6
1 Mwathani eera Musa ata rî, 2 “Muntû kinya ûrîkû akaaya gûtuîka ti mwîtîgua kîrî Mwathani n'ûntû bwa kûrongoia mûtûûri wake îgûrû rîa gîntû kîra atigîrîîtwe gîgaakûûrwa kana amwaigîra, kana akamwiya gîntû, kana akeeneeria muntû ûra ûngî, akeegua eeyîîtie. 3 Kana akooya gîntû kîûrîîte îndî akarongoa akauga atikîoneete na kinya akathiîtia; muntû akarûtha ûntû nwa bûmwe bwa mantû ta mamu akeegua eeyîîtie. 4 Muntû eeyîîtie na akamenyekana nabîtîîtie, abatîîrue acookia gîntû kîra aiyîîte kana kîra kîaûrîîte ooya kana kîra aatigîîrwe gîgakûûrwa, 5 kana gîntû kîonthe kîra athiîtîîtie na ûrongo îgûrû rîakîo. Nwa mwanka arîe gîntû gîku kîonthe na akîongeere gîcuncî kîa bitaano kîa ûgûri bwakîo, aneenkere mwene kîo ntugû weenu akaamenyekana nabîtîîtie. 6 Na agaacooka airîre mûthînjîri wa Ngai ntûrûme yumîîte ûrîîthiini bwake kîrî kîgongwana n'ûntû bwa îbîtia kîrî Mwathani. Ntûrûme înu îîgue îtarî nwa koothûûku na ya ûgûri bûra bûbatîîrue. 7 Rîru mûthînjîri wa Ngai ûyu akaaruta kîgongwana mbere ya Mwathani gîa kûthambia meeyia ma muntû ûyu na akaarekerwa mantû monthe mara maratûmîîte atarwa abîtîîtie.”Mawatho mangî ma Kîgongwana kîra Kîbîîthagua
8 Mwathani eera Musa ata rî, 9 “Îra Arûni na nthaka ciake ûûgû, ‘Mama i mo mawatho ma kîgongwana kîra kîbîîthagua: Kîgongwana kîra kîbîîthagua kîbateerue kûraara riiko gîkîbîîyaga kîrî kîthînjîrooni îgûrû mwanka rûkîîrî, nau mwanki wa kîthînjîro ûbatîîrue ûraaraga ûgîakanaga oogo. 10 Nwe mûthînjîri wa Ngai eekîre nguo ciake cia ndeeni na eekîre nguo ciake cia ûthînjîri cionthe irûthîîtwe na gatani, acooke athûkie muu wa kîgongwana kîra kîbîîthagua na mwanki kîthînjîrooni îgûrû, acuaige rûteere rwa kîthînjîro. 11 Nyuma ya ûgu arute nguo inu ciake cia ûthînjîri eekîre iingî. Athûkie muu ûyu acwire kîthakaani nja ya kambî eetûûre bantû atarî na mûgiro. 12 Nau mwanki ûra ûrî îgûrû ya kîthînjîro ûbatîîrue ûkare ûgîakanaga na ûtikoore, nwe mûthînjîri wa Ngai abatîîrue acuîkagîre nkû wa rûkîîrî magiita monthe, na aaraga nyama cia kîgongwana kîra kîbîîthagua bwega îgûrû ya nkû inu, na akabîîthîria maguta ma kîgongwana kîa ngwatanîro agu îgûrû. 13 Mwanki ûbatîîrue gûtûûra ûgîakanaga kîthînjîrooni rîonthe na ûtikoore.’ ”
Kîgongwana kîa irio
14 Mwathani eera Musa, “Na mama i mo mawatho na kîgongwana kîa irio: athînjîri ba Ngai bakabirutagîra mbere ya Mwathani waagu mbere ya kîthînjîro. 15 Mûthînjîri wa Ngai akaarûma rwî rûmwe rwa mûtu ûyu mwinyu mûno na maguta mamu, na macoco monthe mara marî îgûrû rîa kîgongwana gîku kîa irio, abibîîthîrie kîthînjîrooni gîku karî gacuncî ga kûrûngamîîra kîgongwana gîku kîa irio kaingo mûtararî wakîo ûmwega gwîguîgwa i Mwathani. 16 Nakîo kîra gîgaatigara kîau kîrîîgwe n'athînjîri ba Ngai; wana gîtigeekîrwe ndawa ya kwimbithia na barîîre bantû atheru waagu ome ya Îrema rîa Kûrîîkanaga. 17 Matigari mamu matikaarugwe na ndawa ya kwimbithia, n'ûntû gîcuncî gîku i niigû mbanenkereete gîtuîka kîao kuuma kîrî igongwana bia kûbîîthua na mwanki bira ndutîrîîtwe. Nakîo i kîîtheru mûno wata kîgongwana n'ûntû bwa wîyia kana kîgongwana n'ûntû bwa îbîtia. 18 Muntû mûrûme wonthe wa nciarwa cionthe cia Arûni cia antû arûme agakîrîîyaga kîrî gîcuncî kîao kîra baathûrîrîîtwe. Bakaanenkagîrwa kîo tene na tene nthukeeni cionthe, kiumîîte igongwanaani bia Mwathani bira bibîîthagua na mwanki bira arutîrîîtwe. Na muntû wonthe agaatongithagia igongwana ta bibu abatîîrue eegua arî mûtheru.”
19 Kaîrî Mwathani eera Musa ata rî, 20 “Gîntû kîra Arûni na nthaka ciake babatîîrue kûreetera Mwathani ntugû îra muntû agaatûûrîrua maguta i gîkî; I gîcuncî gîa îkûmi kîa ndebe îmwe ya mûtu ûmwinyu ûtuîke kîgongwana kîa irio na kîthimi gîku i kîo bagaatûûra barutaga: bakaarutaga nucu yau rûkîîrî na îra îngî ûgoro. 21 Na mûtu ûyu ûkareetagwa nwa mwanka wîgue ûkimanîîtue na maguta bwega nau ûrugwe na karaî ka mîgaate na maguta. Nakîo kîgongwana gîku kîa irio ûkîrutage kîrî mang'enyua maakarange gîtûme mûtararî ûmwega gwîguîgwa i Mwathani. 22 Nthaka ya Arûni îra îkeegua îrî mwîtûûrîrua maguta îra îkîthûkia kaanya gaake ta mûthînjîri ûra mûnene wa Ngai, nwe akaarutaga kîgongwana gîku. Rûru i rûgai rwa Mwathani na kîbatîîrue kîbîîthua kûrû. 23 Na kîgongwana wa kîonthe kîa irio kîra gîkaareetwa i mûthînjîri wa Ngai i kûbîîthua gîkaabîîthagua kîonthe kûrû, na gîtikaarîîgwe.”
Kîgongwana n'ûntû bwa meeyia
24 Mwathani eera Musa ata rî, 25 “Îra Arûni na nthaka ciake ata rî, ‘Mama i mo mawatho ma kîgongwana n'ûntû bwa wîyia: Kîgongwana n'ûntû bwa wîyia gîkaathînjagîrwa wa ara kîgongwana kîra kîbîîthagua kîthînjagîrwa mbere ya Mwathani: kîgongwana gîku i kîîtheru mûno. 26 Mûthînjîri wa Ngai ûra akûruta kîgongwana n'ûntû bwa wîyia, nwe agaakîrîa. Kîbatîîrue kîrîîrwa bantû atheru, waagu ome ya Îrema rîa Kûrîîkanaga. 27 Na muntû wonthe ûra akaaringithia nyama cia kîgongwana gîku abatîîrue eegua arî mûtheru. Nguo îra îkaamincûkîrwa i nthakame yakîo, nguo înu agu îmincûkîrîîtwe i nthakame ûkathambîria bantû atheru. 28 Na nyûngû kinya îrîkû ya yîûmba îra îkûruga nyama cia kîgongwana gîku îbatîîrue yûragwa, na îkeegua îrî nyûngû ya gîkama igaakuruthwa na icooke îkamûrwe na rûûyî. 29 N'antû arûme bonka ba nciarwa cia athînjîri ba Ngai bakaarîîyaga nyama cia kîo, kîgongwana gîku i kîîtheru mûno. 30 Îndî nyama cia kîgongwana n'ûntû bwa wîyia, itibatîîrue irîîgwa wegua nthakame yakîo îkairwa bantû ara atheru Îremaani rîa Kûrîîkanaga kîrî kîgongwana gîa kûthambia meeyia. Ibatîîrue i bîîthua kûrû.’ ”