Kîgongwana n'ûntû bwa wîyia
4
1 Mwathani eera Musa ata rî, 2 “Îra aana ba Isiraeri ûûgû, ‘Ûûgû i bu kûbatîîrue kûrûthwa rîra muntû kinya ûrîkû akeeyia atakûmenya akarûtha mantû mara Mwathani aathanîîte matikaarûthwe: 3 ûkeegua i mûthînjîri wa Ngai ûra mwîtûûrîrua maguta eeyia, n'ûntû bwa meeyia mamu atûme antû bara bangî boonwa babîtîîtie, akaarutîra Mwathani ncamba ya kiumîri îtarî na koothûûku, n'ûntû bwa meeyia maake mara eeyîîtie, îtuîke kîgongwana n'ûntû bwa wîyia. 4 Nwe akaira ncamba înu mwîrîgaani wa Îrema rîa Kûrîîkanaga mbere Mwathani, na aambe aigîîre njara yake îgûrû rîa kîongo kîayo, acooke amîthînjîre agu mbere ya Mwathani. 5 Nwe mûthînjîri ûyu wa Ngai wîtûûrîrîîtue maguta athûkie nthakame ya ncamba înu amiire Îremaani rîa Kûrîîkanaga, 6 nwe atombeke kîara gîake nthakameeni amîmincamince maita mûgwanja mbere ya Mwathani, waagu mbere ya gîtambaa kîra gîankanîîtie Bantû Ara Atheru Mûno. 7 Nwe aake nthakame îmwe ngociini cia kîthînjîro kîa macoco mara manunkaga bwega kîra kîrî Îremaani rîa Kûrîîkanaga agu mbere ya Mwathani. N'yo nthakame îra îngî yonthe ya ncamba înu amîîtûûre nkona ya kîthînjîro gîa kîgongwana kîra kîbîîthagua, kîra kîrî ome mbere ya mwîrîga wa îrema rîa kûrîîkanaga. 8 Na arute ncamba înu ya kîgongwana n'ûntû bwa wîyia mathuunya maayo monthe, namo i mathuunya monthe mara maguîkagîra mainto ma nda na mara magwateene namo, 9 bira bikaarutanîrua amwe na mpigo irî ciîrî amwe na mathuunya mara magwateene nacio gacemeeni na îtema rîa kîara birutanîrue amwe na mpigo. 10 Mûthînjîri wa Ngai akaaruta mathuunya maayo wa ta bûra mathuunya ma ncamba ya kîgongwana kîa ngwatanîro marutagwa. Nwe abîîthîrie into bibu bionthe kîthînjîrooni gîku gîa kîgongwana kîra kîbîîthagua. 11 Îndî ndwara yaayo, nyama ciayo cionthe, kîongo, mathaagiro na mainto ma nda ûntû bûmwe na thunthuna, 12 into bibu bingî bionthe bia ncamba înu bikamatwe biirwe bantû aatheru ome ya kambî ara muu gwîtûûragwa, na bibîîthîrue oogo na mwanki wa nkû.13 “ ‘Na ûkeegua n'antû bonthe ba Isiraeri beeyîîtie batakûmenya, baarûtha ûntû bûmwe bwa mantû mara Mwathani aathanîîte matikaarûthwe, bakeegua babîtîîtie. 14 Rîra bakaamenya wîyia bwao, nwa mwanka bareete ncamba ya kiumîri îrî ya kîgongwana n'ûntû bwa wîyia bamiire mwîrîgaani wa Îrema rîa Kûrîîkanaga. 15 Rîru atongoria baigîîre njara ciao kîongooni gîa ncamba înu mbere ya Mwathani, n'yo ncamba înu îthînjîrwe waagu mbere ya Mwathani. 16 Rîru mûthînjîri wa Ngai ûra mwîtûûrîrua maguta akaathûûngîria nthakame îmwe ya ncamba înu Îremaani rîa Kûrîîkanaga. 17 Nwe atombeke kîara gîake nthakameeni înu, amîmincamince maita mûgwanja mbere ya Mwathani, waagu mbere ya gîtambaa kîra gîankanîîtie Bantû Ara Atheru Mûno. 18 Rîru mûthînjîri wa Ngai akaathûkia nthakame îmwe amîake ngociini cia kîthînjîro kîra kîrî Îremaani rîa Kûrîîkanaga mbere ya Mwathani na eetûûre nthakame îra îgaatigara nkona ya kîthînjîro gîa kûbîîthîria igongwana kîra kîrî ome mbere ya mwîrîga wa Îrema rîa Kûrîîkanaga. 19 Mûthînjîri wa Ngai akaaruta mathuunya ma ncamba înu monthe, amabîîthîrie agu kîthînjîrooni. 20 Ûgu i bu akaarûtha na ncamba înu, wa ta bûra akîrûtha na ncamba ya kîgongwana n'ûntû bwa wîyia bwa mûthînjîri, kaingo athambia antû meeyia maao na bakaarekerwa. 21 Rîru mûthînjîri wa Ngai aire matigari ma ncamba înu ome ya kambî, amabîîthîrie noogo, wa ta bûra aabîîthiirie ncamba îra ya mbere. Gîku i kîgongwana n'ûntû bwa wîyia, gîa antû bonthe.
22 “ ‘Mûtongoria ûmwe wa antû akaaya kwîyia atakûmenya, akarûtha ûntû bûmwe bwa mantû mara Mwathani aathanîîte matikaarûthwe, akeegua abîtîîtie. 23 Rîra akaamenya wîyia bûra arûthîîte, akaareeta kîewa gîake kîa nthenge îtarî nwa koothûûku. 24 Akaigîîra njara ciake kîongooni kîa mbûri înu, acooke amîûragîre bantû ara nyamû cia igongwana bira bibîîthagîrua mbere ya Mwathani ithînjagîrwa. Gîku i kîgongwana n'ûntû bwa wîyia. 25 Rîru mûthînjîri wa Ngai akaathûkia nthakame îmwe ya kîgongwana gîku kîrutîîtwe n'ûntû bwa wîyia na kîara gîake amîake ngociini cia kîthînjîro gîa kîgongwana kîra kîbîîthagua na eetûûre nthakame îra îgaatigara nkona ya kîthînjîro. 26 Na akaabîîthîria mathuunya ma nthenge înu monthe kîthînjîrooni gîku, wa ta bûra abîîthagia mathuunya ma kîgongwana kîa ngwatanîro. Ûgu i bu mûthînjîri wa Ngai akaaruta kîgongwana n'ûntû bwa kûthambia muntû ûyû wîyia bwake, na muntû ûyu akaarekerwa.
27 “ ‘Muntû nwa ûrîkû wa antû ba Isiraeri akaaya kwîyia atakûmenya akarûtha ûntû bûmwe bwa mantû mara Mwathani aathanîîte matikaarûthwe, akeegua abîtîîtie. 28 Na rîra akaamenyithua wîyia bûra arûthîîte, akaareeta mparika îtarî nwa koothûûku îrî kîewa gîake, n'ûntû bwa wîyia bûra arûthîîte. 29 Na akaigîîra njara yake kîongooni gîa mparika înu ya kîgongwana n'ûntû bwa wîyia, na amîthînjîre bantû ara kîgongwana kîra kîbîîthagua kîthînjagîrwa. 30 Na mûthînjîri wa Ngai akaathûkia nthakame îmwe yaayo na kîara na amîake ngociini cia kîthînjîro gîa kîgongwana kîra kîbîîthagua, na atûûre înu îngî nkona ya kîthînjîro gîku. 31 Na akaaruta mathuunya maayo monthe, wa ta bûra mathuunya marutagwa kîgongwanaani kîa ngwatanîro, nwe amabîîthîrie kîthînjîrooni kaingo mûcinko waamo ûmwega gwîguîgwa i Mwathani. Ûûgû i bu mûthînjîri wa Ngai akaaruta kîgongwana n'ûntû bwa kûthambia muntû ûyu wîyia bwake, na akaarekerwa.
32 “ ‘Muntû ûyu akaaya kûreeta ng'ondu îrî kîgongwana gîake kîa wîyia, abatîîrue aruta mwatî ûtarî nwa koothûûku. 33 Akaigîîra njara yake kîongooni kîa nyamû înu ya kîgongwana n'ûntû bwa wîyia, na amîthînjîre bantû ara kûthînjagîrwa nyamû cia kîgongwana kîra kîbîîthagua. 34 Rîru mûthînjîri wa Ngai athûkie nthakame îmwe ya kîgongwana n'ûntû bwa wîyia na kîara na amîake ngociini cia kîthînjîro gîa kîgongwana kîra kîbîîthagua, na înu îngî îgaatigara amîtûûre ruungu rwa kîthînjîro. 35 Mathuunya maayo monthe makaarutwa wa ta ma ng'ondu ya kîgongwana kîa ngwatanîro, na mûthînjîri wa Ngai akamabîîthîria kîthînjîrooni îgûrû rîa kîgongwana kîra kîrutagîrwa Mwathani na njîra ya kûbîîthua. Ûûgû i bu Mûthînjîri wa Ngai akaathambia muntû ûyu wîyia bwake na akaarekerwa.