Arûni na nthaka ciake baambîîria ngûgî
9
1 Ntugû ya inyanya Musa eethîrania Arûni na nthaka ciake, na atongoria ba Isiraeri. 2 Eera Arûni ata rî “Thûkia ncamba ya kiumîri na ntûrûme îtarî nwa koothûûku ûcirute kîrî Mwathani, ncamba îrî ya kîgongwana n'ûntû bwa wîyia, ntûrûme n'yo îrî ya kîgongwana kîra kîbîîthagua. 3 Rîru wîre aana ba Isiraeri bareete nthenge îrî ya kîgongwana n'ûntû bwa wîyia, kayaû ka mwanka ûmwe na gatûrûme ka mwanka ûmwe, cionthe itarî nwa koothûûku irî cia kîgongwana kîra kîbîîthagua, 4 na ncamba na ntûrûme îtarî nwa koothûûku irî cia kîgongwana kîa ngwatanîro. Babatîîrue kûruta igongwana bibi amwe na kîgongwana kîa irio nakîo gîkeegua kîrî mûtu ûkimanîîtue na maguta. Nwa mwanka barûthe ûgu n'ûntû Mwathani akeebonania kîrî bo îmunthî.”5 Nabo baareeta into bionthe bira Musa abaathîîte bareete agu mbere ya Îrema rîa Kûrîîkanaga na antû bonthe beethîrana agu kûgonga Mwathani. 6 Musa auga ata rî, “Mwathani aathanîîte bûrûthe mantû mama monthe kaingo ûkumio bwake bwonekana kîrî biû.” 7 Acooka eera Arûni, “Îthi kîthînjîrooni ûrute kîgongwana n'ûntû bwa wîyia na kîgongwana kîra kîbîîthagua kaingo meeyia maaku na ma antû ba Isiraeri mathambua, na ûrute kîgongwana n'ûntû bwa antû kaingo meeyia maao mathambua wa ta bûra Mwathani aathanîîte.”
8 Kwoogu Arûni aathi kîthînjîrooni aathînja ncamba înu ya kîgongwana n'ûntû bwa wîyia bwake. 9 Nthaka ciake ciamûneenkeeria nthakame, aatombeka kîara gîake gûku nthakameeni, aaka îmwe ngociini cia kîthînjîro na înu îngî yaatigeere amîîtûûra nkona ya kîthînjîro. 10 Acooka aathûkia mathuunya, mpigo irî ciîrî, na îtema rîa kîara kuuma kîrî kîgongwana n'ûntû bwa wîyia aabîîthîria bibi bionthe kîthînjîrooni, wa ta bûra Mwathani aathîîte Musa. 11 Îndî nyama na ndwara aibîîthîria ome ya kambî.
12 Aacooka athînja ntûrûme ya kîgongwana kîra kîbîîthagua. Nthaka ciake ciamûnenkeeria nthakame nwe aathûkia yoo amincîria kîthînjîro nteere cionthe irî inya. 13 Bamûnenkeeria kîongo kîa nyamû înu ya kîgongwana kîra kîbîîthagua na manuku ma nyama inu ingî kîmwe wa kîmwe nwe acibîîthîria cionthe kîthînjîrooni. 14 Aathambia mainto ma nda monthe na magûrû nabio into bibu abibîîthîria kîthînjîrooni îgûrû rîa kîgongwana kîra kîbîîthagua.
15 Nyuma ya ûgu, aaruta biegwa bira antû baareeteete. Aathûkia mbûri îra yarî ya kîgongwana n'ûntû bwa wîyia bwa antû, amîthînja, na amîruta, aarûtha n'yo wa ta bûra aarî akûrûtha na nyamû îra aarutîîte kîrî kîgongwana n'ûntû bwa wîyia bwake. 16 Kaîrî, aathûkia kîgongwana kîra kîbîîthagua akîruta akîthingataga mawatho. 17 Aaruta kîgongwana kîa irio, aarûma rwî rûmwe rwa mûtu acubîîthîria kîthînjîrooni, tûtagûtara kîgongwana kîra kîbîîthagua wa kîra rûkîîrî. 18 Aacooka aathînja ncamba na ntûrûme ira cia kîgongwana kîa ngwatanîro n'ûntû bwa antû. Nthaka ciake ciamûnenkeeria nthakame nwe amîthûkia amincamincîria kîthînjîro nteere cionthe irî inya. 19 Îndî baathûkia mathuunya ma ncamba na ma ntûrûme, kînyaanya, mathuunya mara maguîkagîra mainto ma nda, mpigo na mathuunya mara magwateene nacio na îtema rîa kîara, 20 baamba bamaigîîra îgûrû rîa ibara bia nyamû inu. Rîru Arûni aathûkia mathuunya mamu amabîîthîria kîthînjîrooni. 21 Rîru Arûni aûkîîria i bara na magûrû ma ûrîo ma nyamû inu kîrî kîgongwana gîa gûûkîîrua mbere ya Mwathani wa ta bûra Musa aathanîîte.
22 Rîra Arûni arîîkiirie kûruta igongwana bionthe, aûkîîria njara ciake îgûrû eerekereetie antû abathaarima. Aacooka aagûrûka auma bantû agu aarutagîra kîgongwana n'ûntû bwa wîyia, kîgongwana kîra kîbîîthagua na kîgongwana kîa ngwatanîro. 23 Musa na Arûni baathûngîra ndeeni ya Îrema rîa Kûrîîkanaga, na rîra baumagarûkire baathaarima antû na ûkumio bwa Mwathani bwonekana kîrî antû bonthe. 24 Warîmwe Mwathani aatûma mwanki wabîîthia kîgongwana kîra kîbîîthagua na nyama cia mathuunya ira ciarî kîthînjîrooni. Rîra antû boonire mwanki ûgu baaringa gîtuma baugîîria na inya na baatiirithia moothiû maao nthîgûrû.