Njakubu aakomana na Faraû
47
1 Njosebu aathi kîrî Faraû amwîra, “Baaba na aruayia bakûûya kuuma Kanaani na ng'ondu, mbûri, ng'ombe na into biao bionthe. Îîndî barî gîteere kîa Ngoseni.” 2 Njosebu aataara aruagina bataano baathi kîrî Faraû.3 Faraû abaûria, “Bûrutaga ngûgî mbi?”
Na baacookeria Faraû bamwîra, “Tiû aruti ngûgî baaku tûrî arîîthi, wata ba baaba.” 4 Bamwîra, “tûûyîîte gûtûûra nthîgûrû îno, n'ûntû yûûra i rînuunkîîte nthî ya Kanaani na gûtirî ndîîthia. Itû twîtîgîîrie tûtûûre Ngoseni.” 5 Rîru Faraû eera Njosebu, “Abaagu na aruanyûkwe bakûûya kîrî woû. 6 Nthî ya Miisiri îrî mbere yaku; abaagu na aruanyûkwe i batûûre gûntû kûra kwega mûno nthîgûrû îno. Ka batûûre Ngoseni. Na ûkaaya kwîgua kûrî antû wiyî gatîgatîîni kaao baûmbaga kûrîîthia bwega baige kaanyaani ga gûcûûbîra nyamû ciakwa cia ndîîthia.”
7 Rîru Njosebu aareeta îthe Njakubu amûmenyithania kîrî Faraû. Njakubu akeethia Faraû. 8 Na Faraû aûria Njakubu, “Ûrî na ûkûrû bwa mîanka îgana?” 9 Na Njakubu eera Faraû, “Mîanka yakwa ya gûtûûra aaga nthîgûrû n'îgana na mîrongo îthatû; îîthîrîîtwe îrî îmîkai na îmîûmo, îmîkai nkûrûki ya mîanka îra babaaba baatûûrire.” 10 Rîru Njakubu eera Faraû i bwega na aumagarûka.
11 Njosebu aathîkîra mawatho ma mûnene na aanenkera îthe na aruagina ithaka bimwe bia bira biega Miisiri akubî na taûni ya Ramesesi. 12 Njosebu aapa kinya îthe na aruagina na mûciî wa îthe uunthe irio, kûringana na bûra aana baagana.
Yûûra Miisiri
13 Nthî înu yonthe yaaga irio, n'ûntû bwa bûra yûûra rîarî rîkûnenea mûno; na n'ûntû bwa ûgu antû ba Miisiri na ba Kanaani banyamaara mûno i yûûra. 14 Njosebu eethîrania mbia ira cionthe cionekeete nthî ya Miisiri na ya Kanaani, kuumania na irio bira baagûraga, na acireeta nyomba ya Faraû. 15 Rîra mbia cia antû ba Miisiri na Kanaani ciathirire, Amiisiri bonthe baaya kîrî Njosebu bamwîra, “Tûneenkere irio. N'ata tûûmba gûkua ûkîonaga? Mbia cietû ikûthira.”
16 Njosebu abacookeria abeera, “Wegua mbia cienu ikûthira, mpaani ng'ombe cienu, na nkabwaa irio mbûkûûranîrie na ng'ombe.” 17 Kwoogu baaretera Njosebu nyamû ciao cia ndîîthia, mbaraathi, ng'ondu, mbûri, ng'ombe, mang'ooi na abakûûranîria na irio. Na abagiitithia mwanka ûyu akîbakûûranagîria irio na nyamû ciao cia ndîîthia.
18 Na rîra mwanka ûyu waathirire, baaya kîrî we mwanka ûra waathingatire bamwîra, “Tûtiûmba kwitha mûnene wetû ûmma, n'ûntû mbia cietû i ciathirire na nyamû cietû cia ndîîthia i woû ûrî nacio, gûtirî gîntû gîtigeere kîa mûnene wetû tatiga tiû na nthî yetû. 19 Itû ûtikaareke tûkuîra meethooni maaku na nthî yetû îtiganîrua. Tûgûre amwe na nthî yetû ûtwee irio, na tûgaatuîka nkombo cia Faraû amwe na nthî yetû; na ûtwee irio na mbeû kaingo tûgaatûûra tûtagîkua, na nthî yetû îtigwa îrî ntheri.”
20 Kwoogu Njosebu aagûrîra Faraû nthî yonthe ya Miisiri; n'ûntû antû ba Miisiri bonthe beendiirie mînda yao, n'ûntû yûûra irîarî rîkûbaimbîra. Nthî yatuîka ya Faraû. 21 Njosebu aatuîkithia antû aruti ngûgî ba Faraû kuuma mûthia ûmwe wa Miisiri kûthi ûra ûngî. 22 Nwa nthî ya athînjîri ba Ngai yonka ataagûra; n'ûntû athînjîri i beeyagwa mbia i Faraû rîonthe, na mbia inu Faraû aabeeyaga i cio baatûmagîra; kwoogu bateendia nthî yao. 23 Rîru Njosebu eera antû, “Raithaani, îmunthî nkûgûrîra Faraû biû na nthî yenu. N'îno mbeû îkaani bûkaande mîndaani yenu. 24 Na bwaketha bûkaanenkera Faraû gîcuncî kîmwe kuuma kîrî bitaano, na bina kuuma kîrî bitaano bikeegua birî bienu, birî mbeû ya kwanda mîndaani na biakûrîa bienu na mîciî yenu.”
25 Bauga, “Ûkwonokia mîtûûrîre yetû, tûkwona kwendeerwa meethooni ma mûnene wetû; tûkeegua tûrî nkombo cia Faraû.”
26 Kwoogu Njosebu abûtuîkithia watho îgûrû rîa nthî ya Miisiri na mwanka îmunthî tûrî bûrî oogo, atî gîcuncî kîmwe kuuma kîrî bitaano kîa maketha i gîa Faraû. I nthîgûrû ya athînjîri yonka îtaathûkua i Faraû.
27 Antû ba Isiraeri baatûûrire Miisiri gîteere kîa Ngoseni. Baagîa na ûtonga na baaciarana baingîa mûno.
28 Njakubu aatûûrire Miisiri mîanka îkûmi na mûgwanja, na ûkûrû bwake bwarî mîanka îgana rîa mîrongo înna na mûgwanja. 29 Rîra gûkua wake kwathengeere, aatûmana eetîrwa mwan'wake Njosebu na amwîra, “Wegua n'amma n'ûmbendeete aigîîra njara yaku ruungu rwa kîero gîakwa na ûmpe wîrane atî ûtiinthika Miisiri. 30 Ndîenda kûthikwa amwe na ba baaba; nkamata kuuma Miisiri na ûnthike naara bathikîîtwe.”
Njosebu aacookia, “Nkaarûtha woogu wambîîra.”
31 Njakubu amwîra, “Thiîtia.” Rîru Njosebu amûthiîtîria, na Njakubu eetiirîîra na kamûraagi gaake aagonga Ngai.a