36
1 Mbesareri, Ooriabu na antû bangî bara Mwathani aaneenkereete ûûmbi na ûmenyo, bakaaruta ngûgî ya gwaka na gwîkîra into bira bikwendekana îremaani, wa ta bûra Mwathani aathanîîte.”
Antû baareeta biewa biingî nkûrûki ya bira biendekanaga
2 Kwoogu Musa eera Mbesareri na Ooriabu amwe na antû bara bangî bara Mwathani aaneenkereete ûûmbi na eendaga baruta ngûgî baambîîrie ngûgî ya gwaka îrema rîa kûrîîkana, 3 Musa abanenkera into bionthe bira antû baarutîîte n'ûntû bwa kûruta ngûgî înu. Antû baathi na mbere kûreeta biewa wa kîra ntugû rûkîîrî, 4 mwanka antû bara baarî na waara baatigana na ngûgî yao baathi kîrî Musa 5 bamwîra, “Antû i bakûreeta into biingî nkûrûki ya bira bikwendekana kûruta ngûgî îra Mwathani aatwathire tûrûthe.”
6 Kwoogu Musa aaruta watho na antû ba kambî bonthe baamenyithua bu atî, gûtikaagîte muntû mûrûme kana mûka akaaruta kîewa kîngî akîerekeretie kûruta ngûgî îremaani rîa kûrîîkana. Kwoogu antû baakaanua kwira biewa biingî 7 n'ûntû bira biarî bikûreetwa biarî biingî nkûrûki ya bira biendekanaga kûrîîkia ngûgî.
Gwaka Îrema rîa Ngai
8 Antû baarî na waara mûno baatuma îrema rîa Ngai na ngoora cia gûcuuria îkûmi. Ngoora ciarî cia gatani îra nthongi na irûthîîtwe na ndigi cia rangi ya mburuu, na ûkûyû na întuune na ingemie na mbica cia akerubi ngooraani inu. 9 Wa îra ngoora yegagua îrî na ûraaya bwa biiti mîrongo îna na ciîrî na wariî bwa biiti ithanthatû. Itaambaa bionthe i biaganeene. 10 Baarathanîîria ngoora itaano amwe na itaano ira iingî amwe. 11 Beekîra iguatû bia rangi ya mburuu mûthiani wa gîtambaa kîra kîarî mûthiani kîrî bira biarî biitumanîîrie amwe bitaano, na baarûtha wa ûgu kîrî mûthia wa gîtambaa kîra kîarî mûthiani wa bira biingî bitaano. 12 Baarûthire iguatû mîrongo îtaano kûrî gîtambaa kîmwe, na iguatû biingî mîrongo îtaano gîtambaani gîku kîngî, na iguatû bibu i bierekanîrîîte. 13 Baarûtha tûpogoro tûniini mîrongo îtaano twa thaabu twa kûbunga, baagwatithania itambaa na tûpogoro tûtu. Kwoogu îrema rîa Ngai rîegua rîarûthîîtwe na gîtambaa kîgwateene. 14 Na baatuma ngoora îkûmi na îmwe cia guaya ya mbûri ciîgue i cio îrema rîa gûkunîkîra îrema rîru rîa Ngai. 15 Ngoora ino cionthe ciarî cia kîthimi kîmwe. Wa îra îmwe yarî na ûraaya bwa biiti mîrongo îna na itaano na wariî bwa biiti ithanthatû. 16 Baagwatithania ngoora itaano ciatuîka îmwe, na inu iingî ithanthatû ciatuîka ngoora îngî. 17 Baarûtha iguatû mîrongo îtaano mûthiani wa ngoora îra ya mbere, na bingî mîrongo îtaano mûthiani wa ngoora îra îngî. 18 Baarûtha tûpogoro mîrongo îtaano twa yîûmba ta rîra rîrûthaga gîkama, bia kûgwatithania ibarî bira biîrî na îrema rîatuîka gîntû kîmwe. 19 Baacooka baarûthîra îrema rîru kîguîkîri kîa rûûo rwa ntûrûme rûgemeetue na rangi întuune na îgûrû rîaru kîguîkîri kîngî kîa ndwara cia nyamû ira nene cia îria.
20 Baarûtha mbureemu cia îrema cia mbaaû cia mîgaa. 21 Wa rûbureemu rwarî rwa wariî bwa biiti ciîrî na robo na ûraaya bwa biiti îkûmi na itaano. 22 Wa rûbureemu ûkeegua rûrî na ndathanîîro ciîrî kaingo rûgwatithanua na rûra rûngî. Na ûgu i bu baarûthire mbureemu cionthe cia îrema. 23 Baarûthire mbureemu mîrongo îîrî n'ûntû bwa îrema rîru cia mbarî ya iti, 24 na ikinyithio bia fetha mîrongo îna bia kwaigagîîrwa mbureemu inu, wa rûra rûbaaû ikinyithio biîrî bia kûwata mpoga. 25 Baarûtha mbureemu mîrongo îîrî cia mbarî ya neegûrû ya îrema, 26 na ikinyithio biacio bia fetha mîrongo îna, wa îra mbureemu îrî na ikinyithio biîrî ruungu rwayo. 27 Na mbarî na nyuma ya îrema, na n'yo yarî mbarî ya ûthwîro bwa riûa, baarûtha mbureemu ithanthatû, 28 na mbureemu ciîrî cia koona cia mbarî ya nyuma ya îrema. 29 Mbureemu inu cia koona ciegagua ciathûkeene naara ruungu îndî igwatanîrîîte naara îgûrû, agu kîguatûûni kîa mbere, na i bu ciarûthîîtwe irî ciîrî. Inu i cio ciegagua irûthîîte koona inu ciîrî. 30 Kwoogu kwarî na mbureemu inyanya na ikinyithio îkûmi na bithanthatû bia fetha, biîrî ruungu rwa wa kîra rûbureemu.
31 Baarûtha mata mataano ma mbaaû cia mûgaa: mataano ma rûteere rwa îgûrû rwa îrema rîa Ngai, 32 mataano ma mamu ma rûteere rwa naiti, na mataano ma rûteere rwa ûthwîro bwa riûa, naara mûthiani wa gîkaro. 33 Rûbaaû rwa îta rwa gatîgatî rwekîrwa nucu ya ûraaya bwa mbureemu rûkeranîîtie kuuma mûthia ûmwe wa îrema mwanka mûthia ûra ûngî. 34 Baakaanda mbureemu na thaabu na baigwatithania na iguatû bia thaabu bira bikaagwataga mata. Baakaanda mata mamu na thaabu kinya mo. 35 Baarûtha gîtambaa kîîthongi mûno, na mbica ya kerubi îgemeetue na waara nguoni înu ûgîtûmagîra rûrigi rwa rangi ya mburuu, ya ûkûyû, na rwa rangi întuune. 36 Baarûtha itugî bina bia mîgaa bikaandîîtwe na thaabu, biekîrwa tûpogoro twa thaabu. Baarûtha ikinyithio bina bia fetha bia kûgwatîîra itugî bibu. 37 Baarûtha gîtambaa gîa gûcuuria mwîrîgaani kîgemeetue na waara na rûrigi rwa rangi ya mburuu, rangi ya ûkûyû na întuune, gatani îmbokothe bwega. 38 Gîtambaa gîku kîagwatithanîîtue na itugî bitaano, na tûpogoro tûtaano. Itugî bikaandîîtwe na thaabu biongo biabio na mata maabio, na biarûthîrwa ikinyithio bitaano bia rûthuku.