Aarî ba Serofeandi
27
1 Maara, Nuu, Ogira, Mirika na Tirisa baarî aarî ba Serofeandi mwana wa Eferi. Eferi aarî mwana wa Ngiriandi, wa Makiri, mwana wa Manase mwana wa Njosebu. 2 Baathiire baarûngama mwîrîgaani wa Îrema rîa Kûrîîkanaga, mbere ya Musa, Eriasari ûra mûthînjîri, atongoria ba Isiraeri na gîkundi kîînene gîa antû, bauga, 3 “Baaba aakuîrîîre rwanda na ataatiga kaana ga kamuntû karûme. Ataarî ûmwe wa athiingati ba Kora ûra akarariirie Mwathani. Aakuire n'ûntû bwa wîyia bwake wengwa. 4 Îîndî rî, n'ûntû ataatiga nthaka i ka riîtwa rîake rîkaûra rîriganîrie kîrî antû ba Isiraeri? Tûnenkereeni rûgai rwetû gatîgatî ka rûkore rwa baaba.”5 Musa airîra Mwathani îgamba rîru, 6 Mwathani eera Musa, 7 “Îromba rîru rîa aarî ba Serofeandi i rîagîrîîte, baneenkere rûgai rwao gatîgatî ga antû ba mûciî wa îthe. Rûgai rwa îthe i rûtuîke rwao.
8 “Îra antû ba Isiraeri, rîra muntû agaakuuyaga atatige kaana ga kamuntû karûme, into biake bikaagaagwa i mwarî wake. 9 Wegua atarî na mwarî, aruagina i bo bakaabigaaga. 10 Wegua atarî na aruagina, aruagina ba îthe i bo bakabigaa. 11 Na wegua atarî na aruagina kana aruagina ba îthe, muntû wa mûciî wao ûra arî akubî mûno n'we kîrî bara bangî n'we akaagaîrwa, na akare na rûgai rûru rûtuîke rwake. Antû ba Isiraeri barûthage ûgu n'ûntû i bu kûbatîîrue kîîwatho, wa ta bûra niû, Mwathani ndaathire Musa.”
Njosua aathuurwa kûthûkia kaanya ka Musa
(Kûri 31:1-8)
12 Mwathani aaria na Musa amwîra, “Îtwa kîrîma kîa Abarimu ûraithîîrie nthîgûrû îra nthiîte kûnenkera antû ba Isiraeri. 13 Warîîkia kûmîona ûgaakua wa ta bûra mûruanyûkwe Arûni aakwire, 14 n'ûntû bûrî baîrî i bwareganire na watho bwakwa bûrî rwanda rwa Sini. Rîra antû bonthe ba Isiraeri banung'unire n'ûntû bwakwa bûrî Meriba i bwaregire kwonania ûtheru bwakwa kîrî bo.”
15 Musa aaromba Mwathani akiugaga, 16 “Mwathani Ngai kaumo ga ûtûûro bunthe, ndakûromba ûthuure muntû ûra akaûmba gûtongoreria antû baba, 17 na ûra akaûmba kûbatongoria ndûani, kaingo antû baaku batigaakare ta ng'ondu itarî na mûrîîthi.”
18 Mwathani aaria na Musa amwîra, “Thûkia Njosua mwana wa Nuni, muntû arî na Kîrundu wakwa, ûmwaigîîre njara ciaku kîongo gîake. 19 Ûmwire ûmûrûngamie mbere ya Eriasari ûra mûthînjîri na mbere ya antû bonthe. Na agu mbere ya antû bonthe uuge Njosua n'we aakaathûkia kaanya gaaku. 20 Ûmûneenkere gacuncî ka wathani bwaku kaingo antû ba Isiraeri bonthe bamwathîkagîra. 21 Akaathikagîîria mataaro ma Eriasari ûra mûthînjîri. Eriasari akaamenyaga kwenda gwakwa gûkûrûkîîra Urimu. Ûgu i bu Eriasari agaataaraga Njosua na antû bonthe ba Isiraeri mantûûni maao.”