Aruagina ba Njosebu baacooka Miisiri barî na Benjameni
43
1 Yûûra narîo rîanenea mûno nthîgûrû înu. 2 Na bakûrîa irio bira baagûrîîte Miisiri bionthe, îthe abeera, “Cookaani bûtûgûrîre twirio tûûngî.”3 Îndî Njunda amwîra, “Muntû ûyu aatûkaaniirie nainya mûno, atwîra, ‘Bûtiimbona kaîrî nwanga bûrî na mûruanyûkwe.’ 4 Wegua ûkaarekeeria mûruayia tûthi n'we, tûkaathi na tûbûgûrîre irio. 5 Îndî wegua ûtimûrekeeria, tûtiithi, n'ûntû muntû ûyu aatwîrire, ‘Bûtiimbona bûtarî na mûruanyûkwe.’ ”
6 Njakubu aûria, “I kî n'ûntû bwandeteere thîîna îno bwera muntû ûyu bûrî na mûruanyûkwe ûngî?”
7 Bamûcookeria bamwîra, “Muntû ûyu i ka aakarire agîtûûragia mantû meetû na mûciî wetû, akîûragia, ‘Abaagu arî mwoyo? Bûrî na mûruanyûkwe ûngî?’ Ga twacookagia biûria biake. N'ata tûkîûmba kûmenya akauga, ‘Bûreete mûruanyûkwe aaga?’ ”
8 Njunda eera îthe Isiraeri, “Mpa Benjameni tûthi n'we, kaingo tiû na woû na aana beetû tûtagîkua i yûûra. 9 Inkûthiîtia kûmûcookia atarî na thîîna na wegua tibu i niû ûkaûria ûtûûrooni bwakwa bunthe. 10 N'ûntû ûkeegua tûtaakarakara, wîgua twathiire na twacooka maita maîrî.”
11 Rîru îthe Isiraeri abeera, “Wegua nwa mwanka gûkarîke ûgu, îkîraani into bira biega bia nthîgûrû îno mîbukooni yenu. Bwirîre muntû ûyu birî biewa, ûkî, tûnyamû tûra tûnuunkagia irio bwega, mîtaa, na arimondi. 12 Bûthi na mbia irî mbugithie maita maîrî, n'ûntû nwa mwanka bûcookie mbia ira ciacookiirue irî mîromooni ya nkunia cienu n'ûntû nwa mwanka wîgue kwarî na mabîtia. 13 Thûkiani kinya mûruanyûkwe na bûthi kîrî muntû ûyu kaîrî. 14 Na Ngai Mwene Inya arootûma muntû ûyu akabwîgîîrua kîao akarekeeria mûruanyûkwe ûra ûngî na Benjameni. Wegua i ka aana baakwa bakaambûra ka baambûre.” 15 Kwoogu baathûkia biewa na mbia irî mbugithie maita maîrî, na kinya Benjameni. Baanjîîria rûgendo rwa kwîndama Miisiri na beebonania kîrî Njosebu. 16 Rîra Njosebu oonire barî na Benjameni, eera mûrûngamîri wa nyomba yake, “Thûkia antû baba ûbaire nyomba yakwa, ûbathînjîre na ûthuuranîre irio; tûkaarîa nabo thaa thiita.”
17 Muntû ûyu aarûtha wa bûra Njosebu aamwîrire na abaira nyomba ya Njosebu. 18 Antû babu baamaka mûno bakwirwa nyomba yake. Baathûgaania, “Tûreetirwe aaga n'ûntû bwa mbia ira ciacookiirue nkuniani cietû îgiita rîa mbere. Nakwenda gûtûgwata atwatha ta nkombo na athûkia mang'ooi meetû.”
19 Kwoogu baathi mwanka kîrî mûmenyeeri wa nyomba ya Njosebu, na baaria n'we barî mwîrangooni wa nyomba, 20 bamwîra, “Îî, mwathi wetû, twayire kûgûra irio îgiita rîa mbere; 21 na rîra twakinyire bantû ara twamaamire twatumûra nkunia cietû, twethîra i kwarî na mbia mûromooni wa nkunia ya wa kîra muntû, mbia cietû igana wa bûra; kwoogu tûkûûya nacio. 22 Na tûkûûya na mbia cingî cia kûgûra irio. Tûtiiyî n'ûû eekîîre mbia nkuniani cietû.”
23 Abacookeria abeera, “Booreraani nkoro, menya bûmaka; Ngai wenu na Ngai wa abaagu nwa mwanka wîgue n'we arabwîkîîre mbia nkuniani cienu; indaagwatire mbia cienu.” Rîru abarutîra Simioni. 24 Mûmenyeeri wa nyomba ya Njosebu aira antû babu nyomba ya Njosebu, abaa rûûyî rwa kûthamba magûrû na aapa mang'ooi maao rûûa. 25 Baathuuranîra biewa bia Njosebu agîkinya thaa thiita, n'ûntû ibaarî bakwîgua bakaarîa noogo.
26 Rîra Njosebu aayire mûciî, bamûretera biewa bira baarî nabio nyomba, na bamwîndamîîria moothiû maao bamatiirithia nthîgûrû. 27 Abaûria mantû ma ûgima bwao bwa mîîrî, na abaûria, “Abaagu n'ûmwega, mûkûrû ûra bwaugaga? Nwa arî mwoyo?”
28 Baacookia, “Mûruti ngûgî waku baaba n'ûmwega, na arî mwoyo.” Na baaturia maru kûmwaa gîtîîyo.
29 Aûkîîria meetho maake, oona mûruagina Benjameni, mwana wa gina wengwa, aûria, “Ûyû n'we mûruanyûkwe ûra mûniini, ûra bwambîîraga mantû maake?” Amwîra, “Ngai arookwîgîîrua kîao, mwan'wakwa!”
30 Akûriingithua nkoro mûno n'ûntû bwa kwona mûruagina, Njosebu aumagarûka na mpwî na aaceria bantû a kûrîrîra. Aathûngîra kanyomba gaake ka ndeeni aarîrîra ku.
31 Rîru aathaamba ûthiû na aumagarûka; eegwete auga, “Ka irio biiye.” 32 Bamûnenkera irio arî mwanya, aruagina mwanya, na Amiisiri bara baarîîyaga n'we nabo mwanya, n'ûntû batikîrîîyanîra na Aibirania, n'ûntû ûyu i mûgiro kîrî Amiisiri. 33 Aruagina ba Njosebu baakari mbere yake beebaangîîte kûringana na ûkûrû bwao, kuuma ûra mûkûrû mwanka ûra mûniini; na baaraithana barigarîîte. 34 Baagaagîrwa irio kuuma meethaani ya Njosebu, îndî gîcuncî kîa Benjameni kîarî maita mataano nkûrûki ya bara bangî. Kwoogu baanyua na baakeneera amwe n'we.