Îrema rîa Ngai
26
1 “Na ûrûthe îrema rîa Ngai na ngoora cia gûcuuria îkûmi inthongi itumîîtwe na ndigi cia rangi ya mburuu, na ûkûyû na întuune na ingemie na mbica cia akerubi na waara ngooraani inu. 2 Wa îra ngoora îîgue îrî na ûraaya bwa biiti mîrongo îna na ciîrî na wariî bwa biiti ithanthatû. 3 Ûrathanîîre ngoora itaano cia cio amwe, na itaano ira iingî amwe. 4 Na ûrûthe iguatû bia gîtambaa kîa rangi ya mburuu mûthiani wa gîtambaa kîra kîarî mûthiani kîrî bira biarî biitumanîîrie amwe bitaano, na ûcooke ûrûthe woogu kîrî mûthia wa gîtambaa kîra kîarî mûthiani wa bira biingî bitaano. 5 Ûrûthe iguatû mîrongo îtaano kîrî gîtambaa kîmwe, na iguatû biingî mîrongo îtaano gîtaambaani gîku kîngî, na iguatû bibu wîgue bierekanîrîte. 6 Na ûcooke ûrûthe tûpogoro tûniini mîrongo îtaano twa thaabu twa kûbunga, ûgwatithanie itambaa na tûpogoro tûtu, kaingo îrema rîa Ngai rîîgua rîrûthîîtwe na gîtambaa kîgwateene.7 “Na ûtume ngoora îkûmi na îmwe cia guaya ya mbûri ciîgue i cio îrema rîa gûkunîkîra îrema rîru rîa Ngai. 8 Ngoora ino cionthe nwa mwanka ciîgue irî cia kîthimi kîmwe. Kwoogu wa îmwe îbatîîrue îîgua îrî na ûraaya bwa biiti mîrongo îna na itaano na wariî bwa biiti ithanthatû. 9 Ngoora itaano igwatithanue ituîke îmwe, na inu iingî ithanthatû igwatithanue, na ngoora îra ya ithanthatû ûmîbetanie agu mbere mwîrîgaani wa îrema. 10 Na wîkîre iguatû mîrongo îtaano mûthiani wa ngoora îra ya mbere, na bingî mîrongo îtaano mûthiani wa ngoora îra îngî. 11 Rîru ûrûthe tûpogoro mîrongo îtaano twa yîûmba ta rîra rîrûthaga gîkama na ûtuorokerie iguatûûni ûgwatithanie îrema rîtuîke gîntû kîmwe. 12 Gîcuncî kîa ngoora ya îrema kîra gîgaatigara, gîtigwe gîcuuri rûteere rwa nyuma ya Îrema rîa Ngai. 13 Biiti îmwe na nucu ya ngoora îcuure rûteere rûmwe, na biiti îmwe na nucu îcuure rûteere rûra rûngî îkunîkîre Îrema rîru rîa Ngai. 14 Na ûcooke ûtumîre îrema rîru kîguîkîri kîa rûûo rwa ntûrûme rûgemeetue na rangi întuune, na îgûrû rîaru kîguîkîri kîngî kîa ndwara cia nyamû ira nene cia îria.
15 “Na ûthuuranîre mbureemu cia îrema cia mbaaû cia mîgaa. 16 Wa rûbureemu rwîgue rûrî rwa ûraaya bwa biiti îkûmi na itaano na wariî bwa biiti ciîrî na robo. 17 Wa rûbureemu ûkeegua rûrî na ndathanîîro ciîrî kaingo rûgwatithanua na rûra rûngî. Na ûgu i bu ûkaarûtha mbureemu cionthe cia îrema. 18 Ûrûthe mbureemu mîrongo îîrî n'ûntû bwa îrema rîru cia mbarî ya iti ya îrema rîru, 19 ûrûthe ikinyithio bia fetha mîrongo îna bia kwaigagîîrwa mbureemu inu, wa rûra rûbaaû ikinyithio biîrî bia kûwata mpoga. 20 Ûrûthe mbureemu mîrongo îîrî cia mbarî ya neegûrû ya îrema, 21 na ikinyithio biacio bia fetha mîrongo îna, wa îra mbureemu îrî na ikinyithio biîrî ruungu rwayo. 22 Na mbarî ya nyuma ya îrema, na n'yo mbarî ya ûthwîro bwa riûa ûrîrûthîre mbureemu ithanthatû, 23 na ûrûthe mbureemu ciîrî cia koona cia mbarî ya nyuma ya îrema. 24 Na mbureemu inu cia koona ikeegua ciathûkeene naara ruungu îndî igwatanîrîîte naara îgûrû, agu kîguatûûni kîa mbere. Mbureemu inu cia koona inu ikeegua irûthîîtwe ûntû bûmwe. 25 Kwoogu ûkeegua kûrî na mbureemu inyanya na ikinyithio îkûmi na bithanthatû bia fetha, wa biîrî ruungu rwa wa kîra rûbureemu.
26 “Na ûcooke ûrûthe mata mataano ma mbaaû cia mûgaa: mataano ma rûteere rwa îgûrû rwa îrema rîa Ngai, 27 mataano ma mamu ma rûteere rwa naiti, na mataano ma rûteere rwa ûthwîro bwa riûa, naara mûthiani wa gîkaro. 28 Rûbaaû rwa îta rwa gatîgatî rûgaakerania nucu ya ûraaya bwa mbureemu rûkeranîîtie kuuma mûthia ûmwe wa îrema mwanka mûthia ûra ûngî. 29 Ûkaande mbureemu inu na thaabu na ûrûthe iguatû bia thaabu bia kûgwatîîra mata mamu ma mbaaû. Na ûkaande mata mamu na thaabu kinya mo.
30 “Waake îrema rîru kûringana na ngerekano îra woonua kîrîmaani gîkî.
31 “Gûku ndeeni ya îrema ûgiitanie na gîtambaa kîîthongi mûno, na mbica ya kerubi îgemeetue na waara nguoni înu ûgîtûmagîra rûrigi rwa rangi ya mburuu, ya ûkûyû, na rwa rangi întuune. 32 Ûmîcuurie na tûpogoro twa thaabu itugîîni bina bia mûgaa bikaandîîtwe na thaabu na birûngi ikinyithioni bina bia fetha. 33 Gîtambaa gîku kîa ndeeni gîacuurua, waige îthandûkû rîa maathana nyuma yakîo. Na gîtambaa gîkî i kîo gîkaagiitania Bantû ara Atheru na Bantû ara Atheru Mûno. 34 Waigîîre gîtî gîa kîao îgûrû rîa îthandûkû rîa maathana bantû ara Atheru Mûno. 35 Waigîîre meetha agu nja ya gîtambaa, rûteere rwa îgûrû rwa îrema rîa Ngai. Ûcooke waige gîtugî gîa taa rûteere rwa iti rwa îrema kîerekeene na meetha.