Kîgongwana Kîa Irio
2
1 “ ‘Rîra muntû airîra Mwathani gîntû gîa kîgongwana kîa irio abatîîrue aruta mûtu ûmwinyu mûno, acuîkîrîîte maguta ma mîceituuni na macoco, 2 rîru acwire kîrî nciarwa cia antû arûme cia Arûni tabo athînjîri ba Ngai. Ûmwe wao akaarûma rwî rûmwe rwa mûtu ûyu mwinyu mûno amwe na maguta mamu na macoco monthe. Nwe mûthînjîri wa Ngai abîîthîrie into bibu kîthînjîrooni karî gacuncî ga kûrûngamîîra kîgongwana kîa irio. Gacuncî gaka kabîîthagua ga gûtûma mûtararî ûmwega gwîguîgwa i Mwathani. 3 Nakîo kîra gîgaatigara gîa kîgongwana gîku kîa irio gîtuîke kîa Arûni na nciarwa ciake cia antû arûme. Gîku i kîîtheru mûno n'ûntû i gîcuncî gîa kîgongwana kîra kîrutîîrwe Mwathani na njîra ya kûbîîthia.4 “ ‘Na rî, îgiita rîra ûkwira gîntû gîa kûruta kîgongwana kîa irio na gîntû gîku kîîgue gîkarangîrîîtwe riiko, kîbatîîrue kîîgua kîrî kîa mûtu ûmwinyu mûno ûkimanîîtue na maguta na gîtarî na ndawa ya kwimbithia. Gîntû nwa kîîgue i mûgaate ûmûmatu ûrugîîtwe na mûtu ûkimanîîtue na maguta, kana mîcikuuti yakîîtwe maguta. 5 Na rî, ûkeegua gîntû kîra ûkûruta kîgongwana kîa irio i mûgaate ûmûruge na karaî ka mîgaate, mûgaate ûyu ûkaarugwa na mûtu ûmwinyu mûno na ûtikaimbithue, na wîgue ûkimanîîtue na maguta. 6 Ûng'enyûrange mûgaate ûyu mang'enyua, ûcuîtûûrîrie maguta. Gîku i kîgongwana kîa irio. 7 Na rî, gîntû gîku gîa kûruta kîgongwana kîa irio gîkeegua i mûgaate ûrugîîtwe na karaî ga kûruga matumbua, i kîîgue kîrûthîîtwe na mûtu ûmwinyu mûno ûkimanîîtue na maguta. 8 Kîgongwana kîa irio kîrûthîîtwe na mîthemba înu kiirîrwe mûthînjîri wa Ngai nwe akiire kîthînjîrooni. 9 Nwe mûthînjîri wa Ngai acooke athûkie mîgaate îmwe îrî gîcuncî gîa kûrûngamîîra kîgongwana gîku, amîbîîthîrie kîthînjîrooni. Gîku i kîo kîgongwana gîa kûbîîthua na mwanki gîa gûtûma mûtararî wakîo wîguîgwa i Mwathani. 10 Nakîo kîra gîgaatigara gîa kîgongwana gîku gîtuîke kîa Arûni na nciarwa ciake ta cio athînjîri ba Ngai. Gîku kîonthe i kîîtheru mûno n'ûntû kiumîîte kîgongwanaani kîra kîbîîthîrîîtue Mwathani na mwanki.
11 “ ‘Gûtirî kîgongwana kîa irio kîa mûthemba nwa ûrîkû ûra bûkûrutîra Mwathani bûgeekîra ndawa ya kwimbithia n'ûntû ndawa ya kwimbithia kana ûkî bitibatîîrue kûbîîthîrua Mwathani. 12 Nwa bûreete mîgaate îrî na ndawa ya kwimbithia kana ûkî kîrî Mwathani birî maciaro ma mbere, îndî bitikairwe kîthînjîrooni birî bia kûruta mûtararî ûmwega. 13 Gîntû kîra kîonthe ûkaaruta gîa kîgongwana kîa irio wîkagîre mwonyo, na ûtikaareke mwonyoa wa kîrîîkanîro kîa Ngai waku ûûra kîgongwanani gîaku kîa irio na into biaku bionthe bira ûkaaruta ûbiîkîre mwonyo.
14 “ ‘Ûkeegua ûkaarutîra Mwathani kîgongwana kîa irio bia maciaro ma mbere, ûkaaruta ngano ciokeetue na mathuke rîru ciaraarua. 15 Wîkîre maguta îgûrû rîacio ûcooke waigîîre macoco îgûrû rîacio. Gîku i kîo kîgongwana kîa irio. 16 Nwe mûthînjîri wa Ngai akaabîîthia ngano imwe cia inu mbaraarie, amwe na maguta na macoco monthe karî gacuncî ga kûrûngamîîra kîgongwana gîku kîonthe gîa kûrutîra Mwathani na njîra ya kûbîîthia.