Njakubu aathaarima Manase na Eburaimu
48
1 Nyuma yoogu Njosebu eerwa, “Abaagu n'ûmwayie.” Kwoogu aathûkia nthaka ciake ciîrî ta cio Manase na Eburaimu aathi nacio. 2 Rîra Njakubu eerirwe mwan'waku Njosebu akûûya, aakaîrîîria aûkîîra aakara nthî ûrîrî.3 Njakubu eera Njosebu, “Ngai Mwene Inya yonthe aambuumîîre ndî Rusi nthîgûrû ya Kanaani, na aanthaarimîra noogo, 4 ambîîra, ‘Ngaatûma ûciarana na ûthagaya. Ngagûtuîkithia mûgongo ûmûnene, na ngakwaa amwe na nciarwa ciaku ira ikaaya nyuma yaku nthîgûrû îno rûrî rûgai rwao tene na tene.’
5 “Na îîndî aana baaku barî baîrî, bara baaciarîîrwe nthîgûrû ya Miisiri mbere mbûya naaga, i baakwa; Eburaimu na Manase bakeegua barî baakwa, wa ta bûra Rubeni na Simioni barî baakwa. 6 Na aana bara bagaaciarwa nyuma yabo bagaatarwa barî baaku; rûgai rûra bakaagwata rûkaaya gûkûrûkîîra Eburaimu na Manase. 7 Ncookeete kuuma Pandani, Raeri aakuîrîîre nthîgûrû ya Kanaani wa tûrî njîraani, tûtarî kûraaya na Eburatha. Kwoogu ndamûthika agu rûteere rwa barabara ya kûthi Eburatha (N'yo, Bethireemu.) Bûbû i bwambîkîîre kîeba kîînene mûno.”
8 Rîra Njakubu oonire aana ba Njosebu, aûria, “I baaû baba?” 9 Njosebu eera îthe, “N'aana baakwa, bara Ngai aampeere ndî naaga.” Njakubu amwîra “Ndetera bo, kaingo mbathaarima.” 10 Îndî meetho ma Njakubu moonaga rwiriiri n'ûkûrû, bûra ataûmbaga kwona. Kwoogu Njosebu abareeta akubî n'we; na abakumbatîria na abacunca. 11 Na Njakubu eera Njosebu, “Nteerîgîîrîîte kwona ûthiû bwaku kaîrî, na îîndî Ngai n'ambîtîgîîrîîtie kwona kinya aana baaku.”
12 Rîru Njosebu abarutaruta mbere ya maru ma Njakubu na eenîka ûthiû bwake nthî. 13 Njosebu abathûkia barî baîrî, Eburaimu arî rûteere rwake rwa ûrîo eerekereete njara ya Njakubu ya kîmotho na Manase arî rûteere rwa njara ya kîmotho eerekereete njara ya Njakubu ya ûrîo, na abareetareeta aakubî n'we. 14 Îndî Njakubu aakûrûkania njara ciake, na aigîîra njara yake ya ûrîo kîongo kîa Eburaimu, kinya wegua n'we aarî mûniini, na njara yake ya kîmotho îgûrû ya kîongo kîa Manase, ûra aarî mûkûrû. 15 Rîru aathaarima Njosebu auga,
“Ngai ûra babaaba beetû Îburaîmu na Isaka baathiiyanagia nwe,
ûra antongoreetie ûtûûrooni bwakwa bunthe mwanka îmunthî,
16 Mûraîka ûra ankûûrîîte kuumania na moogwati monthe, aroothaarima twîyî tûtû;
Tûrootûma riîtwa rîakwa rîririkanagwa,
na kinya mariîtwa ma babaaba Îburaîmu na Isaka,
na tûroothagaya tûkagîa na nciarwa inyingî.”
17 Rîra Njosebu oonire îthe aigîîra njara yake ya ûrîo îgûrû rîa kîongo kîa Eburaimu eegua naaî; na aagwata njara ya îthe amîrutaruta kîongooni kîa Eburaimu amîaigîîra kîrî kîa Manase. 18 Njosebu amwîra, “T'ûgu baaba; ûyû n'we mûkûrû, aigîîra njara yaku ya ûrîo kîongo gîake.” 19 Îndî îthe aarega, auga, “Mwan'wakwa, inkûmenya bûra nkûrûtha. Kinya we agaatuîka muntû wa îgweta; kinya wegua mûruagina ûra mûniini akeegua arî mûnene nkûrûki yake, na nciarwa ciake igaatuîka mîgongo îmiingî.” 20 Kwoogu Njakubu aathaarima twana tûtu ntugû înu na atuîra: “Antû ba Isiraeri bagaatûmîra mariîtwa meenu kûthaarimana. Bakauga, ‘Ngai arootûma ûnenea ta Eburaimu na Manase.’ ” Kwoogu aiga Eburaimu mbere ya Manase. 21 Rîru Njakubu eera Njosebu, “Ndî akubî gûkua, îndî Ngai akeegua arî amwe naabi, na akabûcookia nthîgûrû ya ba abaagu. 22 Na nkûrûki ya bara bangî, i woû na t'aruanyûkwe, nkwaa Sekemu gîteere kîra kînoru kîra ndaatuunyanire kuuma kîrî antû ba Amori na rûûyiû rwakwa na ûta bwakwa.”