Gîkombe gîa fetha nkuniani ya Benjameni
44
1 Nyumaani eera mûmenyeeri wa nyomba yake ata rî, “Ûyûria nkunia cia antû baba irio, biingî wa bûra bakaûmba gûkamata, na gwîkîre mbia cia wa kîra muntû mûromooni wa nkunia yake, 2 na gwîkîre gîkombe gîakwa, kîra gîa fetha, mûromooni wa nkunia ya ûra mûniini, na mbia ciake cia irio.” Na aarûtha wa bûra Njosebu aamwîrire. 3 Rware rwatema, antû babu baarekeerua baathi na mang'ooi maao. 4 Mbere bathi kûraaya kuuma taûni înu, Njosebu eera mûmenyeeri wake, “Îngana na antû babu; na wabagwatagwata, ûbaûrie, ‘I kî n'ûntû bwarîithia wega na ûthûûku? I kî n'ûntû bwaiya gîkombe gîa fetha kîa mûnene wakwa? 5 Gîkombe gîkî ti kîo mûnene wakwa anyunyagîra na kinya i kîo atûmagîra kwona mantû? I bûrûthîîte mabîtia mûno.’ ”6 Akûbagwatagwata, abeera biugo bibu. 7 Îndî bamûûria, “I kî n'ûntû mwathi wakwa ûkuuga mantû ta mama? Tûtirûtha ûntû ta bûbu! 8 Itûrabûcookeerie kinya mbia ira tweethîîre nkuniani cietû rîra twacookire Kanaani. Kwoogu n'aata tûkiiya thaabu kana fetha kuuma nyomba ya mûnene waku? 9 Wegua kûrî we wetû akeethîrwa nakîo, naûragwe; na tiû bara bangî tûtuîke nkombo cia mwathi wakwa.”
10 Abacookia abeera, “Ga gûkarîke ûgu, îndî ûra akeethîrwa arî nakîo n'we agaatuîka nkombo yakwa, na babu bangî batiîgua barî na thîîna.”
11 Rîru wa kîra ûmwe wao aakinyûkia nkunia yake na mpwî nthîgûrû, na amîtumûra. 12 Mûruti ngûgî wa nyomba ya Njosebu aathi na mbere kûraitha, kwanjîîria na ûra mûkûrû na kûrigia na ûra mûniini. Na gîkombe kîethîrwa nkuniani ya Benjameni. 13 Bakwona ûgu baatembûraanga nguo ciao, na wa kîra muntû oogeera îng'ooi rîake, na baacooka taûni.
14 Rîra Njunda na aruagina baakinyire nyomba ya Njosebu, Njosebu nwa aarî ku; na beendamîîra mbere yake batiirithîîtie moothiû nthî. 15 Njosebu abaûria, “I mbi îno bûrûthîîte ûûgû? Bûtiiyî muntû ta niû nwa ndorie mantû?”
16 Njunda amûcookia amwîra, “N'ata tûûmba kwîra mwathi wakwa? N'ata tûûmba kuuga? N'ata tûûmba kûrûtha wîtîgia tûtirî na mabîtia? Ngai agûkunûra mabîtia meetû. Îîndî tûrî nkombo cia mwathi wakwa tiû na ûra eethîîrwe na gîkombe.”
17 Îndî Njosebu amwîra, “Niû ntirûtha ûgu! Nwa ûra eethîîrwe arî na gîkombe agaatuîka nkombo yakwa. Îndî biû, cookaani kîrî abaagu na thîîrî.”
Njunda eerekana n'ûntû bwa Benjameni
18 Rîru Njunda aathiiyanga mbere amwîra, “Itû mwathi wakwa, mbîtîgîîria mbarie naawe. Menya ûthûûra i niû; n'ûntû ûkari ta Faraû wengwa. 19 N'watûûriirie wegua baaba nwa arî mwoyo na wegua tûrî na mûruayia ûngî. 20 Na twacookia, ‘Tûrî na baaba, na n'ûmûkûrû mûno, na kûrî na kaana aaciarire arî ûmûkûrû. Mûruagina n'ûmûkuû, na i ko gonka kîrî aana bagina gatigîîtwe, na îthe n'akeendeete mûno.’
21 “Rîru mûnene watwîra, ‘Bûndetere we kaingo mmwona ningwa.’ 22 Îndî mûnene twakwîra, ‘Ûntû nwa bûrîkû bûkaaya gûkarîka kîrî ko, gakaaya kûûra kana gakaûragwa, îthe n'agaakua.’ 23 Îndî watwîra, ‘Tatiga bûkeendama na mûruanyûkwe ûra mûniini, bûtiaria naani kaîrî.’ 24 Rîra twacookire kîrî mûruti ngûgî waku t'we baaba, itwamwîrire bûra waugîîte mûnene.
25 “Nyumaani baaba atwîra, ‘Cookaani bûtûgûrîre irio biingî.’ 26 Îndî twacookia twauga, ‘Tûticooka Miisiri tûtarî na mûruayia ûra mûniini. Tûtiîtîgîîrua kwona mûnene, nwanga tûrî n'we.’
27 “Baaba atwîra, ‘I bwiyî mwekûrû wakwa ûra ndendeete mûno aanciarîîre aana baîrî. 28 Ûmwe waabo naûrire, na ndauga, ûmma n'atembûrangirwe i nyamû. Na ntaamwona kuuma rîru. 29 Bwanthûkîria gaka nako î, thîîna ya kaayîîra, i ngaakua i kîeba.’
30 “Kwoogu îîndî, tûkaaya gûcooka kîrî baaba tûtarî na Benjameni, baaba ûra we ûtûûro bwake bûgwatithanîîtue na bwa kaana gaku, 31 akaaya kwona gatirî oogo, n'agaakua. Aruti ngûgî baaku i ka tûkaûraga baaba na kîeba. 32 Indeeranîîte na baaba ngagacookia mûciî gatarî na thîîna. Ndeerire baaba nwa ambûûrie ûtûûrooni bwakwa bunthe ndaarega kûrûtha ûgu. 33 Kwoogu îîndî, itû tiga ntigwe aaga ndî nkombo ya mwathi wakwa bantû a kaana gaka, kareke gacooke na aruagina. 34 N'ûntû ntiûmba gûcooka kîrî baaba ntarî nako. Ingûkuthûka kwona ûthûûku bûra bûûmba kûûyîîra baaba.”