Maathana maanenkanîrwa kaîrî
(Kûri 10:1-5)
34
1 Mwathani eera Musa, “Caa mbaariû iingî ciîrî cia maiga ta ira cia mbere, naani nkaandîka mbaariûni inu biugo wa bira ndaandîkîîte kîrî ira cia mbere, ira waarebûrire. 2 Îîthuuranîre gûûye kîrîmaani gîa Sinai rûû rûkîîrî, ûrîîkane naani kîrîmaani îgûrû. 3 Gûtikaagîte muntû bûgaatwa n'we kîrîma, kana muntû wonekana mbarî nwa îrîkû ya kîrîma gîku, na gûtikaagîte ng'ondu, mbûri kana ng'ombe ikeegua ikîrîa akubî na kîrîma gîku.” 4 Kwoogu Musa aacaa mbaariû ciîrî cia maiga wata ira cia mbere, na rûûni rûkîîrî aatwa kîrîmaani gîa Sinai, wa ta bûra Mwathani aamwathîîte, akamatîîte cio na njara. 5 Rîru Mwathani eendama arî gîtugîîni gîa îtu, aarûngama mbere ya Musa na aagweta riîtwa rîake, “Mwathani.” 6 Aakûrûkîîra mbere ya Musa na auga, “Niû, Mwathani, ndî Ngai ûra aûyûrîîtwe i kîao na wega, ûra atathûûrangaga na mpwî na oonanagia wendo bûra bûtathiraga na gwîtîgîka kûûnene. 7 I mbonagia antû baingî wendo bûra bûtathiraga rîonthe na nkarekera moothûûku, ûremu na meeyia ma mîthemba yonthe, îndî ngakinyithîria antû maciaro ma meeyia ma bara baanthwîre mwanka rûciaro rwa ithatû na rwa inya.” 8 Musa aatiirithia ûthiû nthî na mpwî aagonga Mwathani, 9 na auga, “Mwathani wegua ngûkenagia, itû Mwathani ngûkwereka îtîgîîria kûthiiyania naati. Wana wegua antû baba i baakangau, tûrekere mabîtia na meeyia meetû na ûtwîtîgîîrie tûrî rûgai rwaku.”10 Mwathani eera Musa ata rî: Îîndî inkûrûtha kîrîîkanîro na antû ba Isiraeri. Nkaarûthaga mantû ma kûrigarania gatîgatî keenu, mantû matoorooneka kaîrî nthîgûrû kana mîgongooni îîngî. Na antû bonthe bakoona mantû mara, niû Mwathani, mbûûmba kûrûtha, n'ûntû nkabûrûthîra mantû ma kûmakania. 11 Athîkîraani mawatho mara nkûbûnenkera îmunthî. Nkeengatia Aiti, Angirigasi, Amori, Akanaani, Aperisi, Aibi na Anjebusi mbere yenu. 12 Îîmenyeereni bûtikaathi kûrûtha irîîkanîro na antû ba nthîgûrû îra bûthiîte, giria ûgaatuîka mûtego kîrî biû. 13 Bwomorange ithînjîro biao, buunange itugî biao bira bagoongaga na bûtemange mîbuanaano ya Asera. 14 Bûtikaagonge ngai îîngî, n'ûntû Niû Mwathani, ndî Ngai wa rûriitho. 15 Bûtikaige irîîkanîro na antû ba nthîgûrû înu n'ûntû bûkagîa nthungurumi nabo bakabûthûûkia bûthi nabo kûgonga ngai inu ciao na kûrîa irio bira barutîrîte ngai inu. 16 Na kaîrî, nthaka cienu nwa ithi kûgûra aarî babu ageni, nabo bagatûma batuîka t'etîgua kîrî niû na bakagoonga ngai cia ûrongo. 17 Ûtikeerûthîre kana ûgoonga ngai cia gûtura. 18 Ririkanagaani gûkûngwîra kîatho kîa Mîgaate îtarî miimbithie, wa ta bûra ndaabwathire. Gwa kagiita ga ntugû mûgwanja bûrîîyage mîgaate îtarî na ndawa ya kwimbithia. Bûrûthage ûgu kagiita kara kaagîrîte, mweriini wa Abibu, n'ûntû ûyu nuu bwaumire Miisiri.
19 Kîîmbere kîa muntû mûrûme na kîa nyamû cia ndîîthia i biakwa. 20 Îndî kîîmbere kîa îng'ooi kîbatîîrue gûkûûrwa na kagondu, na wegua ûtirîkûûra ûriune nkingo. Na ûkûûrage kîîmbere kîa muntû mûrûme.
Gûtikaagîte ûkaaya mbere yakwa njara i ntheri atarî na kîegwa.
21 Rutaga ngûgî ntugû ithanthatû îndî ya mûgwanja ûnogokage; wana wegua i kagiita ka marîma kana ka maketha.
22 Ririkanaga gûkûngwîra kîatho kîa Maketha, na maciaro ma mbere ma ngano, na kinya kîatho gîa kwîthîrania maketha mûthiani wa mwanka.
23 Maita mathatû woora mwanka antû arûme ba Isiraeri bakaayaga mbere ya Mwathani Ngai, Ngai wa Isiraeri. 24 Nkeengatia mîgongo mbere yenu na mbaramie mîanka, na gûtirî we akaageria kûthûkia mînda yenu rîra bûkaamîrûûkagîra bûûngonga maita mathatû woora mwanka magiita ma biatho.
25 Ûtikaarutanîrie nthakame ya kîgongwana kîra ndutîritwe kîrî amwe na gîntû kîonthe kîrî na ndawa ya kwimbithia, na ûtikaareke kîgongwana nwa kîmwe gîa kîatho gîa Pasaka kîraara mwanka rûûni rûkîîrî.
26 Reetaga maciaro ma mbere ma mîînda yenu nyomba yakwa Niû Mwathani Ngai wenu.
Ûtikaaruge kabûri na îria rîa gina.
27 Rîru Mwathani eera Musa, “Andîka biugo bibi n'ûntû ndîrûtha kîrîîkanîro gîakwa naawe na kinya antû ba Isiraeri.” 28 Musa aakara naagu kîrîmaani na Mwathani ntugû mîrongo îna mûthenya na ûtugû atakûrîa kana anyua nwa mbi. Aandîka mbaariû ira biugo bia kîrîîkanîro, namo i mo maathana mara îkûmi.
Ûthiû bwa Musa bwatua kûyica
29 Rîra Musa aagûrûkire kuuma kîrîmaani gîa Sinai akamatîîte maathana mara îkûmi, ûthiû bwake i bwayicaga n'ûntû i baaragia na Mwathani, îndî we ataamenyaga. 30 Rîra Arûni na antû bara bangî baaraithire Musa boona ûthiû bwake i bwayicaga nabo baakuthûka kûthi aakubî n'we. 31 Îndî Musa eeta Arûni na atongoria bara bangî ba antû baathi kîrî we na Musa abaarîria. 32 Nyuma ya ûgu antû bonthe ba Isiraeri bamwîthîranîra, n'we abanenkera mawatho monthe mara Mwathani aarî akûmûnenkeera kîrîmaani gîa Sinai. 33 Rîra Musa aarîîkiirie kûbaarîria, aakunîka ûthiû bwake na gîtambaa. 34 Warîra rîonthe Musa aathiiyaga îremaani mbere ya Mwathani neeguûraga ûthiû. Na aumagarûka, akeera antû ba Isiraeri mantû monthe mara Mwathani aamwathîîte abeere. 35 Nabo bakoona bûra ûthiû bwake bwayicaga. Rîru akaguîkîra ûthiû bwake mwanka rîru rîngî akaathi kwaria na Mwathani.