagu mbere ya Mwathani. 3 Rîru Musa eera Arûni, “Ûûgû i bu Mwathani aaragîîria rîra augire, ‘Gûkûrûkîîra bara bonthe bantûmîkagîra nkoonania ûtheru bwakwa kîrî antû bonthe. Naani ngaatîîywa n'antû bonthe.’ ” Îndî Arûni we akira ki.4 Musa eeta Misaeri na Erisafani nthaka cia Usieri îthe mwanake wa Arûni abeera, “Ncûûni aaga bûkamate biimba bia nthaka cienu bûbirute biume îremaani rîra rîtheru bûbiire ome ya kambî.” 5 Kwoogu baathi baathûkia biimba bibu bithaîkanîîtue na nguo babiira ome ya kambî wa ta bûra Musa aathanîîte.
6 Musa eera Arûni na nthaka ciake Eriasari na Ithamarû ata rî, “Bûtikaarege gûcanûra ntundu kana bûtembûranga nguo cienu kwonania kîeba. Woona bwarûtha ûûgû, bûgaakua, na Mwathani akoonania mûthûûro kîrî antû bonthe ba Isiraeri. Îndî antû babu bangî beenu ba Isiraeri i beetîgîîrîîtue kûrîra n'ûntû bwa bara baakuire kuumania na mwanki ûra watûmirwe i Mwathani. 7 Bûtikaume aaga mwîrîgaani wa Îrema rîrî bûûya gûkua n'ûntû biigû bûrî baatûûrîrie maguta ma Mwathani.” Nabo baarûtha wa ta bûra Musa augire.
8 Mwathani eera Arûni ata rî, 9 “Gûtikaagîte ûmwe wacienu, woû kana nthaka ciaku, akaathûngîra Îremaani rîa Kûrîîkanaga anyuîte ncoobi kana gîntû kîonthe kîûmba gûtûma muntû atogoona, n'ûntû ûra akaarûtha ûgu n'agaakua. Bûbu i watho bwa kûthingatwa i nciarwa ciaku cionthe. 10 Nwa mwanka bûkûûrûkanagie kîra kîathûre gîa gûtûmîrwa Nyomba ya Ngai na kîra gîtarî kîathûre, kîra gîtarî mûgiro na kîra kîrî mûgiro. 11 Nwa mwanka bûrutane antû ba Isiraeri mawatho monthe mara ndaabanenkeere gûkûrûkîîra Musa.”
12 Musa eera Arûni na nthaka inu ciake ciîrî ciatigeere Eriasari na Ithamarû ata rî, “Thûkiani kîgongwana kîa irio kîra gîtigeere kuuma kîrî irio bira birutîrîîtwe Mwathani bûruge mîgaate îtarî miimbithie nabio. Na bûmîrîîre rûteere rwa kîthînjîro n'ûntû gîcuncî gîkî i kîîtheru mûno; 13 bûkîrîîre bantû aatheru n'ûntû rûrû i rûgai rwaku na nthaka ciaku kuumania na igongwana bia irio bira birutîrîîtwe Mwathani. Ûgu i bu Mwathani aambathire. 14 Îndî biû na aana beenu ba aarî na nthaka nwa bûrîe nyama cia kîbara na magûrû bira birutîîtwe birî kîgongwana gîa gûûkîîria kîrî Mwathani. Makûnenkagîrwa athînjîri ba Ngai. Nwa bûrîîre nyama inu bantû onthe atheru. Gîku i gîcuncî kîenu kuuma kîrî igongwana bia ngwatanîro bia antû ba Isiraeri. 15 Kûgûrû na kîbara bira bia kîgongwana gîa gûûkîîrua mbere ya Mwathani bireetanîrue amwe na mathuunya mara mabîîthagîrua Mwathani. Kûgûrû na kîbara biûkîîrue mbere ya Mwathani kîrî kîgongwana gîa gûûkîîrua. Rûru rûkeegagua rûrî rûgai rwenu biû na aana beenu wa ta bûra Mwathani aathanire.”
16 Rîra Musa aûriirie mantû ma mbûri ya kîgongwana n'ûntû bwa wîyia eethîra yarî îkûrutwa tene na yabîîthua yonthe! Akwîgua bûra gwakari aathûûrîra Eriasari na Ithamarû, nthaka ira cia Arûni ciatigeere, abaûria ata rî, 17 “I mbi îgiriirie bûrîîra kîgongwana n'ûntû bwa wîyia bantû ara atheru? I kîathûre na Mwathani aneenkanîrîîte kîo kîrî biû kaingo meeyia ma antû mathambua. 18 Na n'ûntû nthakame yakîo îtirareetwa ndeeni ya îrema rîra rîtheru, bûraayaga kûrîîra kîgongwana gîku bantû ara atheru ome ya Îrema rîa Kûrîîkanaga ta bûra ndaathanire.”
19 Arûni amûcookeria auga ata rî, “Antû ba Isiraeri ibarutire kîgongwana kîao n'ûntû bwa wîyia na baareeta kîgongwana kîao kîra kîbîîthagua, îndî wana gûkari ûgu mantû mama mathûûku makûmbûyîîra. Ûkeegua i ka ndîîre kîgongwana n'ûntû bwa wîyia îmunthî rî, Mwathani agîîtîgîra ûntû bûbu?” 20 Nwe Musa akwîgua ûgu aaganîrwa aagwatanîra nabo.