Kîthînjîro gîa kîgongwana gîa kûbîîthia
38
1 Kîthînjîro kîa igongwana bia kûbîîthia kîarûthirwe na mûtî wa mûgaa. Kîarî na ûraaya na wariî bûganeene bwa biiti mûgwanja na nucu. Ûraaya bwakîo bwa gwîtia bwarî bwa biiti inya na nucu. 2 Aarûtha gîntû gîkari ta rûgoci koonaani irî inya cia kîthînjîro, kaingo ngoci na kîthînjîro ciîgua cionthe irî gîntû kîmwe. Aakaanda kîthînjîro na ngoci inu cia kîo na rûthuku. 3 Aacooka aarûtha into bia kîthînjîro; nyûngû, iciko bia mûthetu, iraî, mîkua îmîmatu ya kûruta nyama, na tûraî twa mwanki na bionthe biarûthwa na rûthuku. 4 Aarûtha rûtara rwa rûthuku aruîkîra ruungu rwa rûtheng'eeng'a rwa kîthînjîro rûkîîndamaga rûgakinya gatîgatî ka ûraaya bwa kîthînjîro. 5 Aarûtha iguatû bina bia kûgwatîîra mîtî ya gûgîkamataga, abirûmîîria koonaani irî inya cia rûgambi rwa rûthuku. 6 Aarûtha mîtî ya gûgîkamataga ya mûgaa amîkaanda na rûthuku, 7 na amîorokeria iguatûûni bira birî nteere cia kîthînjîro, aakîrûthire na mbaaû nteere, kîrî na muunguru ndeeni.Kîraî gîa kûthambîra
8 Aarûtha kîraî gîa kûthambîra amwe na bantû a gûkîaigîîra bionthe biarî bia rûthuku, kuumania na bioni bia eekûrû bara baarutaga ngûgî mwîrîgaani wa îrema rîa Ngai.
Ome ya gîkaro
9 Aacooka aaka ome ya gîkaro gîku. Rûteere rwa iti rwarî rwa ûraaya bwa biiti îgana rîa mîrongo îtaano. Naru rwarî rwa itambaa bira bicuuragua bia gatani îra nthongi. 10 I kwarî na itugî mîrongo îîrî na ikinyithio biabio mîrongo îîrî bionthe birûthîîtwe na rûthuku, îndi tûpogoro na mata biarûthîîtwe na fetha. 11 Rûteere rwa iti rwakari wa ta rûteere rwa îgûrû. Kinya ru, rwarî rwa ûraaya bwa biiti îgana rîa mîrongo îtaano, rwarî na itugî mîrongo îîrî bia rûthuku na ikinyithio mîrongo îîrî bia bio bia rûthuku na tûpogoro twa fetha na mata ma fetha. 12 Na itambaa bia rûteere rwa ûthwîro bwa riûa biarî bia ûraaya bwa biiti mîrongo mûgwanja na itaano. Na rûthiingo rûru rwagwatîîrîîtwe n'itugî îkûmi na ikinyithio îkûmi na tûpogoro na mata, bionthe birûthîîtwe na fetha. 13 Rûteere rwa uumîîro bwa riûa, ara mwîraango warî, rwarî na ûraaya bwa biiti mîrongo mûgwanja na itaano. 14 Itambaa bira bigaacuurua rûteere rûmwe biarî bîa ûraaya bwa biiti mîrongo îîrî na ciîrî na nucu, bigwetwe n'itugî bithatû bikinyithîîtue ikinyithioni bithatû. 15 Itambaa bia rûteere rûra rûngî kinya bio biarî bia biiti mîrongo îîrî na ciîrî na biagwatîîrîîtwe ni itugî bithatû, bikinyithîîtue ikinyithioni bithatû. 16 Itaambaa bionthe bira biathiûrûûkîrîtie ome biarûthîîtwe na gatani îra nthongi. 17 Ikinyithio bia itugî bibu biarî bia rûthuku, îndî tûpogoro na mata maabio biarî bia fetha, itugî bibu biakaandîîtwe na fetha. Itugî bionthe bira biarî ome biagwatithanîîtue na tûpogoro twa fetha. 18 Itaambaa bia kwinga mwîrîga wa ome wa gîkaro gîku biatumîîtwe na gatani îra nthongi îtumîîtwe na ndigi cia rangi ya mburuu, ya ûkûyû, na întuune imbokothe. Yaarî ya ûraaya bwa biiti mîrongo ithatû na ûraaya bwa gwîtia bwa biiti mûgwanja na nucu, wa ta itambaa bia rûthiingo rwa ome. 19 Gîatiirîîrîîtwe na itugî bina birî ikinyithioni bina bia rûthuku. Tûpogoro, mata na biongo bia itugî biari bia fetha. 20 Tûtugî tunthe twa îrema na twa ome twarûthîîtwe na rûthuku.
Ûrito bwa into bira biatûmîîrwe Îremaani
21 Bûbû i bu ûrito bwa into bira biatûmîîrwe îremaani rîa Ngai kûra îthandûkû rîa maathana ma kîrîîkanîro rîarî. Musa n'we waathire Arawi batare na baandîke into bibu, Ithamarû mwana wa Arûni ûra mûthînjîri wa Ngai abatongorereetie.
22 Mbesareri mwana wa Uri na mwana wa mwana wa Ûrî wa mwîrîga wa Njunda n'we arûthire into bionthe bira Mwathani aathîîte Musa birûthwe. 23 Mûteetheeria wake aarî Ooriabu mwana wa Aisamaki wa mwîrîga wa Ndani, na aarî mwara, mûthuuranîri wa mîbaango na aiyî kûgemia mburuu, rangi ya ûkûyû na întuune na gatani îra nthongi.
24 Biewa bia thaabu bira antû baareetire bia gûtûmîrwa gwaka îrema rîa Ngai biarî kiro magana kenda ma mîrongo kenda na îmwe kûringana na kîthimi kîra gîetîgîîrîîtue gûtûmîka Nyomba ya Ngai. 25 Fetha îra yaaneenkanîîrwe kuuma kîrî antû bara baatarirwe yarî kiro ngiri ithatû na magana mana, kûringana na kîthimi kîra gîetîgîîrîîtue gûtûmîka Nyomba ya Ngai. 26 Yaumanîîtie na ûgooti bûra antû baarîaga rîra baataragwa na woora muntû aarutaga wa nucu sekeri kûringana na ûrito bwa sekeri. Antû bara baatarirwe baarî antû arûme ba ûkûrû bwa kuuma mîanka mîrongo îîrî na kûthi mbere antû ngiri magana mathanthatû ma ithatû, na magana mataano ma mîrongo îtaano.
27 Kiro ngiri ithatû cia magana mana cia fetha ciatûmîrwa kûrûtha ikinyithio îgana rîmwe bia itugî bia îrema na bia itambaa bira biacuuragua, wa kîra gîtugî gîgatûmîra kiro mîrongo îthatû na inya. 28 Baatûmîra kiro mîrongo îthatû kûrûtha tûpogoro na mata na gûkaanda biongo bia itugî.
29 Cuuma ya rûthuku ta îra îrûthaga gîkama îra yaarutirwe yarî ya kiro ngiri ciîrî magana mathatû ma mîrongo înaana. 30 Yaatûmîîrwe kûrûtha ikinyithio bia mwîrîga wa îrema rîa Ngai, kîthînjîro, rûtara rwakîo, into bia kîthînjîro, 31 ikinyithio bia ome, amwe na bia mwîrîga, na tûtugî tunthe twa kûgwata itambaa bia îrema na bia ome.