ARAWI
Kîgongwana gîa kûbîîthua
1
1 Mwathani eeta Musa na aaria nwe arî Îremaani rîa Kûrîîkanaga. Amwîra ata rî, 2 “Aria na antû ba Isiraeri ûbeere ata rî, ‘Îgiita rîra muntû akeegua akîrutîra Mwathani kîewa nwa areete nyamû kuuma ûrîîthiini bwake bwa ng'ombe, ng'ondu kana mbûri.3 “ ‘Ûkeegua kîewa kîra muntû akwenda kûruta i kîgongwana kîra kîbîîthagua kuuma ûrîîthiini bwake bwa ng'ombe abatîîrue aruta ncamba ya kiumîri îtarî nwa koothûûku, amîreete agu mwîrîgaani wa Îrema rîa Kûrîîkanaga kaingo îîtîgîîrîka bantû aake mbere ya Mwathani. 4 N'we aambe aigîîre njara yake îgûrû rîa kîongo kîa nyamû înu akûruta kîgongwana kîra kîbîîthagua, na îgeetîgîîrîka bantû aake kaingo îthambia meeyia maake. 5 Acooke athînjîre ndegwa înu mbere ya Mwathani. Nacio nciarwa cia Arûni cia antû arûme, ta cio athînjîri ba Ngai bakaathûkia nthakame yaayo bamîmincamincîrie nteere cionthe kîthînjîrooni kîra kîrî mwîrîgaani wa Îrema rîa Kûrîîkanaga. 6 Akaaruta nyamû înu rûûo na amîgiitange manuku manuku. 7 Athînjîri ba Ngai, nciarwa cia antû arûme cia Arûni, bakaabua mwanki kîthînjîrooni bacooke baare nkû bwega îgûrû ya mwanki ûyu. 8 Nabo baare manuku mamu ma nyama bwega îgûrû rîa nkû ira irî mwankiini ûyu ûrî kîthînjîrooni ûntû bûmwe na kîongo na mathuunya. 9 Îndî into bia nda na mathaagiro nwa mwanka biambe bithambue na rûûyî, rîru mûthînjîri wa Ngai abîîthie nyama inu cionthe irî kîgongwana kîra kîbîîthagua gûtûma mûcinko ûmwega gwîguîgwa i Mwathani.
10 “ ‘Ûkeegua gîntû kîra muntû akûruta gîa kîgongwana kîra kîbîîthagua kîriuma ûrîîthiini bwa ng'ondu kana mbûri akaaruta ntûrûme kana nthenge îtarî nwa koothûûku. 11 Nwe amîthînjîre mbere ya Mwathani agu rûteereeni rwa bwegûrû rwa kîthînjîro, na athînjîri ba Ngai, nciarwa cia Arûni cia antû arûme, bamincîrie nthakame yaayo kîthînjîrooni nteere cionthe. 12 Acooke amîgiitange manuku manuku namo manuku mamu mabîîthue amwe na kîongo kîayo na nyama ciayo cia maguta. Mûthînjîri wa Ngai nwe akaara nyama inu bwega îgûrû ya nkû ira irî mwankiini wa kîthînjîro. 13 Îndî into bia nda na mathaagiro nwa mwanka biambe bithambue na rûûyî, rîru mûthînjîri wa Ngai abîîthie nyama inu cionthe irî kîgongwana kîra kîbîîthagua gîa gûtûma mûcinko ûmwega gwîguîgwa i Mwathani.
14 “ ‘Na ûkeegua gîntû kîra muntû akûruta kîrî kîgongwana kîra kîbîîthagua i mûthemba wa nyoni, akaaruta îcea rîa kîthaka kana îcea rîa mûciî rîtarî rîkûrû mûno. 15 Nwe mûthînjîri akaira îcea rîru kîthînjîrooni arîthiore nkigo, abîîthîrie kîongo gîku kîthînjîrooni n'yo nthakame yaarîo îtûûrwe rûteere rwa kîthînjîro. 16 Nwe arute kîboru na aumûre maguanje abite rûteere rwa uumîîro bwa riûa bwa kîthînjîro, bantû ara muu gwîtûûragwa. 17 Acooke arîtandûranie arîgwatîrîîte mathabuuni îndî atikaarîtigithanie kûrû. Mûthînjîri wa Ngai nwe akarîbîîthîria îgûrû rîa nkû ira irî mwankiini wa kîthînjîro. Gîku i kîgongwana kîra kîbîîthagua gîa gûtûma mûcinko ûmwega gwîguîgwa i Mwathani.