Kuuma 32

Ncamba ya thaabu

(Kûri 9:6-29)

1 Rîra antû boonire Musa agûkara kîrîmaani mûno atakûgûrûka, beethîranîra Arûni bamwîra, “Tûrûthîre ngai ira igaatûtongoragia n'ûntû tûtiiyî muntû ûyû Musa, ûra aatûrutire Miisiri akarîîte.” 2 Arûni abeera, “Rutaani mina cionthe cia thaabu ira irî matû ma eekûrû beenu, nthaka cienu na aarî beenu bûûndeetere.” 3 Kwoogu antû bonthe baaruta mina ciao cia thaabu cionthe baaretera Arûni. 4 Aathûkia mina inu cia matû acikaanjûra na mwanki. Aarûtha thaabu înu nkaanjûku na yaagîa na mûûmbîre ta wa ncamba. Antû ba Isiraeri bauga, “Îno n'yo ngai yetû, îra yaatûrutire Miisiri.” 5 Rîra Arûni oonire ûgu, aaka kîthînjîro mbere ya njaû înu na augîîria auga, “Rûû tûkeegua tûrî na kîatho gîa gûtîîya Mwathani.” 6 Rûûni rûkîîrî antû baaruta igongwana bia kûbîîthia na mwanki na bia ngwatanîro. Baakara nthî kûrîa na kûnyua, baacooka baûkîra kwina na gwîkenia.

7 Rîru Mwathani eera Musa ata rî, “Gûrûkaanga na mpwî n'ûntû antû baaku bara warutire Miisiri i barûthîîte ûntû bwa ûmaramari. 8 Nthûti îmwe bagûtiga njîra îra ndaabaathire, bathingata beerûthîra njaû ya thaabu, bamîgoonga na bamîrutîra igongwana. Bariuga, ‘Îno n'yo ngai yetû, îra yaatûrutire Miisiri.’ 9 Imbiyî bûra antû baba barî baûmo biongo. 10 Na îîndî ûtikaagerie gûûnkaania. Inthûûri i bo na i nkûbathiria. Rîru woû ngûtuîkithie na nciarwa ciaku mûgongo ûmûnene.”

11 Îndî Musa aathaitha Mwathani Ngai wake amwîra, “Mwathani wonokiirie antû baba kuuma Miisiri na inya înene. Îîndî ûtikaathûûre ûbathiria. 12 Ûkabathiria antû ba Miisiri bagaatua kuuga atî waarutire antû baba Miisiri kaingo ûthi kûbaûragîra irîmaani ûbathiria cwe? Tiga kûthûûra mûno. Garûra mathûgaania maaku ûtîîre kûreetera antû baba baaku ûthûûku bûbu ûkwenda kûbareetera. 13 Ririkana aruti ngûgî baaku Îburaîmu, Isaka, na Njakubu, bara waneenkeere wîrane ûkîthiîtagia wauga, ‘Ngaatûma nciarwa ciaku ciingîe ta nthata cia îgûrû na nkaanenkera nciarwa ciaku nthîgûrû îra ndaiganîîre wîrane nabo ndauga îîgue rûrî rûgai rwao tene na tene.’ ” 14 Kwoogu Mwathani eegwata, na ataareeteera antû baake ûthûûku bûra aabaangîîte kûbareetera.

15 Musa aagûrûka kîrîmaani akamatîîte mbaariû ira ciîrî cia maiga ciandîkîîtwe maathana mbarî irî ciîrî. 16 I Ngai wengwa aarûthîîte mbaariû inu na mwandîko warî wake wengwa, n'we aandîkîîte maathana îgûrû rîacio. 17 Rîra Njosua, ûra baarî na Musa eegiirue îyogo rîa antû bakiugîîria eera Musa, “Kûrî na gîtuma kîa ndûa naara kambî.” 18 Musa amwîra,

“Inu itigûkara ta nkururo cia antû bacindanîîte,

kana kîrîro gîa antû barî bacinde;

kîra nkwîgua niû n'îyogo rîa antû bakiina.”

19 Rîra Musa aakinyire akubî na kambî oona njaû îra na antû bakiinaga, Musa aamuntwa i nkoro aaturania mbaariû ira aakamatîîte nthî agu nkona ya kîrîma ciarebûkaanga. 20 Aathûkia mûbuanaano ûyu wa njaû baarûthîîte acurîrîkîra na mwanki, acuthia watuîka mûtu ûmwinyu na aumincaminca rûûyîîni. Rîru aakaîrîîria antû ba Isiraeri kûnyua rûûyî rûru. 21 Musa aûria Arûni, “I ka antû baba barakûrûthire ata, n'ûntû ûra batongoreerie kûrûtha wîyia bûneneete ûûgû?” 22 Arûni amûcookeria, “Itû mûnene wakwa tiga kûnthûûrîra, wana woû nwiyî bûra antû baba beerutanagîria rîra baabanga kûrûtha mantû maathûûku. 23 Barambîîrire, ‘Tûrûthîre ngai ira igaatûtongoragia n'ûntû tûtiiyî muntû ûyû Musa, ûra aatûrutire Miisiri arakarire,’ 24 naani ndabeera, ‘Muntû wonthe arî na thaabu arute.’ Baanenkera thaabu, ndamîgera mwankiini, na mûbuanaano ûyu wa njaû wauma ku!” 25 Musa oona antû baatua kûrûtha wa bûra bakwenda n'ûntû Arûni n'aarî akûbatiganîria baagîa îgi mbere ya anthû baao. 26 Kwoogu Musa aarûngama mwîrîgaani wa kambî auga, “Ûra arî mbarî ya Mwathani naaye aaga ndî.” Na Arawi bonthe baathi beethîrana agu aarî. 27 Rîru abeera ata rî, “Mwathani Ngai wa Isiraeri aathana ûûgû: Woora muntû n'akûûre rûûyiû rwake agiitanîîrie kambî, acaangacaange kuunthe akîûragaga aruagina, acoore, na atûûri baake.” 28 Arawi baathîka na baûraga antû ta ngiri ithatû. 29 Musa auga, “Îmunthî bûkwîbathûra bwatuîka ba Mwathani n'ûntû woora ûmwe wenu narûûngamire kiuthatî na nthaka cienu, aruanyûkwe na Mwathani nabûthaarimire.”

30 Rûûni Musa eera antû, “I bûrûthîîte wîyia bûûnene mûno. Îndî îîndî i ngûtwa kîrîmaani nthi kîrî Mwathani ndombe mbone wegua bûkaarekerwa wîyia bwenu.” 31 Musa aathi kîrî Mwathani amwîra, “Antû baba i barûthîîte meeyia maathûûku mûno. Barûthîîte ngai kuuma kîrî thaabu na bamîgoonga. 32 Itû barekere meeyia maao, îndî wegua ûtibarekera î buuta riîtwa rîakwa kuuma îbukuuni rîra wandîkîîte mariîtwa ma antû baaku.” 33 Mwathani acookeria Musa amwîra ata rî, “Ûra ûmbîtîrîtie n'we nkaabuuta kuuma îbukuuni rîakwa. 34 Îîndî îthi ûtongoreerie antû kûthi gûntû kûra ndaabwîrire na mûraîka wakwa akeegua arî mbere yaku. Îndî îgiita rîakinya nkabaa îkaanûkia n'ûntû bwa wîyia bwao.”

35 Kwoogu Mwathani aatûmîra antû mûrimo n'ûntû bwa gûtûma Arûni arûtha njaû ya thaabu bamîgoonga.