Njethiro aariûngîra Musa
18
1 Na rîru, Njethiro ûra aarî mûthînjîri wa Ngai wa Mindiani, mûthonuue wa Musa, eegua mantû monthe mara Ngai aarûthîîre Musa na antû baake ba Isiraeri, bûra aabarutire bauma nthî ya Miisiri. 2 Musa agûcookia Sipoora mwekûrû wake, mûthonuue Njethiro n'amûyûkiirie, 3 amwe na twîyî twake twîrî. Kaîyî kamwe geetagwa Ngerisomu,a n'ûntû Musa augire, “Ndaraarî mûgeni nthî yaitha.” 4 Na kaîyî ga twîrî, geetagwa Erieserib n'ûntû bwa Musa kuuga, “Ngai wa ba baaba n'we wanteethiirie aambonokia ntikaûragwe i Faraû.”5 Wakarîkire ûgu, Njethiro aabanga kûthi kwa mûthonuue Musa. Aathiire na mwarî wake Sipoora mwekûrû wa Musa amwe na twîyî tûra twîrî. Bakûthi baamwîthîîre rwanda naara aambîîte îrema nkona ya kîrîma kîra gîetagwa kîrîma kîa Ngai.c 6 Njethiro aarî agûtûmana kîrî Musa auga neerwe, “Mûthonuugu Njethiro i baayîîte barî na mwekûrû waku na aana baaku barî baîrî.” 7 Musa akûgwata ntûmwa, aumagarûka abathagaana. Bagûkomana, Musa amûturîria maru amûkeethia, baûrania bûra bareerie, baathûûngîra îremaani. 8 Musa eera mûthonuue mantû monthe mara Mwathani aarûthîîre Faraû na antû ba Miisiri n'ûntû bwa antû ba Isiraeri, na mathîîna monthe mara baarî namo rûgendooni rwao, na bûra Mwathani aabakûûrire kîrî mo. 9 Njethiro n'akenire mûno n'ûntû bwa mantû monthe meega mara Mwathani aarûthîîre antû ba Isiraeri, bûra aabakûûrire bauma njaraani cia Amiisiri. 10 Na Njethiro auga, “Mwathani aroothaarimwa, we ûra aabûtuunyûkiirie kuuma njaraani cia Faraû na antû ba Miisiri! 11 Îîndî nkûmenya Mwathani n'we mûnene nkûrûki ya ngai ira cingî cionthe, n'ûntû bwa gûkûûra antû ba Isiraeri kuuma njaraani cia antû ba Miisiri bara barabathûkagia ta antû batarî gîtûmi.” 12 Rîru Njethiro mûthonuue wa Musa, aareeta nyamû cia ndîîthia cia kûrutîra Ngai kîgongwana gîa kûbîîthua na igongwana bingî. Na Arûni aayire na akûrû bara baarî atongoria ba Isiraeri bonthe barîyanîra amwe na mûthonuue wa Musa mbere ya Ngai.
Kûthuura agambithania
(Kûri 1:9-18)
13 Rûûni Musa aakarîra gîtî ta wîthîre anjîîria kûgambîra antû. Antû bara baarî na magamba barûûngi bamûcerereete kuuma rûkîîrî mwanka ûgoro. 14 Mûthonuue Njethiro akwona bunthe bûra Musa aarûthagîra antû, amûûria, “I mbi îno ûkûrûtha ûû? I mbi n'ûntû ûkaraga nthî wenka ûkagambîra antû ûrî wenka bonthe barûngi bagûcereereete kuuma rûkîîrî mwanka ûgoro?” 15 Musa amûcookeria amwîra, “Antû baayaga kîrî niû bagîcûa kûmenya kwenda kwa Ngai. 16 Na rîra barî na magamba, i niû mbagiitagîra. Na nkabamenyithagia kwenda kwa Ngai na nkabarutanaga maathana maake.” 17 Mûthonuue amwîra, “Ûgu ûkûrûtha t'ûntû bwega! 18 Wathi na mbere kûrûtha ûgu, ûkeethiria inya wengwa, wana kinya antû bo bongwa bakaathira inya. Ngûgî îno n'îînene mûno kûmîrûtha ûrî wenka. 19 Îîndî ga nkûe ûkûrû, na Ngai arookara amwe naawe. Naawe îthi mbere kwîthîrwa ûrûngamîrîte antû baba mbere ya Ngai, wiragîre Ngai mantû maao mara barî namo. 20 Na i woû ûgûtua kûbarutanaga mawatho ma Ngai na mantû mara Ngai augire marûthawe, na ûcooke ûboonie bûra babatîîrue gûkaraga mûtûûrîreeni wao. 21 Îndî amwe na ûgu, thuura antû arûme bakûûmba ngûgî, eetîgua na antû bagûtîîya Ngai na antû batendeete ngukumo. Bathuure beegue barî ba kûgiitîra magamba ikundi bia antû mwanya mwanya. Bamwe beegue barî atongoria ba gîkundi gîa antû ngiri îmwe, bara bangî gîa antû îgana rîmwe, bara bangî mîrongo îtaano, na kîa mûthia kîîgue gîa antû îkûmi. 22 Antû baba i bo bagatûmîkagîra antû rîonthe na njîra ya kûgambaga tûgamba tûra tûniini tunthe, na mantû maarito bataûmba, mamu i mo ûbatîîrue ûreterwa. Antû babu bagagûteethia mûno na mûrigo ûûthe. 23 Ûkarûtha ûûgû, wa bûra Ngai agûkwatha, rîru waûmba gûtûûra bwega ûtarî na thîîna na antû nabo bagaatua kwînûkaga kwao barî na ûkiri.”
24 Musa n'athîkîîre mataaro ma mûthonuue na aarûtha wa bûra aamwîrîîte. 25 N'aathuurire antû bakûûmba ngûgî kuuma nteere cionthe cia Isiraeri na abatuîkithia agaambi ba kûgambagîra antû. Nabo beegua kûrî ba kûrûngamîîra gîkundi gîa antû ngiri, bangî ba antû îgana, bangî ba antû mîrongo îtaano na bangî ba antû îkûmi. 26 Antû babu beegagua barî oogo rîonthe n'ûntû bwa kwona ûmma bûkûthingatwa. Bairagîra Musa magamba mara maarî na inya nabo bakathiria tûgamba tûra tûniini barî bongwa.
27 Nyuma yoogu, Musa aagwatanîra na mûthonuue Njethiro, na Njethiro eenûka kwao.