Aisiraeri bauma kîrîmaani gîa Sinai
33
1 Mwathani eera Musa, “Umaani aaga woû na antû bara waarutire Miisiri, bûthi mwanka nthîgûrû îra ndeeranîîre na Îburaîmu, Isaka na Njakubu ndabeera, ‘Nkaanenkera nciarwa cienu yoo.’ 2 Ngaatûma mûraîka athi arî mbere yenu na mbîîngatie antû ba Kanaani, Amori, Aiti, Aperisi, Aibi na Anjebusi. 3 Îthiini mwanka nthîgûrû înu yûûyûrîîte îria na ûkî. Îndî ntiithi naabi n'ûntû bûrî antû eekumia na auni watho na ndaûmba kûbûthirîria njîraani.” 4 Rîra antû beegiire mîgambo înu mîrito, baaminûka na gûtirî we eekîra into bia kwîgemia. 5 Baarûthire ûgu n'ûntû Mwathani eerîîte Musa, “Îra antû ba Isiraeri, ‘Bûrî antû baûmo biongo. Nkathiiyania naabi kinya gwa kagiita kaniini, ndaûmba kûbûthiria. Îndî arûraani into bienu bia kwîgemia mbone bûra ngûtua îgûrû rîenu.’ ” 6 Kwoogu antû ba Isiraeri baatiga gwîkîra into bia kwîgemia kuuma barî kîrîmaani kîa Orebu kûthi mbere.aÎrema rîa Kûrîîkana
7 Rîra rîonthe antû ba Isiraeri baambaga marema, Musa aathûkagia akaamba îrema ome ya kambî. Îrema rîru rîetagwa, “Îrema rîa kûrîîkanaga.” Na muntû akîenda kûmenya ûntû kuuma kîrî Mwathani aathiiyaga agu îremaani rîru ome ya kambî. 8 Rîonthe rîra Musa aathiiyaga îremaani rîru, antû bonthe baarûngamaga mîrangooni ya marema maao baraithîîrîîtie Musa mwanka rîra akaathûngîra ndeeni ya îrema rîru. 9 Rîra Musa aathûngagîra îremaani, gîtugî gîa îtu kîendamaga gîgakara mûrangooni wa îrema, n'we Mwathani akaaria na Musa. 10 Na antû boona gîtugî gîku gîa îtu kîrûûngamîîte mwîrangooni wa îrema, woora muntû aarûngamaga agakuamîîria mwîrangooni wa îrema rîake. 11 Mwathani aaragia na Musa ta bûra muntû aaragia na mûcoore wake bacûûbeene, meetho kwa meetho. Rîru Musa agacooka kambîîni. Îndî nthaka îra yamûteethagîîria, Njosua mwana wa Nuni, yoo îtaumaga îremaani.
12 Musa eera Mwathani, “I mma nûmbîîrîîte ntongoreerie, îndî ûtireenda menya ûra ûgaatûma tûthi n'we. Ûmbîîraga atî n'ûmbiyî na riîtwa na ingûkenagia. 13 Îndî wegua ingûkenagia, mbîîra mîbango yaku kaingo nkûmenya na nthi mbere gûgûkenia. Na ûkîririkanaga n'ûthuurîîte mûgongo ûyû ûtuîka waku.” 14 Mwathani auga, “Nkaathiyania naawe na ngaatûma ûnogoka.” 15 Rîru Musa amwîra, “Ûkeegua ûtiithiiyania naati, ûtikaareke tuuma aaga. 16 N'ata muntû aûmba kûmenya wegua niû kana antû baaku itûgûkenagia wegua ûtiithiiyania naati? Kwîgua ûrî naati gûkoonania mûkûûrani wetû na antû bara bangî bonthe ba nthîgûrû.”
17 Mwathani eera Musa, “Nkaarûtha wa ûgu bungwa ûkuuga n'ûntû inkwiyî bwega na n'ûnkenagia.” 18 Musa aaromba Mwathani amwîra, “Itû mbîtîgîîria mbone mwago waku.” 19 Mwathani amûcookeria, “Ngaatûma wega bwakwa bunthe bûkûrûkîîra mbere yaku na nkaagweta riîtwa rîakwa, ‘Mwathani’, na kîrî ûra nkaathuura kûmwonia wega nkamwonia na kîrî ûra nkaathuura kûmwonia kîao n'we nkamwonia. 20 Îndî ûtiona ûthiû bwakwa n'ûntû gûtirî muntû ûmbona athi na mbere kwîgua arî mwoyo.” 21 Rîru Mwathani amwîra kûrî na bantû atarî araaya kuuma aaga ndî, ara ûûmba kûrûûngama iigaani. 22 Mwago wakwa ûgîkûrûkîîra agu ûkeegua ûrî, ngakûthûngîria mbacaacîîni na ngûkunîkîre na njara yakwa mwanka ngûkûrûke. 23 Rîru nkaarutaruta njara yakwa na ûkoona mûgongo wakwa; îndî ûthiû bwakwa bûtibatîîrue bwonwa.