Njakubu na mûciî wake baathaamîra Miisiri
46
1 Kwoogu Njakubu na bionthe bira aarî nabio aanjîîria rûgendo. Agûkinya Beeriseba, aarutîra Ngai wa îthe Isaka igongwana. 2 Ngai aarîria Njakubu kîrootooni ûtugû amwîra, “Njakubu, Njakubu!”Aacookia, “Iniûyû.”
3 Amwîra, “I niû Ngai, Ngai wa abaagu, ûtigaakuthûke kûthi Miisiri, n'ûntû ngagûtuîkithia mûgongo ûmûnene noogo. 4 Nkaathi naawe Miisiri, na ngaacookia nciarwa ciaku nthîgûrû îno kaîrî. Njosebu n'we agaakûthika wakua.”
5 Rîru Njakubu auma Beeriseba, nthaka ciake ciakamata îthe Njakubu, aana baao na eekûrû baao na nkaarî cia mang'ooi ira Faraû aarî agûtûmana cia kûmûkamata. 6 Baathûkia kinya nyamû ciao cia ndîîthia na into bira baarî kûgîta barî Kanaani. Njakubu na nciarwa ciake cionthe baathi Miisiri. 7 Kwoogu Njakubu aathûkia mûciî wake uunthe aathi nau Miisiri. Ino ciarî nthaka ciake na nthaka cia aana baake, aarî baake na aarî ba aarî baake.
8 Mama i mo mariîtwa ma nciarwa cia Njakubu, bara baathiire Miisiri,
Njakubu na nthaka ciake. Rubeni, gîtûra îria kîa Njakubu,
9 na nthaka cia Rubeni:
Anoki, Paru, Esironi, na Karimi.
10 Nthaka cia Simioni:
Njemueri, Njamini, Oandi, Njakini, Soari, na Saûrû, mwana wa mwekûrû Mûkanaani.
11 Nthaka cia Rawi:
Ngerisoni, Koathi, na Merari.
12 Nthaka cia Njunda:
Sera, Peresi, na Sera (Eri na Onani ibaarî bagûkuîra nthî ya Kanaani);
na nthaka cia Peresi ciarî
Esironi na Amuri.
13 Nthaka cia Isakaari:
Tora, Puba, Yasubu, na Simuroni.
14 Nthaka cia Seburuni: Serendi, Eroni, na Njareeri.
15 Ino i cio ciarî nthaka cia Rea, ira aaciarîîre Njakubu naagu Pandani-Aramu. Aana baake, na aana ba aana baake ba antû arûme baarî mîrongo îthatû na bathatû, amwe na mwarî wake Ndina.
16 Nthaka cia Ngandi:
Sifioni, Agi, Suni, Esiboni, Eri, Arondi, na Areri.
17 Nthaka cia Aseri:
Imuna, Isiba, Isibi, Mberia,
na mwaragina Sera.
Na nthaka cia Beria:
Eberi na Marikieri.
18 Baba i bo aana ba Njakubu bara aaciarire na Ciripa, ûra Rabani aapeere mwar'wake Rea; bonthe baarî îkûmi na bathanthatû.
19 Nthaka cia Raeri, mwekûrû wa Njakubu:
Njosebu na Benjameni. 20 Ndeeni ya nthîgûrû ya Miisiri Njosebu aaciarîrwa Manase na Eburaimu, n'Asenathi mwarî wa Potifera mûthînjîri wa Oni.
21 Na nthaka cia Benjameni:
Mbera, Bekeri, Asiberi, Gera, Naamani, Ei, Rosi, Mupimu, Upimu, na Arindi.
22 Ino i nthaka cia Raeri, ira ciaciaarîîrwe Njakubu, cionthe n'îkûmi na inya.
23 Nthaka cia Ndani nwa
Usimu wenka.
24 Nthaka cia Nabutarî:
Njaseeri, Nguni, Njeseri, na Siremu.
25 Ino i nciarwa cia Mbiria, ûra Rabani aapeere mwar'wake Raeri, na ino i cio aaciarîîre Njakubu nciarwa mûgwanja cionthe. 26 Mûtari wa nciarwa cia Njakubu ciongwa ira ciathiire Miisiri warî mîrongo îthanthatû na bathanthatû,a tûtagûtara eekûrû ba aana baake. 27 Njosebu n'aciarîîrwe aana baîrî Miisiri, mûtari gunthe wa mûciî wa Njakubu bara baarî Miisiri waya mîrongo mûgwanja.
28 Njakubu aatûma Njunda aathiiyaga arî mbere kwîra Njosebu abathagaane Ngoseni. Rîra baakinyire, 29 Njosebu aatwa nkaarîîni yake ya Mbaraathi aathi Ngoseni kûthagaana îthe. Rîra baakomanire, Njosebu aarigicîria îthe njara nkingo na aarîrîra oogo gwa kagiita kaaraaya. 30 Njakubu eera Njosebu, “Îîndî wana ngakua na ûkiri, n'ûntû nkwîbonera ningwa nwa ûrî mwoyo.”
31 Rîru Njosebu eera aruagina na babu bangî ba mûciî wa îthe, “Nwa mwanka nthi mbîîre Faraû aruayia na mûciî wa baaba uunthe, bara baratûûraga Kanaani, bakûûya akubî naani. 32 Nkamwîra bûrî arîîthi na i bwaigaga nyamû cia ndîîthia. Na mmwîre bûraayire na ng'ondu, ng'ombe na bionthe bira bûrî nabio. 33 Rîra Faraû akaabwîta abûûrie, ‘Bûrutaga ngûgî mbi?’ 34 Bûgaacookia buuge, ‘Tiû aruti ngûgî baaku twîthîrîîtwe tûrî arîîthi ûtûûro bwetû bunthe, wa ta bûra ba baaba baarûthaga.’ Rîru bûgeetîgîîrua gûtûûra gîteere kîa Ngoseni, n'ûntû Amiisiri bateendaga mantû ma antû bara baarîîthagia ng'ondu.”