Aruagina ba Njosebu baathi Miisiri kûgûra irio
42
1 Rîra Njakubu aamenyire kûrî na irio Miisiri, eera aana baake, “I kî n'ûntû bûkari aaga bûcûûbanîîte? 2 Antû i bambîîrîîte kûrî na irio Miisiri. Îndamaani noogo bûtûgûrîre, kaingo tûtakua.” 3 Kwoogu aruagina îkûmi ba Njosebu beendama Miisiri kûgûra irio. 4 Îndî Njakubu ataatûma Benjameni, mûruagina wa Njosebu, na aruagina, n'ûntû n'akuthûkire thîîna yîîya kûmûûyîîra. 5 Kwoogu aana ba Njakubu baarî bamwe ba bara baathiire kûgûra irio, n'ûntû yûûra irîarî nthî ya Kanaani kinya ku.6 Îgiita rîru i Njosebu aarî ngabana nthî înu, ûra eendagîria antû baayo bonthe irio. Kwoogu rîra aruagina ba Njosebu baakinyire, bamwîndamîîria moothiû maao bamatiirithia nthî. 7 Rîra Njosebu oonire aruagina, abamenya, îndî ataareka bamenya aarî ûû. Abaûria na marûrû, “I kû buumîîte?”
Bamûcookeria, “Tuumîîte nthî ya Kanaani, tûûyîîte kûgûra irio naaga.”
8 Kinya wegua Njosebu n'amenyaga aruagina, bo bataamûmenyaga. 9 Rîru aaririkana irooto biake îgûrû rîao na abeera, “Bûrî athigaani! Bûûyîîte kwona ara nthî yetû îrî na ûremeeru?”
10 Baacookia, “Arî mûnene, tûtiiyîîte kûthigaana nthî yenu îndî i kûgûra irio. 11 Twinthe tûrî aana ba muntû ûmwe. Aruti ngûgî baaku n'antû ba ûmma, t'athigaani.”
12 Abeera, “Arî! Bûûyîîte kwona ara nthî yetû îrî na ûremeeru.”
13 Îndî baacookia bamwîra, “Aruti ngûgî baaku baarî aana îkûmi na baîrî ba muntû ûmwe, ûra atwîre nthî ya Kanaani. Kara kaniini karî na baaba, na ûmwe atirî oogo.”
14 Njosebu abeera, “Wa bûra ndabwîra: Bûrî athigaani! 15 Na ûûgû i bu bûkaagerua: Ûmma wa ta bûra Faraû atwîre mwoyo, bûtiuma gûntû gûkû tatiga mûruanyûkwe ûra mûniini akaaya. 16 Thuuraani ûmwe wenu athi agîîre mûruanyûkwe; babu bangî baingîrwe nceera, kaingo mîgambo yenu îthimwa twone wegua i bûkwaria ûmma. Wegua t'ûûgu, ûmma n'atî wa ta bûra Faraû atwîre mwoyo, bûrî athigaani.” 17 Na bonthe abaingîra nceera ntugû ithatû.
18 Ntugû ya ithatû Njosebu abeera, “Rûthaani ûûgû na bûtiûragwa, n'ûntû i nkuthûkaga Ngai: 19 Wegua bûrî antû ba ûmma, ka ûmwe wa cienu atigwe nceera, babu bangî beenûkîrie antû ba mûciî bara barî na yûûra irio. 20 Îndî nwa mwanka bûûndetere mûruanyûkwe ûra mûniini, kaingo menya i bûkwaria ûmma, na bûtiûragwa.” Na baarûtha bu. 21 Beerana, “Ûmma itûgûkaanûkua n'ûntû bwa Njosebu. Itwonire bûra aarî mwinyîîrie rîra aatwerekaga îndî tûtaathikîîria; na i ntûma thîîna îno îtûûyîîrîîte.” 22 Rubeni abacookia abaûria, “Ntaabwîrire bûtikaabîtîrie kaîyî gaku? Îndî bûtikîmbîgua.” 23 Bataamenyaga kana Njosebu naamenyaga rwaria rwao, n'ûntû aaragia nabo agîtaûragîrwa. 24 Aumaanga agu baarî na aanjîîria kûrîra, îndî rîru aacooka aaria nabo kaîrî. Na aathûra Simioni kuuma kîrî bo na amûthaîkîra agu bakîonaga. 25 Na Njosebu aaruta watho nkunia ciao ciûyûrue irio, mbia cia wa kîra ûmwe icookue nkuniani yake, na baneenkerwe biakûrîa barî rûgendooni. Nyuma ya bakûrûthîrwa ûgu, 26 boogeera irio biao mang'ooini baathi.
27 Bagûkinya ara baaraarire, ûmwe wao aatharia nkunia yake akîrûmia îng'ooi rîake irio, eethîra mbia ciake mûromooni wa nkunia. 28 Eera aruagina, “Raithaani! Mbia ciakwa n'iracookiirue. I ciino nkuniani yakwa.”
Nkoro ciao ciamaka na baaraithana bakiinainaga baûrania, “I mbi îno Ngai atûrûthîîte ûûgû?”
29 Rîra baacookire kîrî îthe Njakubu nthîgûrû ya Kanaani, bamwîra monthe mara boonire nthî ya Miisiri, 30 “Mûnene wa nthîgûrû înu aratwarîîrie na ûrûme, baratûthûkiirie taka tûrathigaanaga nthî yao. 31 Îndî twabeera, ‘Tûrî antû beega; tûtirî athigaani. 32 Twarî nthaka îkûmi na ciîrî, aana ba îthe ûmwe. Ûmwe atirî oogo, na ûra mûniini îîndî arî na îthe Kanaani.’
33 “Rîru muntû ûra aarî mûnene wa Miisiri atwîra, ‘Ûûgû i bu nkaamenya nabu wegua bûrî antû beega: Tigaani mûruanyûkwe ûmwe aaga, bûthi bûkairîre antû irio mûciî bara bakûthîîna i yûûra. 34 Îndî bûûndetere mûruanyûkwe ûra mûniini kaingo mbîtîgia bûtirî athigaani bûrî antû beega. Rîru mbûcookerie mûruanyûkwe, na ûkeegua bûtarî na thîîna nthîgûrû îno. Nwa bûkare ku na bûkariinga biacaara bûtakûûrua.’ ”
35 Rîra baarutaga irio nkuniani beethîra kwa wa kîra muntû i kwarî na mîbuko ya mbia. Bonthe amwe na îthe baamaka mûno. 36 Îthe abaûria, “Ka bûkwenda mbûrwa n'aana baakwa bonthe? Njosebu atirî oogo; Simioni n'athiire; na îîndî i bûkwenda kûthûkia Benjameni. Nwa niû nkûthîîna!”
37 Rîru Rubeni eera îthe, “Ûûrage aana baakwa barî baîrî wegua ntiicookia Benjameni kîrî woû. Mbîtîgia n'we, na ngagûcookeria we.”
38 Îndî Njakubu auga, “Bûtiithi na mwan'wakwa naagu; mûruagina n'aakuire n'we wenka kîrî ng'ina atigîîtwe. Ûntû bûûthûûku bûkaaya gûkarîka kîrî we rûgendooni rûru bûthiîte, i nkua i kîeba.”