Kîthînjîro gîa kûbîîthîria macoco
30
1 “Rûtha kîthînjîro gîa kûbîîthîria macoco ûgîtûmagîra mbaaû cia mûgaa. 2 Kîîgue kîrî na wariî na ûraaya bûganeene bwa biiti îmwe na nucu, na ûraaya bwa gwîtia îgûrû bwîgue bûrî bwa biiti ithatû. Na koona cia kîthînjîro icaîgwe ikari ta ngoci cia ng'ombe. 3 Ûkaande kîthînjîro na thaabu îtaungeene na gîntû kîngî îgûrû, nteere na ngoci. Ûcooke ûrûthe karûturuurwa ka thaabu kathiûrûûkîrie kîthînjîro kîonthe. 4 Ûrûthe iguatû biîrî bia thaabu mbarî îno na îra îîngî, agu ruungu rwa karûturuurwa, kûra mîtî ya gûgîkamataga îkaathûngagîîrua. 5 Mîtî înu îîgue îrî ya mîgaa na îkaandwe na thaabu. 6 Waige kîthînjîro gîkî mbere ya gîtambaa kîra gîcuuragua mbere ya gîtî gîa kîao. Agu noogo nkaarîîkana naawe. 7 Arûni abatîîrue kûbîîthagîria macoco kîthînjîrooni gîku wa kîra rûkîîrî rîra akûthuuranîra taa. 8 Na arûthe woogu kaîrî ûgoro akîmuuntia taa. Kîgongwana gîkî kîa macoco kîbatîîrue kîrutagwa rîonthe nciarwani cionthe. 9 Bûtikaarutîre kîthînjîrooni gîkî; macoco matarî meetîgîîrie, kîgongwana kîa nyamû, kîgongwana kîa irio kana bwîtûûrîria kîo kîewa kîa ndibei. 10 Arûni agaakaga ngoci cia kîthînjîro gîku nthakame ya kîgongwana n'ûntû bwa gûkîtheria rîmwe kwa mwanka. Gûkaarûthagwa ûûgû rîonthe woora mwanka, kuuma nciarwa mwanka nciarwa, n'ûntû i kîthînjîro kîra kîtheru mûno kîa Mwathani.”Ûgooti bwa îrema rîa Ngai
11 Mwathani eera Musa ata rî, 12 “Rîra ûgaatara antû ba Isiraeri, wa muntû akaarea îrîi n'ûntû bwa mwoyo wake rîra ûkîbatara, gûtikaagîe na mûthiro ûkîbatara. 13 Muntû wonthe ûra agaatarwa abatîîrue area mûgana wa nucu sekeri kûringana na ûrito bwa sekeria bira biatûmîkaga Nyomba ya Ngai. Sekeri imwe yaarî na ûrito bwa gera îkûmi Woora muntû nwa mwanka arîe, na gîkî i kîewa kîrî niû. 14 Muntû wonthe ûgaatarwa, wa ûkûrû bwa kuuma mîanka mîrongo îîrî kûthi mbere akaandea îrîi rîru. 15 Bara batongu batibatîîrue barea nkûrûki ya nucu ya sekeri kana bara nkîa barea mbia i niini nkûrûki bakîrîa îrîi rîa kûrigîîria mîoyo yao. 16 Îthîrania mbia inu kuuma kîrî antû ba Isiraeri ûcitûmîre kûmenyeera îrema rîa Ngai. Ûgooti bûbû ûkeegua bûrî mûririkana kîrî antû ba Isiraeri atî bakûrîa n'ûntû bwa kûmenyeerwa mîoyo yao.”
Kîraî gîa kûthambîra
17 Mwathani eera Musa, 18 “Rûtha kîraî gîa kûthamba na rûthuku. Na ûkîrûthîre bantû a gûtûûgagîrua na rûthuku. Waige kîraî gîku gatîgatî ka îrema rîa Ngai na kîthînjîro, na wîkîre rûûyî ku. 19 Arûni na aana baake bagaatûmagîra rûûyî rûru kûthamba njara na magûrû, 20 mbere bathûûngîra îremaani kana bathi akubî na kîthînjîro kûruta kîgongwana gîa kûbîîthia, kaingo batakua. 21 Nwa mwanka bathambe njara na magûrû maao giria bakaaya gûkua. Bûbû i watho bwa kûthingatwa i bo na nciarwa ciao tene na tene.”
Maguta ma gwakana
22 Rîru Mwathani eera Musa: 23 Thûkia mîthemba îra mîega mûno na tûnyamû tûra tûnuunkaga bwega. Natu i ta tu tûtû; kiro ithanthatû cia manemane ya rûûyî, kiro ithatû cia ndaracini îra îrî mûtararî, kiro ithatû cia nyaki îra înuunkaga bwega, 24 na kiro ithanthatû cia mûtî ûra wîtagwa Kasia. Into bibu bionthe bibatîîrue bithimwa na ithimi bia Nyomba ya Ngai. Rîru ûriinde into bibu na rita inya cia maguta ma mîceituuni. 25 Waungania into bibu ûkeegua ûrî na maguta maatheru ma wakana ta mara marûthîîtwe i muungania wa mîtaa; na makeegua marî maguta maatheru ma gwîtûûranîria. 26 Rîru ûtûmîre maguta mamu waka îrema rîa Ngai, îthandûkû rîa maathana, 27 meetha na into biayo, gîtugî gîa taa na into biakîo kîthînjîro gîa kûbîîthîria macoco, 28 kîthînjîro gîa kîgongwana kîra kîbîîthagua, amwe na into biakîo na kîraî gîa kûthambîra na bantû ara gîtûûgagîrua. 29 Wathûre into bibu bituîke biitheru mûno, na gîntû kîonthe gîkaabitongithia gîgatuîka kîîtheru. 30 Tûûrîria Arûni na nthaka ciake maguta na ûbaathûre barî athînjîri baakwa. 31 Îra antû ba Isiraeri, “Maguta mama matheru ma wakana magaatûmagîrwa ngûgîîni ciakwa nciarwani cionthe. 32 Muntû woogu atigeetûûrîrue mo na bûtikaarûthe maguta mangî bûgîtûmagîra into ta bira bitûmîrîtwe kûmarûtha. I maatheru na babatîîrue kûmathûkia marî maatheru. 33 Muntû ûkaarûtha maguta maake ta mama kana atûmîre mo kîrî muntû atarî mûthînjîri, muntû ûyu agaatiga gûtaranîrua na antû baakwa.”
Macoco
34 Mwathani eera Musa ata rî, “Thûkia tûnyamû tûra tûnuunkaga bwega. Natu i ta tûtû; Sitakiti, Onuka, Garibane, amwe na macoco mara matheru. Natu twîgue tûrî twa ithimi biganeene. 35 Tûmîra twinto tûtu kûrûtha macoco uunganie ta bûra muungania wa mîtaa arûthaga. Wîkîre mwonyo kaingo meegua marî mûkûûrani na marî matheru. 36 Ûthie mamwe matuîke ta kamûtu gakainyu, ûthi nako îremaani rîa Ngai ûkamincamincîrie mbere ya îthandûkû rîa maathana, ara ngaatua gûkomanaga naabi. Bûmenyage macoco mama i maatheru mûno. 37 Rîra bûkûrûtha macoco meenu ma gûtûmagîra bwingwa bûtigaatûmagîre njîra îra îtûmîrîtwe kûrûtha mama. Mathûkagieni marî maatheru mara maathûrîrîtwe niû. 38 Muntû ûkaarûtha maake ta mamu, na akamatûmîra îrî mîtaa, muntû ûyu agaatiga gûtaranîrua na antû baakwa.”