Aisiraeri baakinya Sinai
19
1 Antû ba Isiraeri bakuuma Miisiri baathiire baakinya rwanda rwa Sinai ntugû ya îkûmi na itaano ya mweri wa îthatû. 2 Na bakuuma Refindimu baathiire baakinya rwanda rwa Sinai na baamba marema maao agu nkona ya kîrîma gîa Sinai.3 Rîru Musa aatwa kîrîmaani îgûrû baakomana na Ngai ku. Na Mwathani arî kîrîmaani îgûrû eeta Musa amwîra, “Ûûgû i bu ûkeera antû ba mûciî wa Njakubu, antû ba Isiraeri: 4 Biû bwingwa i bwoneete bûra ndaarûthire antû ba Miisiri, na bwona bûra ndaabûkamatîîte na mathabu ta ndiiû ndabûreeta aaga ndî. 5 Kwoogu îîndî wegua bûkambathîkîra cwe na bûmenyeere maathana maakwa, nkabûtuîkithia gantû gaakwa ka bata mûno nkûrûki ya mîgongo îra îîngî yonthe, n'ûntû nthîgûrû yonthe n'yakwa. 6 Na bûkeegua bûrî wathani bwa athînjîrî na mûgongo ûmwathûre. Biugo bibi i bio ûkeera aana ba Isiraeri.” 7 Kwoogu Musa akûgûrûka kuuma kîrîmaani aathiire eeta atongoria bonthe ba Isiraeri amwe na abeera bûra Mwathani augîîte. 8 Bonthe beetîganîîria barî amwe bauga, “Na mma tûkaarûtha bunthe bûra Mwathani atwîrîîte tûrûthe.” Kwoogu Musa aacooka kîrî Mwathani kûmwîra antû i beetîganîîrie na ntûmwa ciake. 9 Rîru Mwathani eera Musa ûûgû, “Nkaaya kîrî woû ndî îtuuni rîîkamu mûno ta rîa mbura kaingo antû baambîgua nkîaria naawe. Na antû nwa bawîtîgie kuuma îîndî ûgu na kûthi mbere.”
Musa eera Mwathani bûra antû baugire. 10 Rîru Mwathani eera Musa, “Îndama ûkathuuranîre antû bambeteere nkaaya kûbûriûngîra. Ûbatherie îmunthî na rûû, na ûbeere bathambie nguo ciao, 11 na bwîgue bwîthuuranîrîîte ntugûûni ya ithatû, n'ûntû n'yo niû Mwathani nkeendama kîrîmaani gîa Sinai antû bonthe bakîonaga. 12 Igîra antû mwanka kûthiûrûkîîra kîrîma na ûbeere batigaukûrûke batwa kîrîmaani kana baringithia nkona yakîo. Ûmma ûra akaaringithia kîrîma n'akaûragwa. 13 Na gûtikaagîte njara îmûtongithia. Îndî n'aûragwe na maiga kana arathwe na mîgwî; wîgue i muntû kana i nyamû, îtigeetîgîîrue gûtûûra mwoyo. Nwa rîra rûgoci rûkaaringwa bagaatwa kîrîmaani.” 14 Kwoogu Musa eendama kuuma kîrîmaani aathi kîrî antû, na abatheria, nabo baathambia nguo ciao. 15 Rîru n'we eera antû, “Îîthuuranîreeni kîatho kîa mathatû; na gûtikaagîte muntû ûthengeera mûka.”
16 Rûkîîrî rwa ntugû ya ithatû i kwarî na nkwa na mpeni, na îtu rîîmatu rîkunîkîîte kîrîma, na karumbeta gakîaragia nainya mûno, antû bonthe kambîîni bainaina. 17 Musa rîru n'we abatongoreeria kuuma kambîîni kaingo bakomana na Ngai, nabo baarûngama nkona ya kîrîma. 18 Kîrîma gîa Sinai kîonthe kîaguîkîîtwe i ntoogo, n'ûntû Mwathani n'endamire îgûrû yakîo arî ndeeni ya mwanki. Ntoogo yaîtagia îkiumaga kîrîmaani gîku îkari ta rûrîrîmbî rwa mwanki ûmûnene mûno, na kîrîma kîonthe kiainaina mûno. 19 Nako kayû ga karumbeta kaathi na mbere gakîneneaga. Musa aaragia, Ngai n'we akamûcookeria na mûrurumo ta wa nkwa. 20 Mwathani eendamire îgûrû rîa kîrîma gîa Sinai na eeta Musa agu îgûrû. Rîru Musa aatwa ku. 21 Mwathani amwîra, “Gûrûka na ûkaanie antû batigaakûrûke mwanka baayîîte gûncûûbîîria; n'ûntû wona baarûtha ûgu, baingî baao i bagaakua. 22 Wana kinya athînjîri ba Ngai bara bakaathiiyaga mbere ya Mwathani nwa mwanka beetherie, wegua t'ûgu mbakaanûkie.” 23 Musa eera Mwathani, “Antû wana batiûmba gûtwa kîrîma gîa Sinai, n'ûntû woû wengwa nwatûkaaniirie watwîra, ‘Îkîraani mîanka kûthiûrûkîra kîrîma na bûcuathûre ta bantû atheru.’ ” 24 Mwathani acookia auga, “Gûrûka na bûûye na Arûni. Îndî athînjîri na antû batigaakûrûke mwanka baayîîte kîrî niû, n'ûntû nkabakaanûkia.” 25 Rîru Musa aagûrûka akinya kîrî antû na abeera bûra Mwathani aabeerîîte.