Mawatho ma Sabatû
35
1 Musa eethîrania antû bonthe ba Isiraeri abeera ata rî, “Mama i mo mantû mara Mwathani akûbwatha: 2 Rutagaani ngûgî ntugû mûgwanja, îndî ntugû ya mûgwanja i Sabatû ya kûnogoka. Ûra akaaruta ngûgî ntugû înu abatîîrue aûragwa. 3 Bûtibatîîrue bûbua mwanki mîciî yenu ntugû ya Sabatû.”Biewa bia Îrema rîa Ngai
4 Musa eera antû ba Isiraeri, Ûûgû i bu Mwathani aathanîîte: 5 Rutagîraani Mwathani biegwa. Muntû wonthe ûra ûrî na nkoro ya kwenda kûrutîra Mwathani biewa abatîîrue aruta, thaabu, fetha, cuuma ya yîûmba ria gîkama, 6 ndigi cia rangi ya mburuu, cia rangi ya ûkûyû, gatani îra nthongi, guaya ya mbûri, 7 rûûo rwa ntûrûme rûgemeetue na rangi întuune, na ndwara cia nyamû ira nene cia îria, mbaaû cia mîgaa, 8 maguta ma wîkîra taani, mîtaa ya kûrûtha maguta ma wîtûûranîria na macoco mara manuunkaga bwega, 9 maiga ma goro meetagwa Ondiriki, na mangî ma gûtumîîra ebondiini na kaguoni ga kîbara.
10 Antû bonthe bara barî waara babatîîrue baaya barûtha bionthe bira Mwathani aathanîîte birûthwe: 11 îrema na into bia kûrîguîkîra, tûpogoro twarîo na mbureemu ciarîo, mata, itugî biarîo, na ikinyithio biarîo; 12 îthandûkû rîa maathana, mîtî ya kûrîkamataga, gîtî gîa kîao,a gîtambaa kîra gîcuuragua gîa kîrîkunîkîra; 13 meetha, mîtî ya kûmîkamataga, na into bionthe biayo, na mûgaate ûra mûtheru wa kûûndutîra; 14 gîtugî gîa taa wana kîo kîra kîrî oogo n'ûntû bwa werû, na into biakîo, taa ciakîo tûkombe twakîo, na maguta ma wakania werû; 15 kîthînjîro kîa macoco, na mîtî ya gûgîkamataga; maguta ma gwakana; macoco mara manuunkaga bwega; gîtambaa kîa mwîrîga wa îrema rîa Ngai; 16 kîthînjîro kîa igongwana bia kûbîîthua na mwanki, na rûrîra rwarîo rûra rûrûthîîtwe na yîûmba rîa gîkama, mîtî ya gûgîkamataga na into biakîo bionthe, kîraî gîa kûthambîra na bantû ara gîtûûgagîrua, 17 itambaa bia ome bantû ara athiûrûkîîrie, itugî biakîo na ikinyithio, na gîtambaa gîa gûcuuria mwîrîgaani wa bantû agu athiûrûkîîrie, 18 tûtugî na ndigi cia tu twa îrema rîa Ngai na twa ome, 19 na nguo ira itumîîtwe bwega mûno cia gwîkîrwa n'athînjîri rîra bagûtûmîka Bantû ara Atheru nacio i nguo cia Arûni na aana baake.
Antû baaruta Biewa
20 Antû bonthe ba Isiraeri bauma ara Musa aarî, 21 na muntû wonthe ûra aarî na nkoro ya kwenda aareeta biewa kîrî Mwathani bia ngûgî ya îrema rîa Ngai. Baareeta into bionthe bira biendekanaga kûgonga na kûrûtha nguo i ntheru cia ûthînjîri. 22 Antû bonthe bara baarî na wendo, antû arûme na aka bonthe, beegua barî na kwîbendera. Baareetera Mwathani, tûmîcumaarî twa kwîgemia, mbucu cia matû, mbete, mîkathî ya nkingo, na mîthemba yonthe ya into bia kwîgemia bia thaabu. 23 Antû bonthe bara baarî na ndigi cia rangi ya mburuu, ya ûkûyû, na intuune, gatani inthongi, guaya ya mbûri, rûûo rwa ntûrûme rûûtagute na rwakwa rangi întuune, na ndwara cia nyamû ira nene cia îria, baareeta. 24 Muntû wonthe ûra aarî na kîewa gîa fetha kana yîûmba rîra rîrûthaga gîkama, na muntû wonthe ûra aarî na mbaaû cia mûgaa ciûmba gûtûmîka baarutîra Mwathani kîrî kîewa. 25 Na aka bonthe bara baûmbaga gûtuma na njara ciao, baareeta bira baûmbaga gûtuma na ndigi cia rangi ya mburuu, cia rangi ya ûkûyû, na guaya ya rangi întuune na gatani înthongi. 26 Aka bonthe bara baarî na wendo beenda guaya ya mbûri. 27 Atongoria baareeta maiga mara meetagwa Kanari na maiga mangî ma goro ma gwîkîrwa ebondiini na nguoni ya kîbara ya mûthînjîri ûra mûnene wa Ngai, 28 na tûnyamû tûra tûnuunkaga bwega, na maguta ma mîceituuni ma gwakana, na macoco mara manuunkaga bwega. 29 Antû bonthe ba Isiraeri bara baarî na nkoro cia kwenda baareetera Mwathani biewa bia kûruta ngûgî îra Mwathani aathîîte Musa îrutwe.
Aruti ngûgî ba kûrûtha Îrema rîa Kûrîîkana
30 Musa eera antû ba Isiraeri, “Mwathani n'athuurîîte Mbesareri mwana wa Uri na mwana wa mwana wa Ûri wa mwîrîga wa Njunda. 31 Na namûûyûrîîtie Kîrundu wa Ngai, ûûmbi, ûûgî, ûmenyo na waara bwa mîthemba yonthe, 32 na kûûmba kûthuuranîra mîbango îmîega, na gwaka agîtûmagîra thaabu, fetha na yîûmba ta rîra rîrûthaga gîkama, 33 na kûûmba gûcaa maiga ma gwîkîra gûntû, na gûcaa mîtî na mawaara ma mîthemba yonthe. 34 Mwathani naneenkerete Mbesareri na Ooriabu mwana wa Aisamaki wa mwîrîga wa Ndani, ûûmbi bwa kûrutana antû bangî waara bûbu bwao. 35 Mwathani n'abanenkereete ûûmbi bwa mwanya mwanya bwa kûgemia itambaa, bagîtûmagîra ndigi cia rangi ya mburuu, ûkûyû na întuune; gatani ira nthongi, na ngûgî ingî cia waara.