Kîgongwana kîa Ngwatanîro
3
1 “ ‘Na rî, gîntû gîake gîa kûrutîra Mwathani, gîkeegua i gîa kîgongwana kîa ngwatanîro, na wîgue arîkîruta kuuma ûrîîthiini bwa ng'ombe, îrî ncamba kana moori, akaaruta îtarî na koothûûku. 2 Aambe aigîîre njara kîongooni kîa nyamû înu, acooke amîthînjîre agu mwîrîgaani wa Îrema rîa Kûrîîkanaga, nacio nciarwa cia Arûni cia antû arûme tabo athînjîri ba Ngai bamincamince nthakame yaayo kîthînjîrooni nteere cionthe. 3 Na kuuma kîgongwanaani gîku kîa ngwatanîro, abatîîrue arutîra Mwathani kîgongwana gîa kûbîîthua gîa into bibi, mathuunya monthe mara maguîkagîra mainto ma nda na mara magwateene namo, 4 mpigo irî ciîrî, na mathuunya mara maiguîkîrîte na mara magwateene nacio agu gacemeeni na îtema rîa kîara rîrutanîrue amwe na mpigo. 5 Nabo athînjîri ba Ngai bakaabîîthîria into bibu kîthînjîrooni, îgûrû rîa kîgongwana kîra kîbîîthagua kîra kîaigîîrîîtwe îgûrû nkûûni ira irî mwankiini. Gîku i kîgongwana kîra kîbîîthagua na mwanki gîa gûtûma mûcinko ûra mwega wîguîgwa i Mwathani.6 “ ‘Na rî, gîntû gîake gîa kûrutîra Mwathani kîgongwana kîa ngwatanîro gîkeegua kiumîîte ûrîîthiini bwa ng'ondu kana mbûri, ndûme kana nka, nwa mwanka arute îra îtarî na koothûûku. 7 Ûkeegua i ng'ondu akaaruta, akamiira mbere ya Mwathani, 8 na aambe aigîîre njara yake kîongo kîa ng'ondu înu akûruta, acooke amîthînjîre waagu mbere ya Mwathani. Nabo athînjîri bamincamince nthakame yaayo nteere cionthe cia kîthînjîro. 9 Na kuuma kîgongwanaani gîku kîa ngwatanîro akaarutîra Mwathani kîgongwana gîa kûbîîthua gîa into bibi: mathuunya monthe ma ng'ondu înu, kînyaanya kîonthe kîgitîrîîtwe ntiritiriini, amwe na mathuunya monthe mara maguîkagîra mainto ma nda na mara magwateene namo, 10 na mpigo irî ciîrî na mathuunya mara magwateene nacio agu gacemeeni na îtema rîa kîara irutanîrue amwe na mpigo. 11 Nwe mûthînjîri wa Ngai abîîthîrie into bibu kîthînjîrooni îgûrû, bibu i bio irio bira birutîrîîtwe Mwathani kîrî kîgongwana gîa kûbîîthua na mwanki.
12 “ ‘Na ûkaaya kwîgua gîntû gîake gîa kûruta i mbûri, akamiira mbere ya Mwathani, 13 aambe aigîîre njara yake îgûrû ya kîongo kîayo, acooke amîthînjîre agu mwîrîgaani wa Îrema rîa Kûrîîkanaga. Nabo athînjîri ba Ngai, bamincamince nthakame yaayo nteere cionthe cia kîthînjîro. 14 Na kuuma kîgongwanaani gîku akaarutîra Mwathani into bibi kîrî kîgongwana gîa kûbîîthua na mwanki: mathuunya monthe mara maguîkagîra mainto ma nda na mara magwateene namo, 15 na mpigo irî ciîrî amwe na mathuunya mara magwateene nacio gacemeeni na îtema rîa kîara acirutanîrie amwe na mpigo. 16 N'we mûthînjîri wa Ngai abîîthîrie into bibu kîthînjîrooni. Bibu i bio irio bira birutîîtwe bia kîgongwana gîa kûbîîthua na mwanki, gîa gûtûma mûcinko gwîguîgwa i Mwathani. Mathuunya monthe i ma Mwathani. 17 Ûntû bûbû bûgaatuîka watho bûra bûgaatûûra bûthingatagwa i nthuke cionthe, gûntû kunthe kûra bûgaatûûra. Bûtikaarîe mathuunya kana nthakame.’ ”