Bûra nkombo ibatîîrue kûrûthîrwa
(Kûri 15:12-18)
21
1 Îra Aisiraeri mawatho mama, 2 “Ûkagûra nkombo ya muntû mûrûme Mûibirania wacienu, agagûtûmîkîra mîanka îthanthatû, na mwankaani wa mûgwanja akaarekeerua athi atakûrea nwa mbi. 3 Ûkeegua ataagûreene agîtuîka nkombo gwaku, atibatîîrue athi na mûka, îndî wegua n'agûreene agîtuîka nkombo gwaku, nwa athi na mwekûrû wake. 4 Ûkeegua mûnene wake amwete nkombo îmwe ya mwarî îtuîka mwekûrû wake, na bakagîa na aana ba aarî kana ba antû arûme, mwekûrû ûyu na aana babu bakeegua barî ba mûnene, na muntû ûyu nkombo athi wenka. 5 Îndî nkombo înu îkauga n'yendeete mûnene wayo, mwekûrû na aana baake, na îtikwenda kûrekeerua îthi, 6 rîru mûnene wayo akaamîthûkia amiire kîrî Ngai.a Na mûnene ûyu amîrûngamie mûrangooni rîru amîtûre gûtû na mûkua. Kuuma agu îgaatuîka nkombo ya mûnene ûyu ûtûûrooni bwa yo bunthe.7 “Muntû akeendia mwarî wake arî nkombo, atiirekeerua ta nkombo cia antû arûme. 8 Ûkeegua mwene nkombo ya mûka, ûra amîgûrîîte na amîtuîkithia mwekûrû atigûkena n'yo, nwa amîîtîgîîrie îgakûûrwa n'îthe. Îndî mwene nkombo înu atiîtîgîîrîîtue amîendia kîrî ageni, n'ûntû n'we eenyangiirie wîrane bwao. 9 Na mwene nkombo înu ya mwarî akabanga agûrwe i nthaka yake, atimûthûkia ta nkombo kaîrî îndî akaamûthûkia ta mwarî wake. 10 Mwene nkombo înu wengwa akamûgûra na agacooka akathûkia mwekûrû ûngî, atibatîîrue arega kûmwaa irio kana nguo, kana arega kûmaama n'we. 11 Akaremwa i kwingia nwa bûmwe bwa mama mathatû, mwekûrû n'etîgîîtue kûthi ta mwekûrû ûmûrekeerie atakûrîîrwa nwa mbi.
Mawatho îgûrû rîa kûgurarua
12 “Muntû nworîkû ûra akaaguraria muntû akue, kinya we n'akaûragwa. 13 Îndî ûkeegua atikwendaga na Ngai atirarigîîria ûntû bûbu bûkarîka, nwa akuthûkîre bantû ara nkaabûthuurîra. 14 Îndî muntû akaithûkîra ûra ûngî akamûûraga akîendaga, wana kinya akaugia akathi kîthînjîrooni gîakwa, abatîîrue gûkuruthûrwa akarutwa ku na akaûragwa.
15 “Ûra akaaringa îthe kana gina n'wa mwanka aûragwe.
16 “Ûra akaiya muntû, wîgue amwendeetie, kana agwatwe n'we arî njaraani ciake, n'wa mwanka aûragwe.
17 “Ûra akaaruma îthe kana gina n'wa mwanka aûragwe.
18 “Ûkeegua kûrî na ndûa na muntû ûmwe akaringa ûra ûngî na iiga kana nkundi, îndî wîgue atiramûûraga. Ûra aringirwe akeegua akaamaama ûrîrî, 19 na nyuma aûmbe gûûkîîra eekinyîîrie na mûraagi aume nja, ûra amûringîîte atibatîîrue eewa îkaanûkia. N'akaamûrîa îgiita rîru ateete na amûtuumbîrie mwanka rîra akoora.
20 “Muntû akaringa nkombo yake, ya muntû mûrûme kana ya mûka na mûraagi îgakua kuumania na kûringwa gûku, nwa mwanka apeewe îkaanûkia. 21 Îndî nkombo înu îkathiria ntugû îmwe kana ciîrî îgacooka îkabua, atibatîîrue kwegwa îkaanûkia, n'ûntû nkombo înu n'into biake.
22 “Antû bakîrûaga bakaringa mwekûrû arî mûrito na akagea na kaana gatarî gakûrû, îndî ûkeegua atiragurarua nainya, muntû ûra ûmûringîîte nabatîîrue area wa kîra mwene wa mwekûrû ûyu ageetia kûringana na bûra akûrû bageetîgîîria. 23 Îndî rîra muntû aaguraria ûra ûngî, abatîîrue apeewa îkaanûkia rîganeene na wînyagia bwake, ûkaarîia mwoyo na mwoyo, 24 riitho na riitho, îgego na îgego, njara na njara, rwayo na rwayo, 25 îbîîra na îbîîra, kîronda na kîronda kûgurarua na kûgurarua.
26 “Muntû akariinga nkombo yake ya muntû mûrûme kana ya mûka riitho rîgatûrîka, abatîîrue kûrekeeria nkombo înu ta îrîi rîa riitho. 27 Na akaringa nkombo yake ya muntû mûrûme kana ya mwarî akamîkûûra îgego, abatîîrue kûrekeerua rîrî îrîi rîa îgego.
28 “Ncamba ya ng'ombe îgatûnga muntû mûrûme kana mûka agakua, îbuîrîîte kûûragwa na maiga na nyama ciayo itikaarîîwe; îndî mwene yoo atikaûrue. 29 Îndî ûkeegua i wîthîre bwa yo gûtûngangaga antû na mwene eerwa akarega kûmîthaîka rîru yatûnga muntû akua, îbuîrîîte kûûragwa na maiga, na mwene ncamba înu akaûragwa kinya we. 30 Îndî amwe na ûgu, mwene ûyu ageetîgîîrua kûrea baine n'ûntû bwa kwonokia mwoyo wake, nabatîîrue kûrea îrîi rîonthe rîra rîkwendekana. 31 Ncamba îkaûraga kaana ga kaarî kana kaîyî, watho wa bûbu nwabu bûbatîîrue gûtûmîrwa. 32 Ncamba îkaûraga nkombo ya muntû mûrûme kana ya mûka, mwene wayo akaarea mwene nkombo icuncî mîrongo îthatû bia fetha, na ncamba yûûragwe na maiga.
33 “Muntû agatiga îrinya rîtarî rîkunîke, kana akeenja îndî akarega gûkunîka, na ng'ombe kana îng'ooi rîkagwa ku, 34 Mwene îrinya abatîîrue kûrea mwene nyamû înu. Abatîîrue kûrea mwene mbia n'we akathûkia nyamû înu nkuû. 35 Ncamba ya ng'ombe ya muntû îkaringa ncamba ya muntû ûra ûngî îgakua, babatîîrue kwendia îra îrî mwoyo bakagaana mbia na îra nkuû bakagaana nyama iganeene. 36 Îndî ûkeegua ikûraiyîkeene kana ncamba înu nîramenyeretie kûthi îkîringanaga na mwene ataamîthaîka, nwa mwanka akaarea acaara înu na kûnenkera muntû ûyu ncamba îrî mwoyo, îndî athûkie înu nkuû.