Kwathûra athînjîri ba Ngai
29
1 Ûûgû i bu ûkaarûtha ûkîathûra Arûni na aana baake batuîka athînjîri ba Ngai. Ûthûkie gacamba ga kiumîri na ntûrûme ciîrî itarî nwa koothûûku. 2 Na ûgîtûmagîra mûtu wa ngano ûra mwinyu bwega, ûruge mîgaate, keki îrugîîtwe na maguta na mîsiguuti îmîthaare maguta ma mîceituuni. Na bionthe wîgue birugîîtwe bitarî na ndawa ya kwimbithia, 3 gwîkîre into bibu gîkabûûni ûkandutîra bio, amwe na ncamba ya kiumîri na ntûrûme inu ciîrî.4 Ûreete Arûni na nthaka ciake mwîrîgaani wa îrema rîa Ngai na ûbathaambie na rûûyî. 5 Rîru gwîkîre Arûni nguo ciake cia ûthînjîri. Nacio i kanjû, nguo îndaaya îîgagua îrî ruungu rwa ebondi, ebondi, nguo ya kîbara na ûmwoge mûcibi ûmûthongi ûtumîîtwe na waara wa wîtia ebondi înu. 6 Ûmwoge kîremba kîra na ûmwogeere kabaati kara kaandîkîîtwe “Ûyû n'we mûtheru aathûrîrîîtwe Mwathani.” 7 Rîru ûthûkie maguta ma gûtûûranîria, ûmwîtûûrîrie mo kîongo. 8 Nyuma ya ûgu wîîte nthaka cia Arûni. Ûciîkîre kanjû, 9 mîcibi na nkoobia. Ûgu i bu ûgaakunûra Arûni na aana baake. Bo na nciarwa ciao baantûmîkagîre barî athînjîri baakwa magiitaani monthe.
10 Ûreete ncamba ya kiumîri mbere ya îrema rîa Ngai wîre Arûni na aana baake baigîîre njara ciao îgûrû rîa kîongo kîayo. 11 Ûthîînjîre ndegwa înu mbere yakwa agu mwîrîgaani wa îrema rîa Ngai. 12 Ûtongithie nthakame ya ndegwa înu na kîara ûmîake ngociini cia kîthînjîro. Înu îîngî îgaatigara ûmîîtûûre nkona ya kîthînjîro gîku. 13 Agu angî, ûthûkie mathuunya mara maguîkîrîîte into bia nda, kîara gîa îtema kîra kîthongi, mpigo irî ciîrî na mathuunya mara maiguîkîrîte ûmabîîthîrie kîthînjîrooni. 14 Îndî nyama ciayo cionthe, ndwara na mainto ma nda bibîîthîrue ome ya kambî. Gîku i kîgongwana n'ûntû bwa meeyia ma athînjîri ba Ngai.
15 Thûkia ntûrûme îmwe wîre Arûni na aana baake baigîîre njara ciao îgûrû rîa kîongo kîayo. 16 Ûmîthînje na ûmiincîrie nteere irî inya cia kîthînjîro nthakame yaayo. 17 Ûgiitange nyama cia ntûrûme înu manuku manuku, ûthambie into biayo bia nda na magûrû, ûûmbe nyama inu bantû amwe na kîongo na manuku mamu mangî. 18 Ûbîîthîrie ntûrûme înu yonthe kîthînjîrooni kîrî kîgongwana gîa kûbîîthia; gîku gîkeegua kîrî kîgongwana gîa kûbîîthia kîrî Niû Mwathani. Mûcinko wakîo n'ûnkenagia.
19 Thûkia ntûrûme îra îîngî wîre Arûni na nthaka ciake baigîîre njara ciao îgûrû rîa kîongo kîayo. 20 Ûmîthînje na gwake nthakame îmwe yaayo mîthia ya matû ma njara ya ûrîo ma Arûni na aana baake, biaraani bira binene bia njara ciao cia ûrîo, na biaraani bira binene bia magûrû maao ma ûrîo. Rîru ûmiincîrie nthakame înu îngî nteere cionthe cia kîthînjîro. 21 Ûthûkie nthakame îmwe îra îrî kîthînjîrooni uunganie na maguta ma gwakana ûmiincîrie Arûni na nguo ciake na nthaka cia Arûni na nguo ciao. N'ûntû bwa ûgu we na aana baake na nguo ciao ikeegua irî mbathûrîre niû.
22 Ûthûkie mathuunya ma ntûrûme înu, amwe na kînyaanya, na îthuunya rîra rîguîkagîra into bia nda, rîra rîguîkagîra îtema, rîra rîguîkagîra mpigo irî ciîrî, na kûgûrû kwa ûrîo. (N'ûntû îno n'yo ntûrûme ya kwathûra athînjîri ngûgîîni.) 23 Kuuma gîkabûûni kîa mîgaate îtarî miimbithie îra iigîîtwe mwîrîgaani wa îrema rîa kûrîîkanaga, ûthûkie mûgaate ûmwe wa kîra mûtheemba; mûgaate ûmwe, keki îmwe îrugîîtwe na maguta ma mîceituuni na mûsikuti ûmwe. 24 Neenkanîra irio bibu bionthe kîrî Arûni na nthaka ciake ûbeere bandutîre birî kîgongwana gîa gûûkîîria mbere ya Mwathani. 25 Rîru ûbithûkie kuuma kîrî bo, ûbibîîthîrie kîthînjîrooni amwe na kîgongwana kîra kîbîîthagua, gîtuîke i kîgongwana gîa kûbîîthia. Mûcinko wa kîgongwana gîku n'ûnkenagia. 26 Ûthûkie kîbara gîa ntûrûme înu, ûgîûkîîrie îgûrû, ûmbathûrire kîo kîrî kîgongwana gîa gûûkîîria mbere ya Mwathani, na rûru ûkeegua rûrî rûgai rwaku. 27 Kîbara na kûgûrû wa ntûrûme înu bira biûkîîrie bia kwathûra athînjîri bigaatûmîrwa kîgongwanaani gîku, na ûkeegagua rûrî rûgai rwa Arûni na nthaka ciake. 28 Rûrû i ru rûgai rûra antû ba Isiraeri bakaanenkagîra athînjîri ba Ngai rîonthe. Mama i mo maruta ma mwanya mara antû ba Isiraeri bakaarutagîra Mwathani kuuma kîrî igongwana biao bia ngwatanîro. 29 Nguo cia Arûni cia ûthînjîri igaatiganagîrwa i nciarwa ciake kaingo bageekagîra cio rîra bagîîtûûrîrua maguta na bakîathûrwa n'ûntû bwa ngûgî ya ûthînjîri. 30 Nthaka ya Arûni îra îkaathûkia mwanya wake ta mûthînjîri na ûra akaathûngîra îremaani rîa Ngai gûtûmîka Antû ara Atheru, abatîîrue eekîra nguo inu ntugû mûgwanja.
31 Ûthûkie nyama cia ntûrûme îra ya kwathûra Arûni na nthaka ciake ngûgîîni, ûcitherûkîrie bantû aatheru. 32 Rîru Arûni na nthaka ciake barîîre nyama inu, amwe na mîgaate îra îtigeere gîkabûûni mwîrîgaani wa îrema rîa Ngai. 33 Babatîîrue barîa biewa bibi bia kîgongwana gîa kûbathûûngîria ngûgîîni na kûbatheria. Athînjîri bonka i bo babatîîrue kûrîa irio bibu n'ûntû i biitheru. 34 Na ûkaaya kwîgua kûrî nyama kana mîgaate îkaaraara mwanka rûûni rûkîîrî, bitibatîîrue birîîgwa. Bibatîîrue kûbîîthua na mwanki n'ûntû i biitheru. 35 Ûkaathîka na njîra ya kûrûtha nyambura cia kwathûra Arûni na nthaka ciake ntugû mûgwanja wa ta bûra nkwathîîte. 36 Wa îra ntugû ûkaruta ndegwa îrî kîgongwana n'ûntû bwa meeyia. Înu ikaatheria kîthînjîro. Ûgacooka ûgagîîtûûrîria maguta ma mîceituuni n' ûntû bwa kûtherua wakîo. 37 Ûrûthe ûgu ntugû mûgwanja. Rîru kîthînjîro gîgaatuîka kîîtheru cwe, na gîntû kîonthe gîgagîtongithia gîgaatuîka kîîtheru.
Biewa bia wa kîra ntugû
38 Igongwana bira ûkaarutaga wa kîra ntugû i bibi; ntûrûme ciîrî cia ûkûrû bwa mwanka ûmwe. 39 Ûkaaruta ntûrûme îmwe rûkîîrî na îra îîngî ûgoro. 40 Amwe na ntûrûme ya mbere ûrute rita ciîrî cia mûtu wa ngano ûra mwinyu bwega, ûriindîîtwe na maguta mara meega ma mîceituuni, na rita îmwe ya ndibei îrî kîewa gîa gîakûnyua. 41 Ntûrûme îra îîngî ûkamîruta ûgoro, na ûmîrutanîrie na kîewa kîa irio na kîewa gîa gîakûnyua wa ta bira bia rûkîîrî gîkûruta mûcinko ûgûkenia Mwathani. 42 Magiita monthe, na kinya nciarwa cienu ira ikaaya, kîgongwana gîa kûbîîthua gîkaarutagîrwa mbere yakwa mwîrîgaani wa îrema rîa Ngai. Na agu noogo nkaarîîkanaga naabi na nkaaria naabi. 43 Agu noogo nkaarîîkanaga na antû ba Isiraeri na mwago wakwa ûgaatûma bantû agu athera. 44 Ngaatûma îrema na kîthînjîro bituîka biitheru na nkaathûra Arûni na aana baake baantûmîkagîre barî athînjîri baakwa. 45 Ngaatûûra gatîgatî ga antû ba Isiraeri na ngaatuîka Ngai wao. 46 Bakaamenya atî i niû Mwathani Ngai wao, ûra waabarutire Miisiri kaingo ntûûra gatîgatî kaao. I niû Mwathani Ngai wao.