Maathana îkûmi
(Kûri 5:1-21)
20
1 Ngai naariirie biugo bibi bionthe, auga: 2 I niû Mwathani Ngai waku, ûra aakûrutire nthîgûrû ya Miisiri, naara warî nkombo.3 Ûtikeegue ûrî na ngai ûngî tatiga Niû.
4 Ûtikaarûthe mûbuanaano wa gûcaa wa gîntû n'wa kîrîkû kîra kîrî îgûrû, kana kîrî nthîgûrû, kana kîrî rûûyîîni. 5 Ûtigaaturîrie maru mûbuanano nwa ûrîkû ûcugoonga kana ûcutûmîkîra, n'ûntû n'yû Mwathani Ngai wenu, ndî Ngai wa rûriitho. Nkaagwatagwatithia aana îkaanûkia n'ûntû bwa wîyia bwa beethe mwanka rûciaro rwa ithatû na rwa inya rwa bara banthwîre, 6 îndî imbonanagia wendo kîrî nciarwa ngiri na ngiri cia bara bambeendeete na baathîkagîra mawatho maakwa.
7 Ûtikaawete riîtwa rîa Mwathani Ngai waku na mathee, n'ûntû Mwathani agaakaanûkia ûra agwetaga riîtwa rîake na mathee.
8 Ririkanaga ntugû ya Sabatû na ûmîathûre îrî ntheru. 9 Rutaga ngûgî ciaku cionthe ntugû ithanthatû, 10 îndî ntugû ya mûgwanja i Sabatû ya Mwathani Ngai waku. Ntugû înu gûtikaagîte muntû akaaruta ngûgî, eegue arî woû kana mwana waku wa muntû mûrûme kana wa mwarî, kana nkombo yaku ya muntû mûrûme kana ya mûka, nyamû ciaku cia ndîîthia, kana mûgeni ûra atwîre gatîgatîîni keenu. 11 N'ûntû Mwathani, aûmbire îgûrû, nthî, îria, na bionthe bira birî ku na ntugû ithanthatû, îndî ntugû ya mûgwanja aanogoka. Na i kîo, Mwathani aathaarimire ntugû ya Sabatû na amîtuîkithia întheru.
12 Tîîyaga abaagu na nyûkwe, kaingo ûtûûra îgiita rîîraaya nthîgûrû îno Mwathani Ngai waku agûkwa.
13 Ûtikaûragane.
14 Ûtikaathûngîîre.
15 Ûtikaiye.
16 Ûtikaarute ûkûûyî bwa ûrongo îgûrû ya muntû ûra ûngî.
17 Ûtikeerirîrie nyomba ya muntû ûra ûngî; na ûtikeerirîrie mwekûrû wake, nkombo ya muntû mûrûme kana ya mûka, ndegwa, îng'ooi, kana gîntû n'wa kîrîkû kîa muntû ûra ûngî.
Antû baaguaya
(Kûri 5:22-33)
18 Antû bonthe bakwîgua mûrurumo wa nkwa na boona mpeni ikîenia na kayû ga karumbeta na kîrîma gîgîtoogaga, antû i baamakire na bainaina n'ûguaya na baarûngama gataaria. 19 Beera Musa, “Twarîrie ûrî woû na tûkaathikîîria. Îndî Ngai atigaatwarîrie tûûya gûkua.” 20 Musa eera antû, “Menya bûmaka. Ngai n'ayîîte kûbûthima, kaingo abwîkîra ûguaya bûmûtîîya bûtikaaye kwîyia.” 21 Antû baatigwa barûngi gataaria, na Musa n'we aathengeera îtu rîru rîarî rîîyirû agu Ngai aarî.
Mawatho îgûrû rîa kîthînjîro
22 Mwathani eera Musa, “Îra antû ba Aisiraeri ûûgû, ‘Wana biû bûkwona i N'yû, Mwathani, ndaaria naabi kuuma îgûrû. 23 Bûtikeerûthîre ngai cia thaabu kana fetha bûngoonganîria nacio. 24 Bûkaambakîra kîthînjîro kîa mûthetu na bûrutîre igongwana bia kûbîîthia ku na igongwana bia ngwatanîro, igongwana bia thîîrî bia ng'ondu cienu na mbûri na ng'ombe. Bantû onthe ara ngaatûma riîtwa rîakwa rîtîîywa, nkaaya kîrî biû na mbûthaarime. 25 Na bûkaaya kûmbakîra kîthînjîro kîa maiga, bûtigaagîake na maiga maacae, n'ûntû bwatûmîra into bibi bia gûcaa bûgagîîkîra mûgiro. 26 Na kaîrî ûtigaatwe kîthînjîrooni na ngaati ûtheri bwaku bûûya kwonekana kîthînjîrooni.’ ”