Kûthuuranîra taa
8
1 Mwathani aaria na Musa amwîra, 2 “Îra Arûni rîra agaatûûgîria taa ira mûgwanja itugîîni biacio, abatîîrue aciaiga bûra werû bwa cio bûkaathararîra mbarî ya mbere ya itugî bibu bia taa.” 3 Arûni aarûtha wa bûra Musa aathîîtwe i Mwathani, aiga taa itugîîni biacio cierekereete bwa mbere. 4 Ûûgû i bu gîtugî gîa taa kîarûthirwe; kîarûthirwe na thaabu ya gûtura kuuma gîkonaani mwanka kûra îgûrû maûani, itugî bibu biarûthîîtwe na thaabu îrî înture, kûringana na mûbangîîre ûra Mwathani ooneetie Musa.Kûtherua na kwathûrwa kwa Arawi
5 Mwathani aaria na Musa amwîra, 6 “Athûra Arawi kuuma kîrî antû babu bangî ba Isiraeri na ûbatherie 7 na njîra îno: Ûbamiincîrie rûûyî rwa kûtherania meeyia na ûbeere beenje ntundu cia mwîrî cionthe na babûûre nguo ciao. Rîru bakeegua barî baatheru. 8 Rîru bakaathûkia ncamba ya kiumîri na kîewa kîa irio kîra kîendekanaga, kîa mûtu ûkimanîîtue na maguta. Naawe ûkaathûkia ncamba îîngî ya kîgongwana n'ûntû bwa wîyia. 9 Wîthîranie antû bonthe ba Isiraeri na ûrûngamie Arawi mbere ya Îrema rîa Kûrîîkanaga. 10 Antû ba Isiraeri bakaigîîra njara ciao îgûrû ya biongo bia Arawi, rîra ûkaabareeta mbere ya Mwathani, 11 n'we Arûni akaaneenkanîra Arawi barî kîewa kîa mwanya kîrî niû kuuma kîrî antû ba Isiraeri, kaingo baandutagîra ngûgî. 12 Rîru Arawi bakaigîîra njara ciao îgûrû rîa biongo bia ncamba ira ciîrî. Îmwe îkaarutwa îrî ya kîgongwana n'ûntû bwa wîyia na înu îîngî îrî ya kîgongwana gîa kûbîîthua kîrî Mwathani, n'ûntû bwa kûtheria Arawi.
13 “Neenkanîra Arawi barî kîewa kîa mwanya kîrî niû na Arûni na nthaka ciake beegue i bo bakaabarûngamagîîra. 14 Athûra Arawi kuuma kîrî Aisiraeri babu bangî kaingo beegua barî baakwa. 15 Nyuma ya kûtheria na kwathûra Arawi, bakeegua baganîîrîîte kûruta ngûgî Îrema rîa Kûrîîkanaga. 16 Ndîîthûkîrîîtie bo bantû a itûra îria bia antû arûme ba Isiraeri. Nabo îîndî i baakwa ninka. 17 Rîra ndaathiriirie itûra îria bia Miisiri ka ndeethuurîîre itûra îria bia arûme bia Isiraeri, na itûra îria bionthe bia nyamû biatuîka biakwa. 18 Na îîndî, i ka ndaathûkia Arawi bantûûni a itûra îria bia Isiraeri 19 na ndabanenkanîra kîrî Arûni na nthaka ciake barî kîewa kîa mwanya barutage ngûgî Îremaani rîa Kûrîîkanaga n'ûntû bwa antû ba Isiraeri, na kûbarigîîria batikaaye kûgwatwa i mûthiro baathi akubî na bantû ara atheru.”
20 Kwoogu Musa, Arûni na antû bonthe ba Isiraeri baathûra Arawi wa ta bûra Mwathani eerire Musa. 21 Arawi beetheria na baabûûra nguo ciao. Rîru Arûni abaneenkanîra barî kîewa kîa mwanya kîrî Mwathani. Aacooka abarûthîra nyambura cia kûbatheria. 22 Antû baarûtha mantû monthe mara Mwathani eerîîte Musa meegiî Arawi. Kwoogu Arawi baatuîka i baaganîîru kûruta ngûgî îremaani barûngamîîrîîtwe ni Arûni na nthaka ciake.
23 Mwathani aaria na Musa amwîra, 24 “Mûrawi wa kuuma ûkûrû bwa mîanka mîrongo îîrî na îtaano n'wa arute ngûgî îremaani, 25 na aakinyia ûkûrû bwa mîanka mîrongo îtaano anogoke. 26 Nyuma ya ûgu n'wa ateetheerie Arawi babu bangî kûruta ngûgî ciao gûku îremaani, îndî we wengwa gûtirî ngûgî abatîîrue aruta. Ûgu i bu ûbatîîrue ûnenkera Arawi ngûgî.”