Mawatho îgûrû rîa kûreania
22
1 “Muntû akaiya ng'ombe kana ng'ondu akamîûraga kana akeendia, nwa mwanka arîe ng'ombe înu îmwe na ng'ombe itaano na ng'ondu îmwe n'yo arîe na ng'ondu inya. 2 Mwamba akaaya kûgwatwa akîbuunjia nyomba ûtugû akaringwa agakua, ûra amûriinga atirî na îbîtia rîa kûûragana. 3 Îndî ûgu gûgakarîka mûthenya, muntû ûra akeegua aûragîîte mwamba akeegua arî na îbîtia rîa kûûragana.“Mwamba ûra akaagwatwa akiiya, nwa mwanka arîe into bionthe bira biiye. Na wegua into bitiûmba kûrîîka, mwamba ûyu akeendua ta nkombo kaingo into bibu birîîgwa. 4 Muntû akaiya ng'ombe kana îng'ooi kana ng'ondu na nyamû înu îkoonekana îrî mwoyo, muntû ûyu aiyîîte akarea maita maîrî ma îrîi rîa nyamû înu.
5 “Muntû akarekia nyamû ciake cia ndîîthia irîîte mûndaani kana mûndaani wa mîcabiibû ikaûra ikathi ikarîa irio mûndaani wa muntû ûngî, akaarea acaara înu na irio biake bira biega nkûrûki kuuma mûndaani wake kana mûnda wa mîcabiibû.
6 “Muntû akamuntia macuuo mûndaani wake nau ûgataamba na rwinci ûkathi mûndaani wa muntû ûngî, na ûkabîîthia irio bira birî ku kana biketheetwe biogwa muntû ûra ûmuntiirie mwanki n'we akaarea irio bibu bionthe.
7 “Muntû wonthe ûra ageetîgîîria kwaigîra muntû mbia kana into na biiywe birî nyomba yake, muntû ûra aiyîîte akaaya kûwatwa akaarea maita maîrî. 8 Îndî mwamba ûyu akarega kûwatwa, muntû ûra araigîîte into akaareetwa akubî na Ngaia oonekane wegua naiyîîte kana atiiyîîte into bia mûtûûri ûyu.
9 “Îgambaani rîonthe rîa matheta îgûrû rîa into, wîgue i rîa ng'ombe, mang'ooi, ng'ondu, nguo, kana gîntû kîonthe kîra wîgua kîûrîîte, na woora ûmwe wao akiugaga i gîake, antû babu bakûthetera into barî baîrî bakairwa mbere ya Ngai. Na ûra agaatuîrwa i Ngai n'aiyîîte, akaarea ûyu ûngî maita maîrî.
10 “Na muntû akaithia mûtûûri wake îng'ooi, ng'ombe, ng'ondu, kana nyamû îngî, na nyamû îra îgakua kana îkagurarua kana îgataîgwa, îndî wîgue gûtarî na mûnkûûyî, 11 barî baîrî bakairwa mbere ya Mwathani, athiîtie kwonekane ataiya into bia mûtûûri wake. Mwene bio ageetîgania na mûthiîtio ûyû, atiirîwa acaara înu. 12 Îndî ûkeegua i ka îraiyîîtwe, muntû ûyu ga akaarîa mwene. 13 Na wegua i ka îrarîîrwe i nyamû cia kîthaka, muntû ûyu abatîîrue kûreeta marîîrwa ta marî ûkûûyî na atiirîua yoo.
14 “Muntû akaromba mûtûûri wake nyamû n'yo îkagurarua kana îgakua mwene atarî oogo, n'akaarea ûgûri bwa yo bungwa bûra bûbatîîrue. 15 Îndî wegua mantû mamu maakarîka mwene arî oogo, atibatîîrue arîwa. Ûkeegua nyamû înu n'îraarî înkombore, mbia ira ciamîkomboreete i cio igaatuîka îrîi ria nyamû înu.
Mawatho ma mîkarîre na ma ndiini
16 “Muntû akeeneeria mwarî ûtaamaama na muntû mûrûme na atagûkeethua agûrwa i muntû ûngî na akamaama n'we, nwa mwanka araayie na athûkie mwekûrû wake. 17 Îndî îthe akarega agûrwa n'we, nwa mwanka arîee îthe mbia iganeene na rûraayio rwa mwarî ta ûyu ûtaamaama na muntû mûrûme.
18 “Mûka wonthe ûra arogaga n'aûragwe.
19 “Muntû wonthe ûra akaamaama na nyamû n'wa mwanka aûragwe.
20 “Muntû wonthe ûra akaarutîra ngai cingî kîgongwana tatiga Mwathani nwa mwanka athirue cwe.
21 “Bûtikaathûûkie kana bwinyîîria ageni na njîra nwa îrîkû. Ririkanaani, wana biû bwingwa kûrî îgiita bwarî ageni nthîgûrû ya Miisiri.
22 “Bûtikainyîîrie ntigwa kana nkîa, 23 n'ûntû wona bwarûtha ûgu baandîrîra, gûtirî kîgiria mbîgua kîrîro kîao, 24 na mûthûûro wakwa wankane ta mwanki, na ntûme bûûragîrwa ndûani; na eekûrû beenu batigwe barî ntigwa, na aana beenu batigwe batarî na beethe.
25 “Ûgakoobithia muntû ûmwe wa antû baakwa ûra arî nkîa gatîgatî keenu mbia, ûtigaakare ta mûkoobithania ûra eetagia baita; na ûtikaamûrandûke na baita. 26 Ûkathara mûtûûri waku nguo îrî ya kûrûngamîîra îrandû, nwa mwanka ûmûcookerie mbere riûa rîtirathûa, 27 n'ûntû nguo înu nwa yoo yonka arî. Ga ûkûthûgaania i mbi akeeguîka? Rîra akaandîrîra, nkamwîgua n'ûntû ndî wa kîao.
28 “Ûtikaarume Ngai, kana ûruma mûnene wa antû baaku. 29 Ûtikaarege kûruta biegwa bia rwîrua rwaku rwa mbere rwa irio na biakûnyua. Na ûkaaruta îrîi rîa gûkûûra mwana waku wa mbere wa muntû mûrûme. 30 Na nwabu ûkaarûtha woogu kîrî ng'ombe na ng'ondu ciaku; ûkaareka gakare na gina ntugû mûgwanja, rîru ntugû ya inyanya ûmpe ko. 31 Naabi bûgaatuîka antû baakwa baatheru. Kwoogu bûtikaarîe marîîka ma nyamû yûûragîîtwe i nyamû cia kîthaka; gereraani mo kurû.