Njakubu Aathaarima Aana Baake
49
1 Rîru Njakubu eeta aana baake abeera, “Îthîranaani amwe kaingo mbûûmba kûbwîra bûra gûgaakarîka kîrî biû ntugûûni ira ciiyîîte.”2 “Îthîranaani bûthikîîrie, îî biû aana ba Njakubu,
na bûthikîîrie Isiraeri abaagu wenu.
3 Rubeni, ûrî kîîmbere gîakwa,
rûciaro rwa mbere rwa inya yakwa,
ûra wîkumîîtie mûno na arî na inya nkûrûki ya bonthe,
4 îndî ûtitiirîka nwa ta rûûyî.
N'ûntû nwamaamire na mwekûrû wakwa,
na wagîra ûrîrî bwakwa gîtîîyo,
ûtiigîta inya ya mwana wa mbere.
5 Simioni na Rawi i babuaneene.
Batûmagîra mathaga maao kûbitinana.
6 Ntiîgua ndî amwe nabo ndwariani ciao cia ciri,
kana mbîgua ndî na kaanya mîceemanioni yao.
N'ûntû i baûragire antû na mûthûûro.
Na baatemanga ndegwa magûrû wa bûra beendaga.
7 Mûthûûro wao ûroogwatwa i kîrumi n'ûntû n'ûmûnene mûno,
Na marûrû maao n'ûntû i ma kwînyangia.
Nkabanyagaaria nthîgûrû ya Isiraeri yonthe,
na mbanyagaarie gatîgatî ga antû baao.
8 Njunda, aruanyûkwe bagagûkumia.
Ûkaagwata anthû baaku nkingo.
Aruanyûkwe bagagûturîria maru.
9 Njunda, ûkari ta kiunga gia cimba
gîkarîîtie kiimba kîa nyamû îra kîûragîîte.
Athûntûmaraga na akamaama ta cimba,
na ta cimba ya nka gûtirî we ûthûgaania kûmûtonga.
10 Mûraagi wa ûnene ûtikooro uuma Njunda,
kana mûraagi wa wathani uuma njaraani ciake,
mwanka akinyîîre ûra arî mwene bu,
na antû bakamwathîkîra.
11 Akaathaîka kayaû gaake ka îng'ooi mûcabiibûûni,
mûcabiibûûni wake ûra mwega mûno.
Athaambie nguo ciake,
ndibeini întuune ta nthakame.
12 Meetho maake magaatuunîa nkûrûki ya ndibei,
magego maake mathere nkûrûki ya îria.a
13 Seburuni agaatûûra rûteere rwa îria
na atuîke bantû a kûnogoka meeri,
mwanka wake ûgaakinya Sindoni.
14 Isakaari akari ta îng'ooi rîrî na inya,
amaamaga gatîgatî ka ng'ondu.
15 Rîra akoona bûra bantû aake a kûnogoka arî eega
na bûra nthîgûrû yake îrî mbega,
agakuamîîria gûkamata mîrigo,
na atuîke nkombo.
16 Ndani akaatha antû baake
ta mwîrîga ûmwe wa Isiraeri.
17 Ndani akeegua arî na ûrûme ta njoka îrî njîraani,
îra îrûmaga ncûng'iirû cia mbaraathi
kaingo mûthiithia wayo agwa na ngaragara.
18 Îî Mwathani, mbeteereete wonokio bwaku.
19 Ngandi akaithûkîrwa i gîkundi kîa aamba,
îndî akaûndûka na abathirie.
20 Nthî ya Aseri îkauma irio biega.
Akeeyana irio bia mûnene.
21 Nabutarî akari ta nthwariga înthaûre,
na ntheto cia kanyua gaake n'imbega mûno.
22 Njosebu akari ta mûcabiibû ûrî akubî na kîthima,
mpoong'i ciau itaambaga na rûthingo.
23 Aarathirwe na mîgwî ya mûthûûro,
anthû baake bamûrûthîra bûûthûûku mûno.
24 Îndî ûta bwake bwakarire bwitîîte,
njara ciake i ciarî nainya,
Ngai Mwene Inya wa Njakubu amûteethia,
kuuma agu aatuîka mûrîîthi, rwara rwa Isiraeri.
25 I Ngai wa abaagu, nwe aagûteethiirie,
na i Mwene Inya, ûra ûkûthaarimaga
na ithaarimo bia îgûrû,
ithaarimo birî ruungu,
ithaarimo bia nyonto na nda.
26 Ithaarimo bia abaagu birî na inya
nkûrûki ya ithaarimo bia irîma bia ntwîre.
Birookaraga îgûrû rîa kîongo kîa Njosebu,
kîreeraani gîake we ûra arî mûtongoria wa aruagina.
27 Benjameni akari ta ncûûgi îra îtembûraangaga,
îrîîyaga kiimba kîayo rûkîîrî,
ûgoro îkagaania mataa.”
28 Îno yonthe i mîîrîga îkûmi na îîrî ya Isiraeri, na ûûgû i bu îthe aabeerire akîbathaarima, aathaarima wa kîra ûmwe na kîthaarimo gîake kîra kîamwagîrîte.
Gûkua na kûthikwa kwa Njakubu
29 Rîru Njakubu aatha nthaka ciake aciîra, “Nkaaringanîrwa na antû beetû rua; bûûnthike amwe na ba baaba îkurunguuni rîra rîrî mûndaani wa Eburoni ûra Mûiti, 30 îkurunguuni rîra rîrî mûndaani naara Makipera, akubî na Mamure Kanaani, rîra Îburaîmu aagûrîrîte Eburoni Mûiti na kîthaka rîrî bantû a kûthikana. 31 Agu noogo baathikire Îburaîmu na mwekûrû wake Saara, noogo baathikire Isaka na mwekûrû wake Rebeka, na noogo ndaathikire Rea. 32 Kîthaka na îkurungu rîru rîrî ku biagûrîîrwe Aiti.” 33 Njakubu akûrîîkia kwatha aana baake, aatwethia magûrû maake ûrîrî, na aanyaarûka, aathiingata antû baao.