50
1 Njosebu eendamîîra akumbata îthe amûcunca akîrîraga. 2 Rîru Njosebu aatha ndagitaarî baake abeera barûthe mwîrî wa îthe bwega na ndawa ya kûgiria woora. Kwoogu ndagitaarî babu baathuuranîra Isiraeri, 3 baathûkiirie ntugû mîrongo înna, n'ûntû gaku i ko kagiita kara keendekanaga ga kûthuuranîra mwîrî. Na Amiisiri bamûrîrîra ntugû mîrongo mûgwanja.4 Rîra ntugû cia kûmûrîrîra ciathirire, Njosebu aaria na antû ba mûciî wa Faraû, abeera, “Wegua i mboneete kwendeerwa meethooni meenu, nkûbwereka ariani na Faraû bûmwîre, 5 ‘Baaba n'aatûmire nthiîtia mûthiîtio na auga, “Ndî akubî gûkua; ûnthike nthikooni yakwa îra ndeebînjîîre nthîgûrû ya Kanaani.” Îîndî ka nthi nthike baaba; rîru ncooke.’ ”
6 Faraû amûcookeria amwîra, “Îthi ûthike abaagu, wa ta bûra aatûmire ûthiîtia kûrûtha.”
7 Kwoogu Njosebu aathi kûthika îthe na barî amwe na aruti ngûgî ba Faraû bonthe, akûrû ba mûciî wa Faraû, na akûrû ba nthîgûrû ya Miisiri, 8 wa amwe na antû ba mûciî wa Njosebu bonthe, aruagina, na antû ba mûciî wa îthe. Îndî aana baao, ng'ondu, mbûri na ng'ombe ciao ciatigirwe nthîgûrû ya Ngoseni. 9 Na aathi na mbaraathi amwe na athiithia baacio noogo; kîarî gîkundi kîînene.
10 Rîra baakinyire rwaraani rwa kûbûûrîra rwa Atandi, akubî na Njorondani, baarîrîra oogo nainya gwa kagiita kaaraaya na Njosebu abaanga kîatho gîa kagiita ga ntugû mûgwanja gîa kûrîrîra îthe. 11 Rîra Akanaani bara baatwîre agu boonire kîrîro kîra kîarî rwaraani rwa kûbûûrîra rwa Atandi, bauga, “Amiisiri barî na kîatho kîînene gîa kûrîra.” I kîo gîtûmi bantû agu akubî na Njorondani eetagwa Abeeri-Misiraimu; kuuga kîrîro kîa Amiisiri.
12 Kwoogu aana ba Njakubu baarûtha wa bûra aarî akûbaatha: 13 Bamûkamata mwanka nthî ya Kanaani na bamûthika îkurunguuni kîthakaani kîa Makipera, akubî na Mamure, kîra Îburaîmu aagûrîîte amwe na kîthaka kîrî bantû a kûthikanaga kuuma kîrî Eburoni ûra Mûiti. 14 Nyuma ya kûthika îthe, Njosebu aacooka Miisiri, amwe na aruagina na bonthe bara baathiîte n'we kûthika îthe.
Wîrane bwa Njosebu kîrî aruagina
15 Rîra aruagina ba Njosebu boonire îthe agûkua, beerana, “Waûmba kwîgua Njosebu agatûthûûrîîra na atûrîie ûthûûku bûra bunthe twamûrûthîîre?” 16 Kwoogu baatûmana ntûmwa kîrî Njosebu, îkiugaga, “Abaagu aatigire mawatho mama mbere akua: 17 ‘Ûûgû i bu ûkeera Njosebu: Ingûkûûria ûrekere aruanyûkwe meeyia na mabîtia mara baarûthire ma gûkûrûthîra bûûthûûku.’ Îîndî itû tûrekere meeyia meetû tiû aruti ngûgî ba Ngai wa abaagu.” Rîra ntûmwa yao yaakinyîîre Njosebu, aarîra.
18 Rîru aruagina baaya baaturia maru mbere yake. Bauga, “Tûrî nkombo ciaku.”
19 Îndî Njosebu abeera, “Bûtikaamake. Ka ndî kaanyaani ka Ngai? 20 Bwabangire kûndûthîra ûthûûku, îndî Ngai aabangire bu n'ûntû bwa wega kaingo mbonokia mîoyo îmiingî. 21 Kwoogu bûtikaamake; biû amwe na aana beenu nkabwaa biakûrîa.”
Gûkua kwa Njosebu
22 Njosebu aakarire Miisiri, amwe na antû ba mûciî wa îthe. Aatûûrire mîanka îgana na îkûmi 23 na oona rûciaro rwa ithatû rwa aana ba Eburaimu. Na kinya aana ba Makiri mwana wa Manase baigîîrwe maruuni ma Njosebu bagîciarwa. 24 Na Njosebu eera aruagina, “Ndî akubî gûkua; îndî Ngai akabûriûngîra, na abûrute nthîgûrû îno abwire nthîgûrû îra aathiîtîîrie Îburaîmu, Isaka na Njakubu.” 25 Rîru Njosebu aatûma aana ba Njakubu bathiîtia mûthiîtio bauga, “Ngai akabûriûngîra, na bûkamate maîndî maakwa bûmarute gûntû gûkû.” 26 Kwoogu Njosebu aakua, arî na ûkûrû bwa mîanka îgana na îkûmi; na baathuuranîra mwîrî wake na ndawa ya kûrigîîria atikoore, na eekîrwa îthandûkûûni naagu Miisiri.