Njosebu eemenyithania kîrî aruagina
45
1 Rîru Njosebu atikîûmba kwîgwata nkûrûki ya ûgu mbere ya aruti ngûgî baake, aagondoka abeera, “Muntû wonthe naume aaga ndî!” Kwoogu gûtirî we baarî na Njosebu rîra eemenyithanagia kîrî aruagina. 2 Aarîra nainya mûno mwanka Amiisiri, na antû ba mûciî wa Faraû beegua.3 Njosebu eera aruagina, “I niû Njosebu! Baaba arî mwoyo?” Îndî aruagina bataûmba kûmûcookia n'ûntû ibaamakîîte mûno barî agu mbere yake.
4 Rîru Njosebu eera aruagina, “Ncûûni akubî naani.” Bakûrûtha ûgu, abeera, “I niû mûruanyûkwe Njosebu, ûra bwendiirie Miisiri! 5 Na îîndî, bûtikaamake kana bwîmena n'ûntû bwa kûmbeendia naaga, n'ûntû Ngai n'antûmire mbere yenu kwonokia mîoyo yenu. 6 Kwa mîanka îîrî îîndî i kwîthîrîîtwe kûrî na yûûra nthîgûrû, na kwa mîanka îtaano îîyîîte gûtiîthîrwa kûrî na kûrîma na mûraaû kana gûketha. 7 Îndî Ngai aantûmire mbere yenu gûtûma mîciî yenu îtûûra mwoyo na kûbwonokia na njîra îno ya magegania. 8 Kwoogu ti biû bwantûmire gûkû, îndî i Ngai. N'antuîkithiirie mûrûngamîîri wa mûciî wa Faraû uunthe na mûtongoria wa Miisiri yonthe. 9 Îîndî cookaani na mpwî kîrî baaba na bûmwîre, ‘Ûûgû i bu mwan'waku Njosebu akuuga: Ngai n'antuîkithîîtie mûnene wa Miisiri yonthe. Ncû naaga ndî; na menya ûkaraanga. 10 Bûgaatûûra gîteere kîa Ngoseni na bwîgue bûrî akubî naani, woû, aana baaku na aana ba aana baaku, ndîîthia ciaku na ng'ombe, na bionthe bira ûrî nabio. 11 Nkabûmenyeera noogo, n'ûntû mîanka îtaano n'îîyîîte ya yûûra. Wegua t'ûûgu biû, mûciî wenu, na bionthe bira bûrî nabio bûkaagwatwa n'ûkîa bûûnene.’ 12 I bûkwîbonera bwingwa, wana kinya mûruayia Benjameni, i niû ningwa nkwaria naabi. 13 Îraani baaba mantû ma gîtîîyo kîra kîonthe mpeetwe Miisiri na monthe mara bwoneete. Na bûreete baaba na mpwî.”
14 Rîru aakumbata mûruagina Benjameni na baarîra bonthe. 15 Akûrîîkia gûcunca Benjameni, aacunca aruagina bonthe akîrîraga. Nyumaani aruagina baaria n'we.
16 Rîra ntheto inu ciakinyire nyomba ya Faraû atî aruagina ba Njosebu ibaarî kûûya, Faraû na aruti ngûgî baake bonthe baakena. 17 Faraû eera Njosebu, “Îra aruanyûkwe barûthe ûûgû, baîkie mang'ooi maao mîrigo na bacooke nthî ya Kanaani 18 na bathûkie abaagu na antû ba mûciî wenu na bacooke aaga, na nkabanenkera bira biega mûno bia nthîgûrû ya Miisiri, na bakaarîa bira binoru bia nthîgûrû îno. 19 Beere bathûkie kinya nkaarî cia mang'ooi kuuma Miisiri n'ûntû bwa gûkamata eekûrû baao na aana na îthe babareete nacio. 20 Bûtikaamake n'ûntû bwa into bienu, n'ûntû bira biega bionthe bia Miisiri bikeegua birî bienu.”
21 Kwoogu aana ba Njakubu beetîgîîria kûrûtha ûgu. Njosebu abaa nkaarî cia mang'ooi, wa ta bûra Faraû augîîte, na abaa kinya irio bia rûgendo rwao. 22 Aanenkera wa kîra ûmwe wao nguo ciaimbia, îndî aapa Benjameni thaabu magana mathatû na mabaa mataano ma nguo. 23 Na bibi i bio aatûmanîîre îthe, mang'ooi îkûmi maîkîîtue into bira biega bia Miisiri, na mang'ooi îkûmi ma nka maîkîîtue irio na mîgaate na irio bia îthe bia rûgendo rwake rwa gûcooka. 24 Rîru arekeeria aruagina baathi, na bakîthi abeera, “Bûtikaathete njîraani!”
25 Kwoogu baathi bauma Miisiri, na baakinya nthîgûrû ya Kanaani kîrî îthe Njakubu. 26 Bamwîra, “Njosebu arî mwoyo na îîndî, i mûnene wa nthîgûrû ya Miisiri yonthe.” Na nkoro yake yamakania, n'ûntû ataabeetîgia. 27 Îndî rîra baamwîrire monthe mara Njosebu aarî akûbeera, na rîra oonire nkaarî cia mang'ooi ira Njosebu aatûmanîîte cia kûmûkamata imwira Miisiri, nkoro yake yariûka. 28 Na Isiraeri auga, “Ingwîtîgia! Mwan'wakwa Njosebu arî mwoyo. Nkaathi kûmwona mbere nkua.”