Mawatho mangî ma kîgongwana n'ûntû bwa îbîtia
7
1 Mwathani eera Musa ata rî, “Mama i mo mawatho ma kîgongwana n'ûntû bwa îbîtia. Nakîo i kîîtheru mûno. 2 Kîgongwana n'ûntû bwa îbîtia gîkaathînjagîrwa wa ara nyamû cia igongwana bira bibîîthagua bithînjagîrwa na nthakame yakîo îmincamincîrue nteere cionthe cia kîthînjîro. 3 Namo mathuunya maayo monthe marutwe. Namo i Kînyaanya, mathuunya mara maguîkagîra mainto ma nda na mara magwateene namo, 4 na mpigo irî ciîrî na mathuunya mara magwateene nacio agu gacemeeni na îtema rîa kîara irutanîrue amwe na mpigo. 5 Mûthînjîri wa Ngai akabibîîthîria kîthînjîrooni gîku îgûrû kîrî kîgongwana kîrutîrîîtwe Mwathani gîa kûbîîthua na mwanki. Gîku i kîgongwana n'ûntû bwa îbîtia. 6 Nwa antû arûme bonka ba mîciî ya athînjîri bakaarîîyaga nyama cia kîo, na ibatîîrue irîîrwa bantû atheru. Gîku i kîgongwana kîîtheru mûno. 7 Watho bwa kîgongwana n'ûntû bwa wîyia nwabu watho bwa kîgongwana n'ûntû bwa îbîtia. Nyama cia kîo i cia mûthînjîri wa Ngai ûra akeegagua akîruta kîgongwana gîa kûthambia muntû ûyu meeyia mara arûthîîte. 8 Na rî mûthînjîri wa Ngai ûra akaarutagîra muntû kîgongwana kîra kîbîîthagua, nwe akaathiiyaga na rûûo rwa nyamû ya kîgongwana gîku. 9 Na rî, kîgongwana kîonthe kîa irio kîra kîrugîrîîtwe riiko, kana kîra kîrugîîtwe na karaî ka mîgaate kana nyûngû ya îthaga gîgaatuîka kîa mûthînjîri wa Ngai ûra akeegua agîkîruta. 10 Nakîo kîgongwana kîa irio kîa mûtu ûra ûkimanîîtue na maguta kana kîa mûtu ûmûûmo ûtarî na maguta gîkeegagua kîrî kîa nthaka cia Arûni cionthe nganaano.Mawatho mangî ma kîgongwana kîa ngwatanîro
11 “Mama i mo mawatho ma kîgongwana kîa ngwatanîro kîra muntû aûmba kwirîra Mwathani: 12 Ûkeegua arîruta n'ûntû bwa gûcookia nkaatho rî, akaarutanîria kîgongwana gîku na tûmîgaate tûtarî twimbithie tûkimanîtue na maguta, mîcikuuti îteekîrîîtwe ndawa ya kwimbithia yaakîîtwe maguta na keki irugîîtwe na mûtu ûra mwinyu mûno ûkimanîîtue na maguta bwega mwanka ûkainya. 13 Bantû amwe na kîgongwana gîku gîake kîa ngwatanîro gîa gûcookia nkaatho akaarutanîria na tûmîgaate twîkîrîtwe ndawa ya kwimbithia. 14 Na kuumania na kîra gîntû gîa into bibu bionthe akaaruta gîntû kîmwe gîtuîke gîa gûûkîîrua îgûrû gîkîrutîrwa Mwathani, nabio into bibu bionthe bigaatuîka bia mûthînjîri wa Ngai ûra amincamincaga nthakame ya kîgongwana gîku kîa ngwatanîro athi nabio. 15 Nacio nyama cia kîgongwana gîku kîrutîîtwe kîrî kîa ngwatanîro n'ûntû bwa gûcookia nkaatho, ibatîîrue irîîwa ntugû wenu kîgongwana gîku kîarutwa, atibatîîrue gûtigaria gacuncî nwa kamwe karaara mwanka rûûni rûkîîrî. 16 Îndî ûkeegua gîtûmi gîa kûruta kîgongwana gîku i mûthiîtio aathiîtiirie kana ûkeegua arîruta n'ûntû bwa kwîbendera, gîkaarîîgwa ntugû înu akûruta kîgongwana na kîra kîûmba gûtigara gîakîo nwa kîrîîgwe rûûni. 17 Ûkeegua kûrî nyama cia kîgongwana gîku igaakinyithia ntugû ya ithatû ibatîîrue i bîîthua na mwanki cionthe. 18 Na rî, nyama cia kîgongwana gîku kîa ngwatanîro ikaaya kûrîîgwa ntugû ya ithatû kîgongwana gîku gîtiîtîgîîrîka; kana muntû ûra arutîîte kîo akara taka arutîîte. Gîgaatuîka mûgiro, nwe muntû ûra akaarîa nyama înu akeegua abîtîîtie.
19 “Nyama ira ikaaringithia gîntû kîrî na mûgiro itibatîîrue kûrîîgwa, ibatîîrue kûbîîthua kûrû. Nacio nyama inu ingî, muntû wonthe atarî na mûgiro nwa acirîe. 20 Îndî muntû kinya ûrîkû ûra arî na mûgiro akaaya kûrîa nyama cia kîgongwana kîa ngwatanîro kîrutîrîîtwe Mwathani, muntû ûyu abatîîrue arutarutwa auma kîrî antû baao.
21 “Na muntû kinya ûrîkû akaaya gûtonga gîntû kîrî na mûgiro, ûroegua i mûgiro kuuma kîrî muntû kana nyamû kana gîntû nwa kîrîkû, na acooke arîe nyama cia kîgongwana kîa ngwatanîro kîra kîrutîrîîtwe Mwathani, muntû ta ûyu abatîîrue arutarutwa auma kîrî antû baao.”
Kûrîa maguta na nthakame gwakaananua
22 Mwathani eera Musa ata rî, 23 “Îra aana ba Isiraeri ata rî, ‘Bûtikaarîe maguta wana marîkû, ma ndegwa kana ma ng'ondu kana ma mbûri 24 maguta ma nyamû îra îkuîte woogu kana yaûragwa i nyamû ya kîthaka nwa bûmatûmîre na njîra îngî îra bûkeenda îndî bûtikaamarîe. 25 Muntû kinya ûrîkû ûra akaarîa maguta ma nyamû ya kîgongwana gîa kûbîîthua na mwanki kîrutîrîîtwe Mwathani, abatîîrue auma kîrî antû baao. 26 Kaîrî wa bantû onthe ara bûgaatûûra, bûtikaarîe nthakame ya nyoni kana ya nyamû kinya îrîkû. 27 Muntû kinya ûrîkû ûra akaarîa nthakame abatîîrue arutarutwa auma kîrî antû baao.’ ”
Rûgai rwa Mûthînjîri wa Ngai
28 Mwathani eera Musa ata rî, 29 “Îra aana ba Isiraeri ûbeere ûûgû, ‘Muntû kinya ûrîkû ûra akaareetera Mwathani into bia kîgongwana kîa ngwatanîro, nwa mwanka areete bimwe biabio birî kîegwa kîa mwanya kîrî Mwathani, 30 akîreete na njara ciake wengwa kîrî Mwathani kîrî kîgongwana gîa kûbîîthua na mwanki. Akaareeta mathuunya na kîbara kîa nyamû înu akûruta kîgongwana kaingo aûkîîria kîbara mbere ya Mwathani kîrî kîewa gîa gûûkîîrua. 31 Mûthînjîri wa Ngai akaabîîthîria mathuunya mamu kîthînjîrooni îndî kîbara i kîa Arûni na nthaka ciake. 32 Kûgûrû kwa nyuma kwa ûrîo kwa nyamû îra îkûrutwa kîgongwana kîa ngwatanîro gûkaanenkanagîrwa ta kîegwa kîa mwanya. 33 Rûru i rûgai rwa mûthînjîri wa Ngai ûra arutaga nthakame na mathuunya ma kîgongwana gîku. 34 Kîbara kîa nyamû ya kîgongwana na kûgûrû kwayo kwa nyuma i bio Mwathani athûkîîtie kuuma kîrî antû ba Isiraeri aaneenkera athînjîri ba Ngai. Na nyama inu i cio antû ba Isiraeri babatîîrue kûnenkanîra athînjîri ba Ngai magiita monthe. 35 Rûrû i rûgai rwa Arûni na nthaka ciake kuuma kîrî igongwana bira birutagîrwa Mwathani na mwanki rûra baaneenkeerwe kuuma ntugû îra baatûûrîîrue maguta baatuîka athînjîri ba Ngai. 36 Ntugû înu i rîo Mwathani aathire aana ba Isiraeri kûnenkanîra athînjîri ba Ngai icuncî bimwe bia into bira bakûrutîra Ngai. Na bûbu i watho bûra aana ba Isiraeri babatîîrue kwathîkîra magiitaani monthe.
37 “ ‘Kwoogu mama, i mawatho ma igongwana bira bibîîthagua, igongwana bia irio, igongwana n'ûntû bwa meeyia, igongwana n'ûntû bwa mabîtia, igongwana bia kwathûra athînjîri, na igongwana bia ngwatanîro. 38 Mwathani aanenkeere Musa mawatho mama kîrîmaani gîa Sinai îgûrû ntugû îra eerire aana ba Isiraeri barî rwanda rwa Sinai barutagîre Mwathani into biao.’ ”