Gûtua îgamba bûra kûbatîîrue
23
1 “Ûtigataambie ntheto cia ûrongo. Na ûtigaateetheerie muntû ûrî na mabîtia na njîra ya kweyana ûkûûyî bwa ûrongo. 2 Ûtikaawatanîre na mwingî mantûûni ma kûrûtha ûthûûku. Na rîra ûkaarûgama gûkûûyîîra, ûtigakombie kaingo ûwatanîra na mwingî; 3 kana ûkîîgîîria ûkûûyî bwaku ûkîendeera muntû n'ûntû i nkîa.4 “Ûkeethîra ncamba ya ng'ombe kana îng'ooi rîa mûnthû waku rîûrîîte, ûrîguutie wirîre mwene. 5 Ûkoona îng'ooi rîa mûnthû waku rîgwîte nthî na mûrigo, ûtikaamûtiganîrie narîo, mûteetheerie arîûkîîrie.
6 “Ûtikaarege gûtuîra nkîa îgamba bûra kûbatîîrue. 7 Ûtigaatuîrîîre muntû ûmûthitaanga kootiini, na ûtigaatuîre muntû kûûragwa atarî na mabîtia kana ûmwagîru, n'ûntû nkagambithia muntû wonthe ûra akaarûtha ûthûûku ta bûbu. 8 Ûtikaathûkie ngukumo, n'ûntû ngukumo gaciithaga antû meetho kîrî ûmma, igatûma bara baagîru barega gûtuîrwa bûra kûbatîîrue. 9 Ûtikainyîîrie mûgeni, i bwiyî bûra muntû eegagua arî mûgeni n'ûntû wana biû i bwarî ageni nthîgûrû ya Miisiri.
Mawatho îgûrû rîa Sabatû
10 “Ûkaanda mûnda waku na wîthîranie irio, bantû a mîanka îthanthatû, 11 îndî mwanka wa mûgwanja cureke ûnogoke na ûtuîke ngûûndû, na ûtigaakethe gîntû nwa kîrîkû kîra gîgaakûra ku. Nkîa nwa irîe kîra gîgaakûra ku, na nyamû cia kîthaka irîe bira bigaatigara. Bûrûthe woogu kîrî mînda yenu ya mîcabiibû na mîceituuni.
12 “Ruta ngûgî ntugû ithanthatû, na ûnogoke ya mûgwanja, kaingo kinya ng'ombe ciaku na mang'ooi ciûmba kûnogoka na nkombo ira iciarîrîtwe mûciî waku, na kinya ageni baûmba kûnogoka.
13 “Bwîmenyeere bwathîkîre mawatho maakwa monthe. Na bûtikaarombe ûteethio kuuma kîrî Ngai ciingî, na mariîtwa ma cio bûtikaamaweete na tûnyua twenu.
Biatho bithatû bia mwanka
(Kuuma 34:18-26; Kûri 16:1-17)
14 “Maita mathatû woora mwanka bûgaakûngwagîra biatho bithatû, n'ûntû bwa gûntîîya. 15 Kîambere i kîa mîgaate îtarî miimbithie. Gwa kagiita ga ntugû mûgwanja bûkaarîîyaga mîgaate îtarugîîtwe na ndawa ya kwimbithia, wa ta bûra ndaabwathîîte mbere. Kîatho gîkî gîkaarûthagwa wa kîra mwanka kagiitaani kara kathuurîîtwe mweriini ûra wîtagwa wa Abibu, n'ûntû mweri ûyu n'uu bwaumire Miisiri. Na gûtikaagîte muntû gûûya mbere yakwa arî njara i ntheri atarî na kîegwa.
16 “Nwa mwanka bûkûngwîre kinya kîatho kîa maketha na njîra ya kûndeetera maciaro ma mbere ma maketha meenu ma bira bwandire mîndaani. Kaîrî bûgaakûngwîra kîatho kîa maketha ma matunda ma mûthia wa mwanka, bwarîîkia kwîthîrania irio bienu kuuma mîndaani.
17 “Kîrî maita mama mathatû wa mwanka, muntû mûrûme wonthe ndeeni ya Isiraeri nwa mwanka aaye mbere yakwa niû Mwathani Mwene Inya.
18 “Ûtikaarutanîrie nthakame ya kîgongwana kîra ndutîrîtwe kîrî amwe na gîntû kîonthe kîrî na ndawa ya kwimbithia. Kana maguta ma kîgongwana maraarua matarî mabîîthie mwanka rûûni rûkîîrî.
19 “Reetaga maciaro ma mbere ma mînda yenu Nyomba ya Mwathani Ngai wenu.
“Ûtikaaruge kabûri na îria rîa gina.
Mawîrane na mawatho
20 “Ngaatûma mûraîka mbere yaku, kaingo agakûmenyeera njîraani na akuire mwanka bantû ara nkûthuuranîrîte. 21 Îîmenyeereni mbere yake, na bûthikîîrie kayû gaake; na bûtikamûûmîrie bûmûkararia, gîtûmi atibûrekera mabîtia meenu, n'ûntû i mwete watho. 22 Îndî ûkaaya kûthikîîria kayû gaake bwega, na kûrûtha monthe mara nkuuga, ngaatuîka mûnthû wa anthû baaku, na nkaaregana na bara bareganaga naawe. 23 I kwîthîrwa mûraîka wakwa akaathi arî mbere yaku, na agûkinyithie nthîgûrû ya Amori, Aiti, Aperisi, Akanaani, Aibi na Anjebusi, nani nkabathiria buru. 24 Ûtikendamîîre ngai ciao kana ûcigonga kana ûthingata mantû mara barûthaga. Îndî nwa mwanka ûciînyangie na uunange ûcuncî tûcuncî mîbuanaano yao ya itugî bia kûgongera. 25 Nwa mwanka ûntûmîkîre n'yû Mwathani Ngai waku. Na wona bwarûtha ûgu, nkabûthaarima na irio na rûûyî, na nkabwaiga bûrî na ûgima bwa mîîrî. 26 Gûtiîthîrwa kûrî na kûruta nda kana kûthaata gatîgatîîni keenu, na nkabwaa ûtûûro bûûraaya, na bûûyûru.
27 “Ngaatûma antû bara barî nthîgûrû îra bûthiîte kwithûkîra bagîa ûguaya, na ndigicanie bonthe bara bakaarûa naabi ngîtûmaga anthû beenu babûkuthûka na baugia rwîro. 28 Ngaatûma ûguayaa mbere yenu kaingo Aibi, Akanaani na Aiti babûkuthûka bathi. 29 Îndî ntiirûtha ûgu na mwanka ûmwe n'ûntû nthî înu îgaatuîka rwanda, na nyamû cia kîthaka ikaingîa i bûnyamaarie. 30 Nkaabwîngatîria bo mpoora mpoora, mwanka bûthagaye bûgane ba kûthûkia nthîgûrû îtuîke yenu.
31 “Na nkaiga mwanka wenu kuuma Îria Rîtuune mwanka îria rîa Afirisiti,b na kuuma rwanda rwa naiti mwanka muuro wa Yufîrîti n'ûntû nkaanenkanîra akari ba gûntû gûku njaraani cienu, naabi bûkabeengatia baume ku. 32 Ûtikaige kîrîîkanîro nabo kana ngai ciao. 33 Bûtikaareke batûûra nthî yenu, baaya gûtûma bûmbîtîria, n'ûntû bwagonga ngai ciao, na mma bûkaagîa mûtegooni.”