Gwaka îthandûkû rîa maathana
37
1 Mbesareri aaka îthandûkû rîa maathana na mbaaû cia mûgaa. Rîarî rîa ûraaya bwa biiti ithatû na inci kenda, wariî bwa biiti ciîrî na robo, na ûraaya bwa wîtia bwa biiti ciîrî na robo. 2 Amîkaanda na thaabu îtaunganîîtue na gîntû kîngî, nja na ndeeni, aacooka aarûtha kamûturuurwa ka thaabu kathiûrûûkîîte îthandûkû. 3 Eekîra iguatû bina bia thaabu magûrûûni maarîo marî mana, biîrî mbarî îmwe na biîrî mbarî îra îîngî. 4 Aarûtha mîtî îîrî ya mûgaa ya kûrîkamataga, na amîkaanda na thaabu, 5 na amîthûûngîria iguatûûni bira biarî mbarî irî ciîrî cia îthandûkû. 6 Aarûtha nkunîki ya îthandûkû rîa maathana, îra yeetagwa gîtî gîa kîao, na thaabu îtaunganîîtue na gîntû kîngî ya ûraaya bwa biiti ithatû na inci kenda na wariî bwa biiti ciîrî na robo. 7 Aarûtha akerubi baîrî ba thaabu ya gûtura; ameekîra mîthiani ya gîtî gîa kîao îrî îîrî, 8 îmwe yakara mûthiani ûmwe, na kerubi îra îngî yakara mûthiani ûra ûngî. Aacirûthire mwanka ciegua îgwateene na mûthia wa gîtî gîku gîa kîao. 9 Akerubi babu bataambûrûkie mathabu maao maguîkîre gîtî gîa kîao namo moothiû maao makare maraithîîte gîtî gîku gîa kîao.Meetha
10 Rîru aarûtha meetha na mbaaû cia mîgaa ya ûraaya bwa biiti ithatû, wariî bwa biiti îmwe na nucu, na ûraaya bwa gwîtia îgûrû bwa biiti ciîrî na robo. 11 Amîkaanda na thaabu îtaunganîîtue na gîntû kîngî, na aarûtha karûturuurwa ka thaabu kamîthiûrûûkîîte. 12 Aarûthîra meetha karûbaaû kûthiûrûkîîria mbarî cionthe, ka wariî bwa inci ithatû, na karûbaaû gaku aacooka akathiûrûûkîîria na karûturuurwa ka thaabu. 13 Aarûtha iguatû bina bia thaabu na eekîra magûrûûni mamu ma meetha ma koona marî mana. 14 Iguatû bia kûthûngîria mîtî ya gûkamataga meetha biekîrîtwe akubî na karûbaaû gaku. 15 Aarûthire mîtî înu îrî ya mûgaa amîkaanda na thaabu. 16 Aarûtha into bia gûtûmîra meethaani na thaabu îtaunganîîtue na gîntû kîngî. Into bibu nabio i thaani na mbakûri cia macoco, njaagi na ikombe bira bitûmagîrwa gwîkia biewa bia biakûnyua.
Gîtugî gîa taa
17 Rîru aarûtha gîtugî gîa taa na thaabu îtaunganîîtue na gîntû kîngî. Gikinyithio na kîano gîakîo kîîgue kîrî gîa gûtura. Tûkombe twa taa, maûa mara kîgemeetue namo na marao bionthe bigwateene biatuîka gîntû kîmwe. 18 Mpatha ithanthatû ikiumaga nteere cia kîo, mpatha ithatû rûteere rûmwe, na ithatû inu ingî rûteere rûru rûngî. 19 Mpathaani inu ithanthatû wa rûpatha rwarî na ikombe bithatû birûthîîtwe bikari ta maûa ma mûtî ûra wîtawa arimondi, bionthe birî bithanthatû wa kîra kîmwe wîgue kîgemeetue na maûa. 20 Na gîtugîîni gîku kîongwa kwagemeetue na magemio ma mûbuanaano wa maûa ma mûtî ûyu wîtagwa arimondi. 21 I kwarî na nthundo îmwe rungu rwa wa kîra mpatha ciîrî. 22 Nthundo inu, mpatha inu na gîtugî biarî gîntû kîmwe na biaturîîtwe na thaabu îtaunganîîtue na gîntû kîngî. 23 Aarûtha taa mûgwanja cia gîtugî gîku, na mîgwati na tûthaani twakîo agîtûmagîra thaabu îtaunganîîtue na gîntû kîngî. 24 Aarûthire gîtugî gîa taa na into bibu biakîo agîtûmagîra kiro mîrongo îthatû na inya cia thaabu îtaunganîîtue na gîntû kîngî.
Kîthînjîro gîa kûbîîthîria macoco
25 Aarûtha kîthînjîro agîtûmagîra mbaaû cia mûgaa, gîa kûbîîthîria macoco. Ûraaya na wariî bwakîo i bwaganeene, bwa biiti îmwe na nucu mbarî cionthe. Nabu ûraaya bwa gwîtia bwarî bwa biiti ithatû. Ngoci cia kîo ira ciarî koonaani ciagwateene na kîthînjîro. 26 Aakaanda îgûrû, nteere ciayo irî inya na ngoci ciayo na thaabu îtaungeene na gîntû kîngî aacooka aarûtha karûturuurwa ka thaabu ga gûkîthiûrûkîîria. 27 Aarûtha iguatû biîrî bia thaabu mbarî îno na îra îîngî, agu ruungu rwa karûturuurwa, kûra mîtî ya gûgîkamataga bikaathûngagîîrua. 28 Aarûthire mîtî înu na mîgaa na amîkaanda na thaabu.
29 Aacooka arûtha maguta maatheru ma gwîtûûranîria na macoco ta mara marûthîîtwe i muungania wa mîtaa.