Arawi 8

Kwathûrwa kwa Arûni na nthaka ciake

(Kuuma 29:1-37)

1 Mwathani eera Musa ata rî, 2 “Thûkia Arûni na nthaka ciake ûbaire mwîrîgaani wa îrema rîa kûrîîkanaga na ûreete nguo cia athînjîri, maguta ma gwîtûûranîria, ncamba ya kiumîri ya kîgongwana n'ûntû bwa wîyia, ntûrûme ciîrî na gîkabû kîa mîgaate îtarî miimbithie. 3 Ûcooke wîthîranie antû bonthe agu mwîrîgaani wa Îrema rîa Kûrîîkanaga.”

4 Musa nwe arûtha wa ta bûra Mwathani aamwathîîte na rîra antû bonthe beethîranire mwîrîgaani wa Îrema rîa Kûrîîkanaga 5 rîru Musa abeera ata rî, “Mantû mara nthiîte kûrûtha îîndî i mara Mwathani aambathîîte mmarûthe.” 6 Musa aira Arûni na nthaka ciake agu mbere ya antû abathaambia na rûûyî. 7 Aacooka eekîra Arûni nguo îndaaya ya ndeeni, amwoga mûcibi kauna. Amwîkîra nguo îndaaya ya nja, amwîkîra ebondi, rîru amwoga na mûcibi waayo ûmûgemie bwega. 8 Amwîkîra nguo ya kîbara na eekîra Urimu na Thumimu kîrî yo. 9 Aacooka amwoga kîremba kîra na rûteere rwa mbere rwakîo agîîkîra kabaati ka thaabu na gîku kîarî gîntû gîa kwonania akwathûrwa, wa ta bûra Mwathani aathîîte Musa.

10 Musa aacooka aathûkia maguta mara ma gûtûûranîria, aatûûrîria îrema rîa kûrîîkanaga na into bionthe bira biarî ku, na gûkûrûkîîra ûntû bûbu abiathûra bituîka bia gûtûmîrwa i Mwathani. 11 Aathûkia maguta mamwe ma mamu amincamincîria kîthînjîro na into bîakîo bionthe na kîraî na gîkona gîako kaingo abiathûra bituîka bia gûtûmîrwa i Mwathani. 12 Nwe Musa eetûûrîria Arûni maguta mara ma gûtûûranîria kîongo amwathûra atuîka wa kûruta ngûgî cia Ngai. 13 Musa aacooka eeta nthaka cia Arûni agu mbere aciîkîra nguo îndaaya ya ndeeni, acioga mîcibi ya kauna, na abeekîra nkoobia biongo biao. Musa aarûtha wa ta bûra Mwathani aamwathîîte.

14 Nyuma ya ûgu Musa areeta ncamba înu ya kiumîri îrî kîgongwana n'ûntû bwa wîyia na Arûni na nthaka ciake baigîîra njara ciao îgûrû rîa kîongo kîayo. 15 Musa amîthînja aathûkia nthakame yaayo na kîara gîake amîaka ngociini cia kîthînjîro, îrî njîra ya kûthambia kîthînjîro gîku. Aacooka eetûûra nthakame înu îngî nkona ya kîthînjîro îrî njîra ya gûkîtheria. Kwoogu atheria kîthînjîro gîku. 16 Aaruta îthuunya rîra rîkunîkagîra mainto ma nda, îtema rîa kîara, mpigo irî ciîrî na mathuunya mara magwateene nacio abibîîthîria kîthînjîrooni. 17 Aacooka athûkia nyama inu ingî ciatigeere cia ncamba înu amwe na ndwara yaayo, mainto ma nda na thunthuna abibîîthîria ome ya kambî wa ta bûra Mwathani aathanîîte.

18 Nyuma ya ûgu Musa aathûkia ntûrûme înu ya kîgongwana kîra kîbîîthagua. Arûni na nthaka ciake baigîîra njara ciao îgûrû rîa kîongo kîayo. 19 Musa amîthînja na amincamincîria kîthînjîro nthakame yaayo nteere cia kîo irî inya. 20 Rîru aacooka aagiitaanga ntûrûme înu manuku manuku na abîîthia kîongo, manuku mamu na mathuunya. 21 Nyuma ya kûthambia mainto ma nda na magûrû na rûûyî, aabîîthîria ntûrûme înu yonthe kîthînjîrooni, wa ta bûra Mwathani aathîîte Musa. Gîkî i kîgongwana kîra kîbîîthagua gîa gûtûma mûcinko ûmwega wîguîgwa i Mwathani.

22 Nyuma ya ûgu Musa aareeta ntûrûme ya ciîrî îra yarî ya kwathûra athînjîri ba Ngai. Arûni na nthaka ciake baigîîra njara ciao îgûrû rîa kîongo kîayo. 23 Musa aathînja ntûrûme înu, aathûkia nthakame îmwe yaayo aaka Arûni yoo gûtû wake kwa ûrîo, kîaraani kîra kînene kîa njara yake ya ûrîo na kîaraani kîra kînene gîa kûgûrû wake kwa ûrîo. 24 Acooka kîrî nthaka cia Arûni na aaka wa kîra ûmwe wao nthakame gûtû gwake kwa ûrîo, kîaraani kîra kînene kîa njara yake ya ûrîo na kîaraani kîra kînene gîa kûgûrû gwake kwa ûrîo. Arîîkia ûgu aamincîria kîthînjîro nteere cionthe irî inya nthakame înu îngî yaatigeere yonthe. 25 Aathûkia mathuunya, kînyaanya, îthuunya rîra rîguîkagîra mainto ma nda îtema rîa kîara, mpigo irî ciîrî na mathuunya mara magwateene nacio na kûgûrû kwa ûrîo gwa ntûrûme înu. 26 Na kuuma gîkabûûni kîa mîgaate îtarî miimbithie îra yarî mbere ya Mwathani aathûkia, mûgaate ûmwe ûteekîrîîtwe ndawa ya kwimbithia, keki îmwe îrugîîtwe na maguta na mûcikuuti ûmwe abiaigîîra îgûrû rîa mathuunya na kûgûrû kwa ûrîo wa ntûrûme înu. 27 Eekîîra Arûni na nthaka ciake irio bibu bionthe njaraani ciao babiûkîîria birî kîgongwana gîa gûûkîîria mbere ya Mwathani. 28 Nyuma ya ûgu Musa aathûkia irio bibu kuuma kîrî bo na abibîîthîria kîthînjîrooni îgûrû, îgûrû ya kîgongwana kîra kîbîîthagua, kîrî kîgongwana gîa kwathûra athînjîri ba Ngai. Gîku kîarî kîgongwana gîa gûtûma mûtararî ûmwega gwîguîgwa i Mwathani. 29 Musa aacooka aathûkia kîbara gîa ntûrûme înu agîûkîîria îgûrû kîrî kîgongwana gîa gûûkîîria mbere ya Mwathani. Gîcuncî gîku i kîo kîarî kîa Musa gîa kûmwathûra mbere ya Mwathani. Musa aarûthire mantû monthe kûringana na bûra Mwathani aamwathîîte.

30 Kaîrî, Musa aathûkia maguta mamwe mara magûtûûranîria na nthakame îmwe îra yarî kîthînjîrooni amincamincîria Arûni na nthaka ciake nguoni ciao. Gûkûrûkîîra ûntû bûbu Arûni na nthaka ciake na nguo ciao ciathûrwa n'ûntû bwa gûtûmîkaga ngûgîîni ya Mwathani.

31 Musa eera Arûni na nthaka ciake ata rî, “Thûkiani nyama ino bûthi nacio mwîrîgaani wa Îrema rîa Kûrîîkanaga, bwitherûkie na bûcirîîyanîrie na mîgaate îra îrî gîkabûûni kîra gîa kîgongwana gîa kwathûrwa, wa ta bûra Mwathani aathanîîte. 32 Namo matigari ma nyama ino na mîgaate îno bûmabîîthie na mwanki. 33 Bûtikaume agu mwîrîgaani wa Îrema rîa Kûrîîkanaga mbere ya ntugû mûgwanja ithira, mwanka rîra nyambura cienu cia kwathûrwa ikaarîîka. 34 Mwathani aatwathire tûrûthe ûûgû tûkûrûtha îmunthî n'ûntû bwa kûtherua kwenu. 35 Nwa mwanka bûkare mwîrîgaani wa Îrema rîa Kûrîîkanaga ûtugû na mûthenya, ntugû mûgwanja, wa ta bûra Mwathani aathanîîte. Wegua t'ûgu bûgaakua. Ûûgû i bu Mwathani ambathîîte.” 36 Kwoogu Arûni na nthaka ciake baarûtha mantû monthe mara Mwathani aathanîîte gûkûrûkîîra Musa marûthwe.