Igongwana bia Îrema rîa Ngai
25
1 Mwathani eera Musa atarî: 2 Îra aana ba Isiraeri bandetere kîewa. Ûnthûkîrie kîewa gîku kuuma kîrî muntû wonthe ûra arî na nkoro ya kwenda. 3 Na bibi i bio biewa bira ûgeetagia antû; thaabu, fetha na rûthuku; 4 Ndigi cia rangi ya mburuu, ya ûkûyû, na ndigi intuune; gatani inthongi; guaya ya mbûri, 5 rûûo rwa ntûrûme rûûtagute na rwakwa rangi întuune na ndwara cia nyamû ira nene cia îria na mbaaû cia mîgaa. 6 Maguta ma wîkîra taani; mîtaa îra înuunkaga bwega kûrûtha maguta ma wîtûûranîria; macoco mara manuunkaga bwega; 7 maiga ma goro meetagwa ondiriki, na mangî ma gûtumîîra ebondiinia na kaguoni ga kîbara. 8 I baandûthîre bantû aatheru agûkara, kaingo ntûûra gatîgatîîni kaao. 9 Bûkaandûthîra gîkaro gîakîîtwe na îrema amwe na into bira bigeekîrwa ku kûringana na bûra bungwa ngaakwonia.Îthandûkû rîa Maathana
10 “Rûthaani îthandûkû rîa maathana na mbaaû cia mûgaa rîa ûraaya bwa, biiti ithatû na inci kenda, wariî bwa biiti ciîrî na robo, na ûraaya bwa wîtia bwa biiti ciîrî na robo. 11 Na ûrîkaande na thaabu îtaunganîîtue na gîntû kîngî, nja na ndeeni, na ûrîthiûrûkîîrie kamûturuurwa ka thaabu nteere cionthe. 12 Na ûcooke ûrîturîre iguatû bina bia thaabu, na ûbiîkîre magûrûûni maarîo marî mana. Iguatû biîrî mbarî îmwe na biîrî mbarî îra îîngî. 13 Na nyuma yoogu ûthuuranîre mîtî îîrî ya gûkamata ya mûgaa na ûmîkaande na thaabu 14 na ûmîthûûngîrie iguatûûni bira biarî mbarî irî ciîrî cia îthandûkû. Îgaatûmagîrwa kûrîkamata. 15 Mîtî îno ya gûkamata îbatîîrue îkara iguatûûni bia îthandûkû; na îtigacomoorwe ku. 16 Rîru wîkîre mbaariû ciîrî cia maiga ira ngaakwa, ira ciandîkîîtwe maathana.
17 “Ûrûthe nkunîki ya îthandûkû rîa maathana, îra yîîtagwa gîtî gîa kîao, na thaabu îtaunganîîtue na gîntû kîngî ya ûraaya bwa biiti ithatû na inci kenda na wariî bwa biiti ciîrî na robo. 18 Naawe ûrûthe akerubi baîrî ba thaabu; ûbeekîre mîthiani ya gîtî gîa kîao îrî îîrî. 19 Na ûrûthe kerubi îmwe îkare mûthiani ûmwe, na kerubi îra îngî ya gûkara mûthiani ûra ûngî; wa îra kerubi îkeegagua îgwateene na mûthia wa gîtî gîku gîa kîao. 20 Akerûbi babu batambûrûkie mathabu maao maguîkîre gîtî gîa kîao namo, beerekanîrîîte, moothiû maao makare maraithîîte gîtî gîku gîa kîao. 21 Wîkîre maathana mamu ngaakwa îthandûkûûni, rîru waigîîre gîtî gîku gîa kîao îgûrû. 22 Na agu noogo ngaakomana naawe, na mbarie naawe ndî îgûrû ya gîtî gîa kîao, agu gatîgatî ga akerubi babu baîrî barî îgûrû rîa îthandûkû rîru rîa Maathana ma Kîrîîkanîro. Nkaaria naawe mantû monthe mara ngaakwa marî maathana n'ûntû bwa antû ba Isiraeri.
Meetha ya mûgaate wa kîgongwana
23 “Na ûtume meetha ya mbaaû cia mîgaa, ya ûraaya bwa biiti ithatû, na wariî bwa biiti îmwe na nucu, na ûraaya bwa gwîtia îgûrû bwa biiti ciîrî na robo. 24 Ûcooke ûmîkaande na thaabu îtaunganîîtue na gîntû kîngî, na ûmîrûthîre karûturuurwa ka thaabu kamîthiûrûûkîîte. 25 Na kuuma agu ûmîîkîre karûbaaû kûthiûrûkîîria mbarî cionthe, ka wariî bwa inci ithatû, na karûbaaû gaku ûcooke ûkathiûrûûkîrie na karûturuurwa ka thaabu. 26 Ûmîturîre iguatû bina bia thaabu, na ûbiîkîre magûrûûni mamu ma meetha ma koona marî mana. 27 Iguatû bibu bina biîgue birî akubî na karûbaaû gaku, kaingo biîgua birî bantû a kworokeeria mîtî înu ya gûkamataga meetha. 28 Mîtî înu ya gûkamata îîgue îrî ya mûgaa, na ûmîkaande na thaabu. Na meetha înu, îgaakamatagwa na mîtî înu. 29 Na rûtha thaani na mbakûri na njaagi na ikombe bira bigaatûmagîrwa gwîkia biewa bia biakûnyua. Bionthe biîgue birûthîîtwe na thaabu îtaunganîîtue na gîntû kîngî. 30 Bûgaatûûgagîîria mîgaate îmîtheru ya kûûndutîra meethaani mbere ya îthandûkû rîru rîa mathana rîonthe.
Gîtugî kîa thaabu gîa gûtûgîîria taa
31 “Na ûcooke ûrûthe gîtugî kîa thaabu îtaunganîîtue na gîntû kîngî gîa gûtûûgagîîria taa. Na gîtugî gîku, gîkinyithio gîakîo na kîano gîakîo kîîgue kîrî gîa gûtura. Na kîano, mpatha, tûkombe na maûa mara kîgemeetue namo, bionthe bigwateene biatuîka gîntû kîmwe. 32 Na gîcooke kîîgue kîrî na mpatha ithanthatû ikiumaga nteere cia kîo; mpatha ithatû rûteere rûmwe, na ithatû inu ingî rûteere rûru rûngî. 33 Mpathaani inu ithanthatû wa rûpatha rwaigîîrwe ikombe bithatû birûthîîtwe bikari ta maûa ma mûtî ûra wîtawa arimondi, bionthe birî bithanthatû wa kîra kîmwe wîgue kîgemeetue na maûa. 34 Na gîtugîîni gîku kîongwa kwîgue kûrî na ikombe bina birûthîîtwe na mûbuanano wa maûa ma mûtî ûyu wîtagwa arimondi, biacooka biagemua. 35 Na kwîgue kûrî na nthundo îmwe rungu rwa wa kîra mpatha ciîrî. 36 Nthundo inu, mpatha inu na gîtugî wîgue kîrî gîntû kîmwe gîturîîtwe kîa thaabu îtaunganîîtue na gîntû kîngî. 37 Na ûrûthe taa mûgwanja cia kwaigagîîra gîtugîîni gîku kaingo ikaamuntua i mûrîkaga agu mbere yakîo. 38 Tûmîgwati na tûthaani twa gîtugî gîku, twîgue tûrûthîîtwe na thaabu îtaunganîîtue na gîntû kîngî. 39 Kûrûtha gîtugî gîku amwe na into biakîo bionthe, bigaatûmîra kiro mîrongo îthatû na inya cia thaabu îtaunganîîtue na gîntû kîngî. 40 Na ûmenyeere woone ûkûbirûtha kûringana na ûûgû ngûkwonia aaga kîrîmaani.”