Igongwana bia kîra ntugû
28
1 Mwathani aaria na Musa amwîra, 2 Atha antû ba Isiraeri ûbeere, bwone bûkûndutîra biewa bia irio bia kûbîîthua na mwanki kagiita kara kaagîrîîte birî mûcinko ûmwega ûra ûnkenagia. 3 Bibi i bio biewa bia irio bira bikaarutagîrwa Mwathani. Ntûrûme ciîrî itarî nwa koothûûku cia mwanka ûmwe i cio ikaarutagwa kîrî kîgongwana gîa kûbîîthua wa kîra ntugû. 4 Ûkaaruta ntûrûme îmwe rûkîîrî na îra îîngî ûgoro. 5 Wa îra ntûrûme îrutanagîrue na kîewa kîa irio gîa gîcuncî gîa îkûmi kîa ndebe ya mûtu ûkimanîîtue na maguta ma rita îmwe mara meega mûno ma mîceituuni. 6 Gîkî i kîgongwana kîa wa kîra ntugû kîra kîarutirwe rîa mbere kîrîmaani gîa Sinai kîrî kîewa kîa irio kîrî na mûtararî ûgûkenia Mwathani. 7 Rita îmwe ya ndibei îgaatuuragwa kîthînjîrooni kîrî kîewa gîa gîakûnyua gîa kûthiiyania na kîgongwana gîku gîa ntûrûme. 8 Ntûrûme îra îîngî ûkamîruta ûgoro. Wa ta kîewa kîa irio kîa rûkîîrî, na wa ta kîewa gîakîo kîa biakûnyua, ûgakîruta ta kîewa kîa irio gîkûruta mûcinko ûgûkenia Mwathani.Kîgongwana gîa Sabatû
9 Wa îra ntugû ya Sabatû ntûrûme ciîrî itarî nwa koothûûku cia ûkûrû bwa mwanka ûmwe ikaarutagwa. Ikaarutanagîrua na gîcuncî kîa bitaano kîa ndebe ya mûtu ûkimanîîtue na maguta ma mîceituuni kîrî kîewa kîa irio, na kîewa kîa gîakûnyua. 10 Kîgongwana gîkî i gîa kûbîîthua na mwanki, gîkaarutagwa wa îra ntugû ya Sabatû, îgûrû rîa kîewa gîa kîra ntugû na kîewa kîayo kîa ndibei.
Kîgongwana gîa ntugû ya mbere ya Mweri
11 Rutagîrani Mwathani kîgongwana gîa kûbîîthua mwanjîîrioni wa kîra mweri. Bûkaarutaga ncamba ciîrî itarî nkûrû mûno, ntûrûme îmwe na tûtûrûme mûgwanja twa ûkûrû bwa mwanka ûmwe. Nyamû inu cionthe ciîgue itarî nwa koothûûku. 12 N'ûntû bwa kîewa kîa irio bûrutage icuncî bithatû bia îkûmi bia ndebe ya mûtu ûkimanîîtue na maguta ma mîceituuni amwe na ncamba, gîcuncî kîa bitaano kîa ndebe ya mûtu ûkimanîîtue na maguta ma mîceituuni na wa kîra ntûrûme, 13 na gîcuncî kîmwe gîa îkûmi kîa ndebe ya mûtu ûkimanîîtue na maguta ma mîceituuni kîrî wa kîra gatûrûme. Igongwana bibi bia kûbîîthua na mwanki i birutaga mûtararî wa gûkenia Mwathani. 14 Kîthimi gîa kîewa kîa gîakûnyua kîra kîagîrîîte i rita ciîrî cia ndibei kîrî wa kîra ncamba; rita îmwe na nucu kîrî wa kîra ntûrûme, na kîrî wa kîra gatûrûme rita îmwe. Gîkî i kîo kîgongwana gîa kûbîîthua gîa ntugû ya mbere ya woora mweri ndeeni ya mwanka unthe. 15 Wa amwe na igongwana bia kûbîîthua bia wa îra ntugû na kîewa kîa bio kîa ndibei, bûkaarutaga ntheenge îmwe kîrî Mwathani kîrî kîgongwana n'ûntû bwa wîyia.
Biewa bia kîatho kîa mîgaate îtaimbithîîtue
16 “ ‘Kîatho gia Pasaka n'ûntû bwa gûtîîya Mwathani gîkeegagua kîrî gîa ntugû ya îkûmi na inya ya mweri wa mbere. 17 Ntugû ya îkûmi na itaano, kîatho kîîtheru gîkaanjîîria na gîkaathira nyuma ya ntugû mûgwanja. Ntugûûni inu bûrîîyage mîgaate îtarî na ndawa ya kwimbithia. 18 Ntugû ya mbere bwîgue bûrî na kîûthûrano kîîtheru na bûtikaarute ngûgî nwa irî kû ira bûrutaga wa îra ntugû. 19 Rutagaani kîgongwana gîa kûbîîthua kîrî Mwathani. Na bûkaarutaga: ncamba ciîrî itarî nkûrû mûno, ntûrûme îmwe na tûtûrûme mûgwanja twa ûkûrû bwa mwanka ûmwe. Na nyamû inu ciîgue itarî nwa koothûûku. 20 Bûrute kîewa kîa irio kîra kîagîrîîte kîa mûtu ûkimanîîtue na maguta ma mîceituuni. Wa îra ncamba îrutanîrue na icuncî bithatû bia îkûmi bia ndebe ya mûtu, ntûrûme gîcuncî kîa bitaano kîa ndebe ya mûtu 21 na gatûrûme, gîcuncî gîa îkûmi kîa ndebe ya mûtu. 22 Na bûkaruta ntheenge îmwe kîrî kîgongwana n'ûntû bwa wîyia. Gûkûrûkîîra ûntû bûbû antû bakaatherua. 23 Bûkaarutaga biewa bibi amwe na bira biingî bia kûbîîthua na mwanki bia kîra rûkîîrî. 24 Wa ûgu i bu bûkaathuuranagîra biewa bia kûbîîthua na mwanki weera ntugû, kagiita ga ntugû mûgwanja, bikaarutaga mûcinko ûgûkenia Mwathani; rutagaani biewa bibi amwe na bira biingî bia kûbîîthua na mwanki bia wa kîra ntugû na kîewa kîa ndibei. 25 Ntugû ya mûgwanja bûkarîîkana n'ûntû bwa kûgonga Mwathani na bûtikaarute ngûgî cienu ira bûrutaga wa îra ntugû.’ ”
Igongwana kîathooni kîa maketha
26 “Ntugû ya mbere ya kîatho kîa maketha rîra bûkûrutîra Mwathani maciaro ma mbere kagiita ga kîatho kîa biumia, bûrîîkane mûcemanio ûmûtheru na bûtikaarute ngûgî cienu cia wa îra ntugû. 27 Rutaani kîgongwana gîa kûbîîthua na mwanki kîrute mûcinko ûgûkenia Mwathani. Bûrutage ncamba ciîrî cia kiumîri, ntûrûme îmwe na tûtûrûme mûgwanja twa ûkûrû bwa mwanka ûmwe. Nyamû inu ciîgue itarî nwa koothûûku. 28 Kîewa kîa irio kîra gîkaarutanîrua nacio gîkeegua kîrî gîa icuncî bithatû bia îkûmi bia ndebe ya mûtu gîa kûrutanîria amwe na ncamba, ntûrûme gîcuncî kîa bitaano kîa ndebe ya mûtu 29 na gatûrûme, gîcuncî gîa îkûmi kîa ndebe ya mûtu. 30 Bûcooke bûrute ntheenge kîrî kîgongwana n'ûntû bwa wîyia. Na gûkûrûkîîra ûntû bûbu antû bakaatherua. 31 Bûrute biewa bibi na bia ndibei amwe na biewa bia kûbîîthua na mwanki bia wa îra ntugû na biewa bia irio. Wîgue itarî nwa koothûûku.”