5
1 “ ‘Muntû akaaya kwîyia n'ûntû bwa kûrega gûkûûyîîra îgambaani ûntû bûra ooneete kana amenyeete muntû ûyu akeegua abîtîîtie.2 “ ‘Kana muntû akaaya gûtonga gîntû kîrî na mûgiro, wîgue i kiimba kîa nyamû ira irî mûgiro, cia kîthaka, cia mûciî kana kîa nyamû ira ciîkururagia wana wegua n'atakûmenya, akaagwatwa i mûgiro na akeegua abîtîîtie:
3 “ ‘Kana akaaya gûtonga gîntû kiumîîte mwîrî wa muntû kîra kîûmba kûmûgwatithia mûgiro wana wegua n'atakûmenya, rîra akaamenya, akeegua abîtîîtie.
4 “ ‘Kana muntû akathiîtia ataambîîte kûthûgaania bwega kûrûtha ûntû wîgue i bwega kana i bûûthûûku wana wegua n'atakûmenya rîra akaamenya, akeegua abîtîîtie.
5 “ ‘Rîra muntû akeegua abîtîîtie n'ûntû bwa mantû mamu, akaumbûra wîyia bûra arûthîîte. 6 Na airîre Mwathani gîntû gîake gîa kîgongwana n'ûntû bwa wîyia bûbu eeyîîtie. Abatîîrue areeta gaatî kana gaparika kuuma ûrîîthiini bwake karî kîgongwana n'ûntû bwa wîyia. Nwe mûthînjîri wa Ngai akamûthambia meeyia maake.
7 “ ‘Na ûkaaya kwîgua ationa ng'ondu, abatîîrue areeta macea maîrî ma kîthaka kana macea maîrî ma mûciî matarî makûrû mûno kîrî Mwathani n'ûntû bwa wîyia, îcea rîmwe rîtuîke kîgongwana n'ûntû bwa wîyia, rîra rîngî rîtuîka kîgongwana kîra kîbîîthagua. 8 Muntû abatîîrue airîra mûthînjîri wa Ngai ûra akaamba arute îcea rîru rîa kîgongwana n'ûntû bwa wîyia. Arîng'eere îndî atigaatuunyûranie. 9 Acooke amincamince nthakame ya kîgongwana n'ûntû bwa wîyia rwaruuni rwa kîthînjîro. Nthakame înu îngî îkeegua îtigarîîte n'yo amîîtûûre nkona ya kîthînjîro. Gîku i kîgongwana n'ûntû bwa meeyia. 10 Na mûthînjîri wa Ngai arute îcea rîru rîngî, rîrî kîgongwana kîra kîbîîthagua wa ta bûra wîthîre bwa kîgongwana gîku bûkari. Ûgu i bu mûthînjîri wa Ngai akaarûtha n'ûntû bwa kûthambia muntû ûyu meeyia, na akaarekerwa.
11 “ ‘Îndî ûkaaya kwîgua ationa macea maîrî ma kîthaka kana macea maîrî ma mûciî matarî makûrû mûno, abatîîrue areeta gîcuncî gîa îkûmi kîa ndebe ya mûtu ûmwinyu ûrî kîgongwana n'ûntû bwa wîyia bûra arûthîîte. Atigeekîre maguta kana macoco îgûrû rîau, n'ûntû gîku i kîgongwana n'ûntû bwa wîyia. 12 Nwe airîre mûthînjîri wa Ngai mûtu ûyu, nwe mûthînjîri wa Ngai arûme rwî rûmwe rwa mûtu ûyu karî gacuncî ga kûrûngamîîra kîgongwana kîonthe. Acubîîthîrie kîthînjîrooni kîra nyamû cia igongwana bira bibîîthagua bira birutagîrwa Mwathani bibîîthagîrua. Gîku i kîgongwana n'ûntû bwa wîyia. 13 Ûgu i bu mûthînjîri wa Ngai akaarûtha n'ûntû bwa kûthambia meeyia wa mara muntû ûyu akeegua arûthîîte na akaarekerwa. Namo matigari ma mûtu ûyu matuîke ma mûthînjîri wa Ngai wa ta bûra kûrûthagwa kîgongwanaani kîa irio.’ ”
Kîgongwana n'ûntû bwa mabîtia
14 Mwathani aaria na Musa amwîra ata rî, 15 “Rîra muntû kinya ûrîkû akeeyia na njîra ya kuuna watho atakûmenya mantûûni meegiî kûreeta into bira biathûrîrîîtwe Mwathani, abatîîrue areetera Mwathani ntûrûme îtarî na koothûûku kuuma ûrîîthiini bwake n'ûntû bwa îbîtia rîake. Ûgûri bwa yo bûkaathimwa kûringana na kîthimi gîa sekeri ya Nyomba ya Ngai. Gîkî i kîgongwana n'ûntû bwa îbîtia. 16 Acooke arîe into bibu biathûrîrîîtwe Mwathani aaregire kwira, na oongeere gîcuncî kîa bitaano kîa ûgûri bwa bio, abinenkanîre kîrî mûthînjîri wa Ngai. Nwe mûthînjîri wa Ngai akaaruta ntûrûme înu kîrî kîgongwana n'ûntû bwa îbîtia amûthambie meeyia maake na akaarekerwa.
17 “ ‘Muntû kinya ûrîkû akeeyia gûkûrûkîîra kûrûtha ûntû kinya bûrîkû bwa mara Mwathani aathanîîte matikaarûthwe, wana ûkeegua atikûmenya n'ûntû bûthûûku akûrûtha muntû ûyu akeegua arî na mabîtia na akaarîua. 18 Muntû ûyu abatîîrue airîre mûthînjîri wa Ngai ntûrûme kuuma ûrîîthiini bwake, îra îtarî nwa koothûûku, na ya ûgûri bûra bûbatîîrue. Gîkî i kîgongwana n'ûntû bwa îbîtia. Ûgu i bu mûthînjîri wa Ngai akaamûthambia meeyia maake n'ûntû bwa bûbu abîtîîtie atakûmenya na akaarekerwa. 19 Gîku i kîgongwana n'ûntû bwa îbîtia, n'ûntû na mma muntû ûyu arî na mabîtia mbere ya Mwathani.’ ”