Aisiraeri beetîgîîria kîrîîkanîro kîa Mwathani
24
1 Rîru Mwathani eeta Musa amwîra, “Ncû aaga ndî, na bûûye na Arûni, Nandabu, Abiu, na atongoria mîrongo mûgwanja ba Isiraeri. Na antû bagonge barî gataaria. 2 I woû Musa wenka, wîtîgîîrîîtue kûûya akubî naani. Babu bangî bûrî nabo batikaaye akubî mûno naani. Na bûririkane, antû babu bangî batigeetie kîrîma.”3 Rîra Musa aarîkiirie kwîra antû biugo bionthe na mawatho monthe mara Mwathani abaete; na bonthe baambûkîîria barî amwe bauga, “Tûkaarûtha bunthe bûra Mwathani atwîra tûrûthe.” 4 Musa n'aarî akwandîka mawatho ma Mwathani monthe bwega. Rûûni rûkîîrî aaka kîthînjîro nkona ya kîrîma. Na kinya aiga itugî bia maiga îkûmi na biîrî kûthiûrûkîîria kîthînjîro, kûringana na mîîrîga îkûmi na îîrî ya Isiraeri. 5 Rîru aatûma nthaka cia Isiraeri barutîra Mwathani igongwana bia kûbîîthia, na baathînja ncamba cia kiumîri bamûrutîra igongwana bia ûkiri. 6 Musa aathûkia nucu ya nthakame amîîkîra mbakûriini, na nucu îra îngî amiinca kîthînjîrooni. 7 Rîru aathûkia îbuku rîa kîrîîkanîro aathoomera antû bakîîgagua. Nabo baacookia, “Tûkaarûtha bunthe bûra Mwathani auga, na tûkaathîka.” 8 Musa aathûkia nthakame, amiincîria antû na auga, “Îno i nthakame ya kîrîîkanîro kîra Mwathani aiga naabi kûringana na biugo bibi.”
9 Rîru Musa, Arûni, Nandabu, Abiu, na atongoria mîrongo mûgwanja ba Isiraeri baatwa kîrîmaani, 10 na naagu boona Ngai wa Isiraeri. Ruungu rwa mbayo ciake wakari ta kayîra kaaranîîtue maiga ma goro mara meetagwa Cabire na karî na rangi ya mburuu ta îgûrû rîtarî matu. 11 Îndî wana kinya wegua atongoria ba Isiraeri i boonire Ngai, ataabeenyangia, i baarîîre na baanyua barî amwe mbere yake.
Musa aakomana na Ngai kîrîmaani
12 Rîru Mwathani eera Musa, “Ncû aaga ndî kîrîmaani na weteere aaga, na ngakwa mbaariû cia maiga, ira mbaandîkîrîte mawatho na maathana mara makaabûtongoragia.” 13 Kwoogu Musa na mûteetheeria wake Njosua baûkîîra, na Musa beetaîtia kîrîmaani kîa Ngai.
14 Musa aatigîîte eera atongoria bara bangî, “Karaani aaga bûtweteere mwanka rîra tûgaacooka. Bûkaaya kwona thîîna nwa îrîkû ndaathi, bwîre Arûni na Uri, bara bûrî nabo aaga.”
15 Rîra Musa atweere kîrîmaani, îtu rîagîkunîka, 16 na ûkumio bwa Mwathani bwakara kîrîmaani gîku gîa Sinai. Îtu rîakunîkire kîrîma bantû a ntugû ithanthatû, na ntugû ya mûgwanja Mwathani eeta Musa arî îtuuni. 17 Kîrî Aisiraeri ûkumio bwa Mwathani bwonekaga bûkari ta mwanki ûkûrûngûria îgûrû kîrîmaani. 18 Rîru Musa aathûngîra îtuuni wa bûra aatwete kîrîma. Na aakara kîrîmaani ntugû mîrongo îna mûthenya na ûtugû.